އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާގެ ހޮސްޕިޓަލްތައް ފުނޑު ފުނޑުވުމާ ދިމާލަށް ގޮސްފައިވާ ކަމަށް ވިދާޅުވެ، ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ)ގެ ވެރިޔާ ޓެޑްރޯސް އަދަނޯމް ގެބްރެއިސަސް ކަންބޮޑުވުން ފާޅު ކުރައްވައިފި އެވެ.

ބުރާސްފަތި ދުވަހު އެކްސްގައި ކުރެއްވި ޕޯސްޓެއްގައި ޓެޑްރޯސް ވިދާޅުވެފައި ވަނީ، އުތުރު ޣައްޒާގައި އިސްރާއީލް ސިފައިން ކުރިއަށް ގެންދާ އޮޕަރޭޝަންތަކާއި، ރައްޔިތުން ސަރަހައްދު ދޫކޮށް ދިޔުމަށް ނެރޭ އަމުރު ތަކުގެ ސަބަބުން ގިނަ އަދަދެއްގެ މީހުން ނިކަމެތި ޙާލުގައި ޖެހިފައިވާ ކަމަށެވެ.

ޓެޑްރޯސް ވިދާޅުވީ، މީގެ ކުރިން ވެސް ޣައްޒާގެ ހޮސްޕިޓަލް ތަކުގައި ޖާގައިގެ ދަތިކަން ދިމާވެފައިވާ ކަމަށާއި، މިހާރު އިތުރު ގޮން ޖެހުންތަކެއް ކުރިމަތިވެފައިވާ ކަމަށެވެ. އަދި ހަނގުރާމައިގެ ސަބަބުން ޑަބްލިއުއެޗްއޯ އަށް އެ ސަރަހައްދަށް ވަދެ، ޣައްޒާގެ ރައްޔިތުންނަށް ބެނުންވާ ބޭސްފަރުވާގެ ވަސީލަތްތައް ފޯރުކޮށްދިނުމަށް ވެސް ހުރަސް ތަކެއް ކުރިމަތި ވެފައިވާ ކަމަށް ޓެޑްރޯސް ވިދާޅުވެފައިވެ އެވެ.

ޣައްޒާގެ އިންސާނީ ޙާލަތު އިންތިހާ އަށް ކަންބޮޑުވާ ދަރަޖަ އަށް ގޮސްފައިވާއިރު، މިހާރުގެ ޙާލަތު ވަގުތުން ނިމުމަކަށް ގެންނަން ޖެހޭ ކަމަށް ޓެޑްރޯސް ވަނީ ފާހަގަ ކުރައްވައިފަ އެވެ. ހަމަ އެހެންމެ ހަނގުރާމައިގެ ސަބަބުން ގިނަ އަދަދެއްގެ އާއިލާތަކެއް ވަނީ ޓްރޯމާގެ ޙާލަތުގައި ޖެހިފައި ކަމަށާއި، އިންސާނީ ކަރާމާތް ގެއްލޭ ފަދަ ގޮތަކަށް ކުޑަ ކުޑަ ސަރަހައްދު ތަކަކަށް ޖަމާވާން މަޖުބޫރުވެފައި ކަމަށް ވެސް ޓެޑްރޯސްގެ ޕޯސްޓުގައި ވަނީ ވިދާޅުވެފަ އެވެ.

ޣައްޒާގެ ޙާލަތު އެއް ދުވަހުން އަނެއް ދުވަހަށް ގޯސްވަމުން ދާއިރު، އެކަމުގެ ސަބަބުން އާންމު ރައްޔިތުންނަަށް ލިބެމުްނދާ ގެއްލުން އިންތިހާ އަށް ބޮޑުވަމުން ދާ ކަމަށް ޑަބްލިއުއެޗްއޯ އިން ވަނީ ފާހަގަ ކޮށްފަ އެވެ. އަދި އެއީ އިންތިހާ ދަރަޖަ އަށް ކަންބޮޑުވުން އޮތް ކަމެއް ކަމަށް ވެސް ވަނީ ފާހަގަ ކޮށްފަ އެވެ.