ފުރިހަމަ ރެކޯޑަކާ އެކު އިންގްލެންޑް ވާރލްޑް ކަޕަށް ކޮލިފައިވެއްޖެ

ފީފާ ވާރލްޑް ކަޕް ކޮލިފިކޭޝަންގައި ލަޓްވިއާއާ ދެކޮޅަށް ކުޅުނު މެޗުން ވެސް މޮޅުވެ، އިންގްލެންޑުން އަންނަ އަހަރުގެ ވޯލްޑް ކަޕަށް ކޮލިފައިވެއްޖެ އެވެ.

އަންގާރަ ދުވަހުގެ ރޭ ލަޓްވިއާއާ ދެކޮޅަށް ކުޅުނު މެޗު އިންގްލެންޑުން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި އިންގްލެންޑުން ތިން ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ފަހު ހާފުގަ އެވެ.

މެޗު ފަށައިގެން 26 ވަނަ މިނެޓުގަައި އިންގްލެންޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެންތަނީ ގޯޑަން އެވެ. އެއީ ޖޯންސް ސްޓޯންސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން ފުރަތަމަ ހާފުގެ 44 ވަނަ މިނެޓުގައި އިންގްލެންޑުގެ ކެޕްޓަން ހެރީ ކޭން ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފުގެ އިތުރު ވަގުތުގައި އިންގްލެންޑަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކުރީ ވެސް ކޭން އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު އިންގްލެންޑުގެ ހަތަރު ވަނަ ލަނޑަކީ ލަޓްވިއާގެ ކުޅުންތެރިޔެއްް އަތުން ބައި ކޮޅަަށް ވަތް ލަނޑެކެވެ. މެޗުގެ 58 ވަނަ މިނެޓުގައި ލަޓްވިއާގެ މަކްސިމްސް ޓޮނިސެވްސް އަތުން ވަނީ ބައި ކޮޅަށް ލަނޑެއް ވަދެފަ އެވެ.

މެޗުގައި އިންގްލެންޑުގެ ހަތަރު ވަނަ ލަނޑު ޖެހީ އެބެރެޗީ އެޒީ އެވެ. މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް އޭނާ އެ ލަނޑު ޖެހީ ޖެރޮޑް ބޮވެން ތަނަވަސްކޮށްދިން ފުރުސަތެއްގަ އެވެ. މެޗުގައި މި ދެ ކުޅުންތެރިން ވެސް ކުޅެން ނިކުމެފައި ވަނީ ބަދަލު ކުޅުންތެރިންގެ ގޮތުގަ އެވެ.

މޮޅާއެކު އިންގްލެންޑުން ވޯލްޑް ކަޕަށް ކޮލިފައިވެފައިވާއިރު، މިހާތަނަށް ކޮލިފިކޭޝަންގައި ކުޅުނު ހަ މެޗުން ވެސް އެ ޓީމު ވަނީ މޮޅުވެފަ އެވެ. ތޯމަސް ޓުޗެލްގެ އިރުޝާދުގެ ދަށުން ރަނގަޅު ނަތީޖާ ތަކެއް އިންގްލެންޑުން ނެރެމުން އަންނައިރު، ހަ މެޗުން މޮޅުވެ އެއް ވަނައިގައި އެ ޓީމު އޮތީ 18 ޕޮއިންޓާ އެކު އެވެ.

މެޗަށް ފަހު ވާހަކަ ދައްކަމުން އިންގްލެންޑުގެ ކޯޗު ޓުޗެލް ބުނެފައި ވަނީ ވޯލްޑް ކަޕަށް ކޮލިފައިވުމުން ޓީމުގައި މިހާރު އޮތީ ވަރަށް ރަނގަޅު ރޫޙެއް ކަަމަށެވެ. ޚާއްސަކޮށް މި ވަގުތަކީ އިންގްލެންޑަށް ވަރަށް އުފާވެރި ވަގުތަކަަށްވާއިރު، ކުޅުންތެރިން ވެސް އެކަމުގެ އުފާ ވަރަށް ބޮޑަށް ފާހަގަ ކުރާ ކަމަށް އޭނާ ބުންޏެވެ.

އޭނާ ބުނީ ލަޓްވިއާ އަތުން މޮޅުވާނެ ކަމުގެ އުންމީދު ކުރިން ވެސް އޮތް ކަމަށާއި، ނަމަވެސް މެޗުގެ ނަތީޖާ އަކީ މާ ބޮޑަށް ހިތްހަމަ ޖެހޭ ނަތީޖާއެއް ކަމަށެވެ. ޚާއްސަކޮށް ކޮލިފިކޭޝަންގައި ކުޅުނު ހަ މެޗުން ވެސް މޮޅުވެ، ވޯލްޑް ކަޕަށް ކޮލިފައިވުމަކީ އޭނާ އަށް ވެސް، އަދި ކުޅުންތެރިންނަށް ވެސް ޚާއްސަ އުފަލެއް ކަމަށް ޓުޗެލް ވަނީ ބުނެފަ އެވެ.