ފިންލޭންޑް އަތުން ނެދަލެންޑްސް މޮޅުވެއްޖެ

މިހާރު ކުރިއަށްދާ ފީފާ ވޯލްޑް ކަޕް ކޮލިފިކޭޝަންގައި ފިންލެންޑާ ދެކޮޅަށް ކުޅުނު މެޗުން ނެދަލެންޑްސް މޮޅުވެއްޖެ އެވެ.

އާދީއްތަ ދުވަހުގެ ރޭ ކުޅުނު މެޗު ނެދަލެންޑްސް އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ނެދަލެންޑްސް އިން ތިން ލަނޑު ޖެހިއިރު، އަނެއް ލަނޑު ޖެހީ ފަހު ހާފުގަ އެވެ.

މެޗު ފަށައިގެން އަށް ވަނަ މިނެޓުގައި ނެދަލެންޑްސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަަހައިދިނީ ޑޮންޔެލް މާލެން އެވެ. އެއީ މެމްޕިސް ޑިޕާއީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ 17 ވަނަ މިނެޓުގައި ނެދަލެންޑްސްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ވާޖިން ވެން ޑައިކް އެވެ. އެ ލަނޑު ޖަހަން ވެން ޑައިކް އަށް ވެސް ފުރުސަތު ތަނަވަސްކޮށްދިނީ ޑިޕާއީ އެވެ.

މެޗުގެ ފުރަތަމަ ހާފު ނިމުމުގެ ކުރިން ނެދަލެންޑްސް އިން ވަނީ ތިން ވަނަ ލަނޑެއް ޖަހައި އިތުރަށް ލީޑު ފުޅާ ކޮށްފަ އެވެ. ފުރަތަމަ ހާފުގެ 38 ވަނަ މިނެޓުގައި އެ ޓީމަށް ލިބުނު ޕެނަލްޓީ ކާމިޔާބުކޮށް އެ ލަނޑު ޖެހީ ޑިޕާއީ އެވެ.

މެޗުގައި ނެދަލެންޑްސްގެ ހަތަރު ވަނަ ލަނޑު ކޯޑީ ގަކްޕޯ ޖެހީ މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށެވެ. އެއީ ޒަވީ ސިމޮންސް ތަނަވަސްކޮށްދިން ފުރުސަތެއްގައި ގަކްޕޯ ޖެހި ލަނޑެކެވެ.

މޮޅާއެކު ނެދަލެންޑްސް އޮތީ މި ގުރޫޕުގެ އެއް ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ހަ މެޗުން 16 ޕޮއިންޓާ އެކު އެވެ. ދެ ވަނައިގައި އޮތް ޕޮލެންޑަށް ހަ މެޗުން ލިބެނީ 13 ޕޮއިންޓެވެ. ކޮލިފިކޭޝަންގައި ނެދަލެންޑްސް އަށް ދެން އޮންނާނީ ޕޮލެންޑާ ދެކޮޅަށް ކުޅޭ މެޗެވެ.