ނޮދާން އަޔަލެންޑް އަތުން ޖަރުމަނު މޮޅުވެއްޖެ

ފީފާ ވޯލްޑް ކަޕް ކޮލިފިކޭޝަންގައި ނޮދާން އަލަޔެންޑްއާ ދެކޮޅަށް ކުޅުނު މެޗުން ޖަރުމަނު މޮޅުވެއްޖެ އެވެ.

ހޯމަ ދުވަހުގެ ރޭ ކުޅުނު މެޗު ޖަރުމަނުން ކާމިޔާބު ކުރީ 1-0 އިންނެވެ. މެޗުގައި ޖަރުމަނުން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. މެޗުގައި ޖަރުމަނުން ވަނީ އިތުރު ލަނޑު ޖަހަން ވެސް ފުރުސަތު ތަނަވަސްކޮށްފަ އެވެ.

މެޗު ފަށައިގެން 14 ވަނަ މިނެޓުގައި ނޮދާން އަޔަލެންޑް އިން ވަނީ ލަނޑު ޖަހައިފަ އެވެ. އެ ޓީމުގެ ޕޮޑީ މެކް ނަޔާ ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ރެފްރީ ވަނީ ބަލައި ނުގަންނަން ނިންމައިފަ އެވެ.

އޭގެ ފަހުން މެޗުގެ 31 ވަނަ މިނެޓުގައި ޖަރުމަނުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ނިކް ވޯލްޓްމޭޑް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޑޭވިޑް ރައުމް އެވެ.

މެޗަށް ފަހު ވާހަކަ ދައްކަމުން ޖަރުމަނުގެ ކޯޗު ހޫލިއަން ނާގަލްސްމަން ވަނީ މީގެ ކުރިން އޭނާ އަށް ދެއްކުނު ވާހަކަ އަކަށް މައާފަށް އެދިފަ އެވެ. އެގޮތުން ނޮދާން އަޔަލެންޑް އިން ދިގު ބޯޅަ ޖަހައިގެން ކުޅޭ ކަމަށް ބުނެ ދައްކާފައިވާ ވާހަކަ އަށް ނާގަލްސްމަން ވަނީ މައާފަށް އެދިފަ އެވެ.

އޭނާ ބުނީ އެއީ އެއްވެސް ޙާލެއްގައި އިޙުތިރާމް ކުޑަ ކުރުމުގެ ނިޔަތެއްގައި ދެއްކި ވާހަކަ އެއް ނޫން ކަމަށާއި، އެއީ އެ ޓީމުން ކުޅުން ރާވާފައި އޮތް ގޮތުން ޖަރުމަނަށް ކުރިމަތިލާން ޖެހުނު އުނދަގޫތައް ފާހަގަ ކުރަން ދެއްކި ވާހަކައެއް ކަމަށެވެ. އެކަން ފާހަގަކޮށް ނާގަލްސްމަން ބުނީ، ކޮންމެ ޓީމަކުން ވެސް އެކި މެޗުތަކަށް ރާވާނީ އެކި ކަހަލަ އުކުޅު ކަމަށެވެ.

މީގެ އިތުރުން މެޗުން މޮޅުވުމުން ހިތްހަމަ ޖެހިފައި ހުރި ކަމަށާއި، ޖަރުމަނުގެ ކުޅުންތެރިން ކުރި މަސައްކަތް ބަލައި ގަންނަ ކަމަށް ނާގަލްސްމަން ބުންޏެވެ. ހަމަ އެހެންމެ، ކުރިއަށް ހުރި ތަނުގައި ރަނގަޅު ކުރަން ހުރި ކަންކަމަށް ވެސް ޚާއްސަ ސަމާލު ކަމެއް ދޭނެ ކަމުގައި އޭނާ ވަނީ ބުނެފަ އެވެ.

މޮޅާއެކު މި ގުރޫޕުގެ އެއް ވަނައިގައި ޖަރުމަނު އޮތީ މިހާތަނަށް ކުޅުނު ހަތަރު މެޗުން ނުވަ ޕޮއިންޓާ އެކު އެވެ. ދެ ވަނައިގައި އޮތް ސްލޮވޭކިއާ އަށް ވެސް ހަތަރު މެޗުން ލިބެނީ ނުވަ ޕޮއިންޓެވެ. ކޮލިފިކޭޝަންގައި ޖަރުމަނަށް ދެން އޮންނާނީ ލަގްޒަމްބާގްއާ ދެކޮޅަށް ކުޅޭ މެޗެވެ.