ފްރާންސް އިން ޔުކްރެއިން ބަލިކޮށްފި

ފީފާ ވާރލްޑް ކަޕް ކޮލިފިކޭޝަންގެ ގުރޫޕް ޑީ ގައި ކުޅުނު ފުރަތަމަ މެޗުގައި ފްރާންސް އިން ޔުކްރެއިން ބަލިކޮށްފި އެވެ.

ހުކުރު ދުވަހުގެ ރޭ ކުޅުނު މެޗު ފްރާންސް އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ފްރާންސް އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 10 ވަނަ މިނެޓުގައި ފްރާންސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މައިކަލް އޮލައިސޭ އެވެ. އެ ލަނޑު ޖަހަން އޮލައިސޭ އަށް ފުރުސަތު ތަނަވަސްކޮށްދިނީ ބްރާޑްލޭ ބާކޮލާ އެވެ.

މެޗުގައި ފްރާންސް އިން ވަނީ އިތުރު ލަނޑު ޖަހަން ވެސް ފުރުސަތު ތަކެއް ތަނަވަސްކޮށްފަ އެވެ. މެޗުގައި ފްރާންސް އިން އެ ޓީމުގެ ދެ ވަނަ ލަނޑު ޖެހީ ފަހު ވަގުތުގަ އެވެ. އެގޮތުން މެޗުގެ ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށް، ފްރާންސްގެ ކެޕްޓަން ކީލިއަން އެމްބާޕޭ ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ އައުރެލިއަން ޗުއަމެނީ ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެެކެވެ.

މި މެޗުގައި އެމްބާޕޭ ޖެހި ލަނޑާ އެކު، ފްރާންސް ޤައުމީ ޓީމަށް އޭނާ ޖަހައިދިން ލަނޑުގެ އަދަދު ވަނީ 51 އަށް އަރައިފަ އެވެ. ފްރާންސް ޤައުމީ ޓީމަށް އެންމެ ގިނަ ލަނޑު ޖަހައިދީފައި ވަނީ އޮލީވިއޭ ޖިރޫޑް އެވެ. އެއީ 57 ލަނޑެކެވެ. ދެ ވަނަ އަށް އެންމެ ގިނަ ލަނޑު ޖަހާފައިވާ ތިއަރީ އޮންރީ އަދި އެމްބާޕޭ ޖަހާފައި ވަނީ 51 ލަނޑެވެ.

މެޗަށް ފަހު ވާހަކަ ދައްކަމުން ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފައި ވަނީ، މެޗުގައި ފްރާންސްގެ ކުޅުންތެރިން ދެއްކީ ރަނގަޅު ކުޅުމެއް ކަމަށެވެ. އެގޮތުން މެޗުގެ ފުރަތަމަ ހާފުގައި ވެސް ފްރާންސް އިން ރަނގަޅަށް ކުޅެފައިވާކަން ފާހަގަކޮށް އޭނާ ބުނީ، ފުރަތަމަ ހާފުގައި ފްރާންސް އަށް އިތުރު ލަނޑެއް ވެސް ޖެހުނީސް ކަަމަށެވެ.

ނަމަވެސް މެޗުގެ ވަކި ހިސާބަކުން ފްރާންސްގެ ކުޅުންތެރިންނަށް އުނދަގޫ ތަކެއް ކުރިމަތިވި ކަމަށާއި، ނަަމަވެސް، އެޓޭކު ކުރުމުގައި ކުޅުންތެރިން ރަނގަޅު މަސައްކަތެއް ކުރި ކަމަށް އޭނާ ބުންޏެވެ. އޭނާ ބުނީ ކުރިއަށް ވެސް އޮތީ މުހިންމު މެޗުތަކެއް ކަމަށާއި، އެހެންކަމުން މޮޅަކުން ކޮލިފިކޭޝަން ފެށުމަކީ ފްރާންސް އަށް އޮތް ހިތްހަމަ ޖެހުމެއް ކަމަށެވެ.

ކޮލިފިކޭޝަންގައި ދެން ފްރާންސް ނިކުންނާނީ އައިސްލެންޑާ ދެކޮޅަށެވެ.