ޒުވާނުން ރުއްސަން ކްރިއޭޓިވް ފަނޑޭ ކިޔައިގެން މޮޅު އެއްޗެއް ވިދާޅުވާން އުޅެނިކޮށް އަތަށް ގޮވައިފި!

ޒުވާނުން ސަރުކާރާއި ދެކޮޅަށް ބަސްބުނަމުންދާ ދަނޑިވަޅެއްގައި ޒުވާނުން ރުއްސަން ކްރިއޭޓިވް ފަނޑެ ކިޔައިގެން މޮޅު ވާހަކައެއް ވިދާޅުވާން އުޅެނިކޮށް ރައީސް މުޢިއްޒު އަތައް ގޮވައިފި އެވެ.

ރާއްޖޭގެ އީޖާދީ އަދި ފަންނުވެރި ފަރާތްތަކަށް އަމާޒުކޮށްގެން، ކްރިއޭޓިވް އިކޮނޮމީ ފަންޑެއް ސަރުކާރުން ތަޢާރަފްކޮށް މި ފަންޑް އިފްތިތާޙްކޮށްފައިވަނީ 17 ސެޕްޓެމްބަރު 2024 ގައި އެކަމަށްޓަކައި ދަރުބާރުގޭގައި ބޭއްވި ޚާއްސަ ރަސްމިއްޔާތެއްގައި އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދެވެ.

އަދި ފަންނުވެރިންނަށް މާލީ އެހީތެރިކަން ފޯރުކޮށްދިނުމަށް މި ސަރުކާރުން ޤާއިމްކުރި ކްރިއޭޓިވް އިކޮނޮމީ ފަންޑުން އެހީ ހޯދުމަށް ހުށަހެޅުމަށް ހުޅުވާލައިފައިވަނީ 2024 ވަނަ އަހަރުގެ އޮކްޓޫބަރު މަހު 10 ވަނަ ދުވަހުއެވެ. އެ ފަންޑަށް ކުރިމަތިލުމުގެ ފުރުސަތު ހުޅުވާލައިފައިވަނީ ބިޒްނަސް ސެންޓަރ ކޯޕަރޭޝަނުންނެވެ.

ޒުވާން ކްރިއޭޓަރސް އަށް ފައިސާ ދިނުން ބޮޑު ރަސްމިއްޔާތެއްގައި އިފްތިތާހު ކޮށް އަދި ފަންޑަށް ކުރިމަތި ލުމުގެ ފުރުސަތު ހުޅުވާލައިފައިވަނިކޮށް އަދި އެއްވެސް ފަރާތަކަށް ފައިސާ ނުދީ އަހަރަކަށްވުރެ ގިނަ ދުވަސް ވީ ފަހުން އަނެއްކާވެސް ލޯނު ދޭނެ ކަމަށް ބުނެ ބޯޑު އިއުލާނެއް ވަނީ ކޮށްފައެވެ.

ރައީސް ޑރ. މުހައްމަދު މުޢިއްޒު އާދިއްތަ ދުވަހު ސޯޝަލް މީޑިއާގައި ކުރި ޕޯސްޓެއްގައި ވިދާޅުވި، މެނިފެސްޓޯ ގައިވާ ވަޢުދު ތަކުގެ ތެރެއިން ރާއްޖޭގެ ކޮންޓެންޓް ކްރިއޭޓަރުންނަށް ޚާއްސަކޮށްގެން ލުއިލޯނު ދިނުމުގެ ސްކީމެއް ހުޅުވާލުމަށް ކުރަންޖެހޭ ފަންނީ މަސައްކަތްތައް ނިމުމަކާ ހަމަޔަށް ވަނީ ގޮސްފައިވާ ކަމަށެވެ. އަދި މި ލޯން ސްކީމް ގެ މަޤްޞަދަކީ ކްރިއޭޓިވް އިކޮނޮމީގެ ދައުރު އިތުރަށް ފުޅާކޮށް، އެދާއިރާގައި އިތުރަށް ހަރަކާތްތެރިވުމުގެ ފުރުސަތު ދިވެހި ޒުވާނުންނަށް ފަހިކޮށްދިނުން ކަމަށް ރައީސް މުޢިއްޒު ވިދާޅުވިއެވެ. ނަމަވެސް އެއްވެސް ފަރާތަކަށް ފައިސާ ނުދީ އަހަރެއް ވީ ފަހުން އަނެއްކާވެސް ލޯނު ދޭނެ ކަމަށް ބުނެ ބޯޑު އިއުލާނެއް ކޮށްފި އެވެ.

ރައީސް މުޢިއްޒު ވިދާޅުވީ މީޑިއާ ކޮންޓެންޓް، އޯޑިއޯ ވީޑިއޯ އިމޭޖް ޕްރޮޑަކްޝަން، އެންޓަރޓެއިންމަންޓްގެ އިތުރަށް ސޭލްސްއާއި މާކެޓިންއަށް ޚާއްސަ ކޮންޓެންޓްގެ ދާއިރާއަށް ފުރުސަތު ލިބޭގޮތަށް މި ސްކީމް ޑިޒައިންކޮށް، ކުރިޔަށް 2 ހަފްތާ ތެރޭގައި ހުޅުވާލަން ވަނީ ދަންނަވާފައި ކަމަށެވެ.

ބެލެވޭގޮތުގައި ޒުވާނުންނަށް އަމާޒުކޮށް ކްރިއޭޓިވް އިކޮނޮމީ ފަންޑުގެ ނަމުގައި އަނެއްކާވެސް ބޮޑު އިއުލާނެއް ކޮށްފައިވަނީ ، ޒުވާނުން މަގުމައްޗަށް ނުކުމެ، މީޑިޔާ އަދި ސޯޝަލް މީޑިޔާއާއި، ޚިޔާލު ފާޅު ކުރުމުގެ މިނިވަންކަން ނައްތާލައި ވައްކަން ފޮރުވާ ބިލާއި ދެކޮޅަށް މަގުމައްޗަށް ނިކުމެދާނެ ކަމަށް ބަލައި ޒުވާނުންނަށް އޮޅުވާލުމަށެވެ.

މީގެ އިތުރުން މިދިޔަ އަހަރު އޮކްޓޫބަރު މަހުގެ 9 ވަނަ ދުވަހު ބީސީސީން ބުނީ، އުފެއްދުންތެރި މަސައްކަތްތައް ކުރާ ފަރާތްތަކަށް މާލީ އެހީތެރިކަން ދިނުމަށް ޤާއިމްކޮށްފައިވާ ކްރިއޭޓިވް އިކޮނޮމީ ފަންޑުގެ ދަށުން މާލީ އެހީތެރިކަން ފޯރުކޮށްދޭ ފުރަތަމަ ސްކީމް އޮކްޓުބަރު މަހުގެ 10 ވަނަ ދުވަހު ހުޅުވާލަން ބީސީސީން ނިންމާފައިވާ ކަމަށެވެ.

އަދި ދައުލަތުގެ މީޑިއާ ޕީއެސްއެމް އިން ޝައިކޮށްފައިވާ ޚަބަރުގައިވާގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކްރިއޭޓިވް އިކޮނޮމީ ތަރައްޤީކުރުމުގެ ސިޔާސަތުގެ ތެރެއިން އިފްތިތާޙްކޮށްފައިވާ މި ފަންޑުގެ އަމާޒަކީ، އީޖާދީ އަދި އުފެއްދުންތެރި ފަރާތްތަކަށް މާލީ އެހީތެރިކަން ފޯރުކޮށްދިނުމެވެ. އެގޮތުން ހުށަހަޅާ ކޮންމެ ފަރާތަކަށްވެސް 50،000 ރުފިޔާއާއި 300،000 ރުފިޔާއާ ދެމެދު އެހީއެއް ދޭނެކަމަށް މި މަސައްކަތުގައި އިސްކޮށް ހަރަކާތްތެރިވާ ބިޒްނަސް ސެންޓަރ ކޯޕަރޭޝަނުން ވިދާޅުވެފައިވާކަމަށް އެ ޚަބަރުގައި ބުނެފައިވެއެވެ.

ޒުވާނުންނަށް އަމާޒުކޮށް ކްރިއޭޓިވް އިކޮނޮމީ ފަންޑުގެ ނަމުގައި ޒުވާނުންނަށް ފަންޑު ދޭނެ ކަމަށްބުނެ ދެވަނަ ފަހަރަށް އިއުލާނުކުރުމުން ގިނަ ޒުވާނުންތަކެއް ވަނީ ރައިސް މުޢިއްޒަށް ފާޑު ވިދާޅުވެފަ އެވެ. އެ ޒުވާނުން ފާހަގަކުރާ ގޮތުގައި މީގެ އަހަރެއް ކުރިން ދޭނެ ކަމަށްބުނެ ހުޅުވާލި ފަނޑު އޭރު ނުދެވުނުއިރު މިހާރު ދެވޭނެ ކަމަށް ގަބޫލުނުކުރާކަމަށެވެ. އެ ޒުވާނުން ބުނަނީ އަނެއްކާވެސް ތި ދައްކަވަނީ ހޮޅި ވާހަކައެއް ކަމަށެވެ.