ޤާނޫނު ނަންބަރު 7/2010 (ދިވެހިރާއްޖެހޭ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާ)ގެ ދަށުން ކައުންސިލްތަކަށް ސަރުކާރުން ދޭ ޢާންމު ހިލޭ އެހީގެ ފައިސާ (ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލާ މުރާޖައާ ކުރަންޖެހޭ ހާލަތެއް ނެތް ކަމަށާއި މިހާރުވެސް ފިސްކަލް ފޯމިއުލާ އެކުލެވިގެންވަނީ ބިމުގެ އޭރިއާ ހިމެނޭގޮތައް ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު ވިދާޅުވެއްޖެ އެވެ.

ބްލޮކް ގްރާންޓް ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލާ މުރާޖައާ ކުރަންޖެހޭ ކަމަށް ރައީސް މުއިއްޒު ވިދާޅުވެ، އެކްސްގައި ކުރެއްވި ޕޯސްޓަށް ރައްދު ދެއްވަމުން ނިޔާޒް ވިދާޅުވީ، ރައީސް މުއިއްޒުގެ ވާހަކަފުޅުން ދޭހަވަނީ، އަތޮޅު ކައުންސިލް އުވާލުމުގެ ވާހަކަ އޮއްބާލަން ދައްކަވާ ވާހަކައެއް ކަމަށާއި، ފިސްކަލް ފޯރމިއުލާގައި ގްރާންޓް ދިނުން މިހާރުވެސް ގާނޫނުގަ އޮތީ ރަށުގެ ސައިޒަށް ބަލައިގެން ކަމަށެވެ. އެހެންކަމުން ގާނޫނަށް ބަދަލުގެންނަންވަނީ އެންމެންގެ މަޝްވަރާއާ އެކު ގައި ކަމަށް ނިޔާޒް ވިދާޅުވި އެވެ.

(ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލާ މުރާޖައާ ކުރަންޖެހޭ ކަމަށް ރައީސް މުއިއްޒު ވިދާޅުވެ، އެކްސްގައި ކުރި ޕޯސްޓާއި ގުޅިގެން ރައީސް މުއިއްޒު އަށް ތާއީދުކުރާ ފަރާތްތަކުން ދަނީ މިކަން ޕްރޮމޯޓްކޮށް "ރަށަށް ބާރު" މިނަމުގައި ޕޯސްޓްތައް ޝެއަރކޮށް ރައީސް މުއިއްޒު އަށް ތައުރީފް ކުރަމުންނެ އެވެ.

ނަމަވެސް އެމްޑީޕީގެ ކުރީގެ ފިނޭންސް މިނިސްޓަރ އިބްރާހިމް އަމީރު ވެސް ވިދާޅުވެފައިވަނީ، ރައީސް މުއިއްޒު އަށް ކުރިން މިކަން އޮތް ގޮތް އެނގިވަޑައިނުގަންނަވަނީ ކަމަށް ވެދާނެ ކަމަށާއި 2020 ވަނަ އަހަރު ކައުންސިލްތައް މާލީގޮތުން ބާރުވެރިކުރުމަށް، ބްލޮކް ގްރާންޓްގެ އުސޫލުން ފައިސާ ދޭން ފެށީއްސުރެ، ބްލޮކް ގްރާންޓް ދިނުމަށް، ފިސްކަލް ފޯމިއުލާ ކަނޑައެޅުމުގައި ދެވަނައަށް އެންމެ ބޮޑަށް ރިއާޔަތްކޮށްފައިވަނީ ރަށުގެ ސައިޒަށް ކަމަށެ އެވެ. އެގޮތުން ކޮންމެ ކަމެއްގައިވެސް މިގޮތަށް އޮޅުވާލުމަށް މަސައްކަތް ކުރައްވަމުން ގެންދަވާތީ، ރައީސް މުއިއްޒުއަށް ފާޑުވިދާޅުވެ، އަމީރު ވިދާޅުވެފައިވަނީ "އަބަދު އޮޅުވާލައި މަކަރު ހަދަން އުޅުނަސް ތީ ދެން ފުކެއް ބޮޑުވަރު" ކަމަށެ އެވެ.

ރައީސް މުއިއްޒު އެކްސްގައި ވިދާޅުވީ ޤާނޫނު ނަންބަރު 7/2010 (ދިވެހިރާއްޖެހޭ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާ)ގެ ދަށުން ކައުންސިލްތަކަށް ސަރުކާރުން ދޭ ޢާންމު ހިލޭ އެހީގެ ފައިސާ (ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލާ ގައިވާ ގޮތުން އާބާދީ ކުޑަ ރަށްތަކަށް ލިބޭވަރު މަދެވެ. ނަމަވެސް، އާބާދީ ކުޑަ ނަމަވެސް، ބިމުގެ ގޮތުން ތަނަވަސް ރަށްތަކުގައި މުނިސިޕަލް މަސައްކަތް މަދެއް ނޫން ކަމަށެ އެވެ.

އެހެން ކަމުން، ބްލޮކް ގްރާންޓު ގެ ފިސްކަލް ފޯރމިއުލާ މިހާރު ކަނޑައަޅުއްވާފައިވާ ގޮތުން، އެ ކައުންސިލްތަކަށް ގެއްލުން ވާތީ ފިސްކަލް ފޯރމިއުލާ މުރާޖާކުރުމުގައި ރަށުގެ ބޮޑުމިނަށް ރިއާޔަތްކުރެވޭ ގޮތަށް ބަދަލު ކޮށް، 2026 ވަނަ އަހަރުގެ ބަޖެޓު ހުށަހަޅާއިރު މި ބަދަލާ އެކު ހުށަހެޅުމަށް ވާނީ ނިންމާފައި ކަމަށެއެވެ.

ރައީސް މުއިއްޒު މިވާހަކަތަކަށް ރައްދު ދެއްވަމުން އިދިކޮޅު ފަރާތްތަކުން ދަނީ ކުރިން މިކަން އޮތް ގޮތް ސޯޝަލް މީޑިއާގައި ހިއްސާކުރަމުންނެ އެވެ. ދިވެހިރާއްޖެހޭ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެންނަން އުޅޭ އިސްލާހާއި ގުޅިގެން އަތޮޅު ކައުންސިލްތައް އުވާލުމަށް ދެކެވެމުންދާ ވާހަކައަށް ގިނަ ބަޔަކު ދަނީ ކަންބޮޑުވުން ފާޅުކުރަމުންނެ އެވެ. އެގޮތުން ބ.އަތޮޅު ކައުންސިލުންވެސް މިކަމާއި ދެކޮޅަށް މާލޭ ގައި މުޒާހަރާ ކުރުމަށް ނިންމާފަ އެވެ.