ގިބްރޯލްޓާ އަތުން މޮޅުވެ ކްރޮއޭޝިއާ އެއް ވަނަ އަށް

ފީފާ ވޯލްޑް ކަޕް ކޮލިފިކޭޝަންގައި ގިބްރޯލްޓާއާ ދެކޮޅަށް ކުޅުނު މެޗުން މޮޅުވެ ކްރޮއޭޝިއާ އިން ގުރޫޕުގެ އެއް ވަނަ އަށް ޖެހިލައިފި އެވެ.

އާދީއްތަ ދުވަހުގެ ރޭ ކުޅުނު މެޗު ކްރޮއޭޝިއާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ކްރޮއޭޝިއާ އިން އެއް ލަނޑު ޖަހައި ލީޑު ނެގިއިރު، އަނެއް ދެ ލަނޑު އެ ޓީމުން ޖެހީ މެޗުގެ ފަހު ހާފުގަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ކްރޮއޭޝިއާ އަށް ލީޑު ނަގައިދިނީ ޓޯނީ ފްރުކް އެވެ. އެ ލަނޑު އޭނާ ޖެހީ މާކޯ ޕަސަލިޗް ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ކްރޮއޭޝިއާ އަށް ލީޑު ފުޅާ ކޮށްދޭން ލޮވްރޯ މަޔާ ފޮނުވާލި ޕެނަލްޓީ ކާމިޔާބެއް ނުވި އެވެ. އޭގެ ފަހުން މެޗުގެ 78 ވަނަ މިނެޓުގައި ކްރޮއޭޝިއާގެ ދެ ވަނަ ލަނޑު ޖެހީ ލޫކާ ސުސިޗް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މެޗުގައި ކްރޮއޭޝިއާ އިން އެ ޓީމުގެ ތިން ވަނަ ލަނޑު ޖެހީ މެޗުގެ ފަހު ވަގުތުގަ އެވެ. މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގައި އެ ލަނޑު ޖެހީ މާޓިން އެރްލިކް އެވެ. އެއީ މަޔާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން ކްރޮއޭޝިއާގެ ކޯޗު ލަކްޓޯ ޑަލިކް ބުނެފައި ވަނީ، މެޗުގައި އެ ޓީމުގެ ކުޅުންތެރިން ރަނގަޅު ކުޅުމެއް ދެއްކި ކަމަށެވެ. ޚާއްސަކޮށް ޑިފެންސްގައި ރަނގަޅަށް ކުޅެ، ލިބުނު ފުރުސަތުތައް ރަނގަޅަށް ނިންމާފައިވާ ކަމަށް އޭނާ ވަނީ ފާހަގަ ކޮށްފަ އެވެ. ޑަލިކް ބުނީ އެ މެޗުން ލިބުނު މޮޅާ މެދު އޭނާ ހުރީ ވަރަށް ބޮަޑަށް ހިތްހަަމަ ޖެހިފައި ކަމަށެވެ.

މޮޅާއެކު ކްރޮއޭޝިއާ އެއް ވަަނައިގައި އޮތީ ހަ މެޗުން 16 ޕޮއިންޓާ އެކު އެވެ. އެއީ ދެ ވަނައިގައި އޮތް ޗެކް ރިޕަބްްލިކް އަށް ވުރެ އެއް މެޗު މަދުން ކުޅެގެންނެވެ. ދެ ވަނައިގައި އެ ޓީމު އޮތީ ހަތް މެޗުން 13 ޕޮއިންޓާ އެކު އެވެ.