ޣައްޒާ ސިޓީ އިން ރައްޔިތުން ނިކުތުމަށް ވަގުތީ މަގެއް ހުޅުވާލައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ފުޅާ ކޮށްފައިވާއިރު، ޣައްޒާ ސިޓީ އިން ރައްޔިތުން ނިކުތުމަށް ވަގުތީ މަގެއް ހުޅުވާލައިފި އެވެ.

އިސްރާއީލްގެ އަސްކަރިއްޔާ އިން ބުދަ ދުވަހު ވަނީ، ޣައްޒާ ސިޓީގައި ތިބި ރައްޔިތުން އެ ސަރަހަައްދުން ނިކުތުމަށް، ނުވަތަ ފުރައިގެން ދިޔުމަށް ވަގުތީ މަގެއް ހުޅުވާލާފައިވާ ކަމަށް ހާމަކޮށްފަ އެވެ. މިއީ ފާއިތުވި ދެ ހަފުތާގެ ތެރޭގައި އިސްރާއީލް އިން އެ ސަރަހައްދުގައި ދެމުން ގެންދާ ހަނގުރާމަވެރި ހަމަލާ ތަކުން ސަލާމަތްވުމަށް ރައްޔިތުން ލިބުނު ފުރުސަތެއްގެ ގޮތުގައި ބައެއް ފަރާތްތަކުން ވަނީ ފާހަގަ ކޮށްފަ އެވެ.

އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި މި މަގު ހުޅުވާލެވިފައި ވަނީ އިންސާނީ ބޭނުން ތަކަށް ކަމަށާއި، ޣައްޒާ ސިޓީގެ އުުތުރުގައި ދިރި އުޅެމުން އަންނަ ރައްޔިތުން، ދެކުނަށް ދިޔުމަށް އެ މަގު ބޭނުން ކުރެވޭނެ ކަމަށެވެ. ނަމަވެސް، އެ މަގު ހުޅުވިފައި އޮންނާނެ ވަގުތެއް އަދި މުއްދަތެއް މިހާތަނަށް ހާމަކޮށްފައި ނުވެ އެވެ.

އިސްރާއީލް އިން ޣައްޒާގައި ހިންގަމުން އަންނަ އަނިޔާވެރި އަމަލު ތަކުގެ ސަބަބުން، އެތައް ސަތޭހަ ހާހަށް ވުރެ ގިނަ ފަލަސްޠީނުގެ ރައްޔިތުން ވަނީ ހިޖުރަވެރިންގެ ގޮތުގައި އެ ސަރަހައްދު ދޫކޮށް ދިޔުމަށް މަޖުބޫރުވެފަ އެވެ. ހަމަ އެހެންމެ، އިސްރާއީލް އިން ދެމުން އަންނަ ހަމަލާ ތަކުގައި 64،000 އަށް ވުރެ ގިނަ ރައްޔިތުން ވަނީ ޝަހީދުވެފަ އެވެ.

ޣައްޒާގައި ހިންގަމުން އަންނަ ހަނގުރާމަ ފުޅާ ކުރުމަށް އިސްރާއީލް އިން ނިންމާފައިވާއިރު، އދ އިން ވަނީ އެކަމުގެ ކަންބޮޑުވުން ފާޅުކޮށް، އެ ހަނގުރާމަ އަށް އަވަސް ހައްލެއް ހޯދަން ޖެހޭ ކަމަށް ވެސް ގޮވާލައިފަ އެވެ. އަދި ޣައްޒާގެ އިންސާނީ ޙާލަތާ މެދު އދ އާއި ބައިނަލްއަޤުވާމީ އެހެން އިދާރާ ތަކުން ވެސް ވަނީ ކަންބޮޑުވުން ފާޅު ކޮށްފަ އެވެ.

ބައިނަލްއަޤުވާމީ އިންސާނީ ޖަމިއްޔާ ތަކުން ބުނެފައިވާ ގޮތުގައި، ޣައްޒާގެ ރައްޔިތުންނަށް މިހާރު ކުރިމަތިވެފައިވާ އިންސާނީ ބޮޑު ކާރިސާ އަށް އަވަސް ހައްލެއް ބޭނުންވެ އެވެ. އަދި އިސްރާއީލް އާއި ހަމާސް ޖަމާއަތާ ދެމެދު ހިންގަމުން އަންނަ ހަނގުރާމަ ހުއްޓާލުމަށް ވެސް ވަނީ ގޮވާލައިފަ އެވެ.