ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދުގެ ވިޔަފާރިތަކާއި މުދާ ރާއްޖެއިން ބޭރުގައި ހުރިކަމަށް ބުނާ ރިޕޯޓުގެ މައުލޫމާތު ހިއްސާ ކުރެވެން ނެތް ކަމަށް ފުލުހުން ބުނެފި އެވެ.

އެ ރިޕޯޓުގެ މައުލޫމާތު ހޯދުމަށް ސައީދުގެ ފަރާތުން ފުލުސް އޮފީހުގައި އެދުމުން ބުނީ, ކަމާ ގުޅޭ އިދާރާތައް ފިޔަވައި އެހެން ފަރާތްތަކާ މި ރިޕޯޓާ ގުޅޭ މައުލޫމާތު ހިއްސާ ކުރެވެން ނެތް ކަމުގައެވެ.

ފުލުހުން ތައްޔާރުކުރި މި ރިޕޯޓްގެ މައުލޫމާތު ހިއްސާ ކުރުމަށް އެދި ސަޢީދު ހުށަހަޅުއްވާފައިވަނީ، އޭނާ އަކީ ރާއްޖެއިން ބޭރުގައި ދިރިއުޅުމުގެ މާލީ ތަނަވަސްކަން ލިބިފައިވާ ފަރާތެއްކަމަށާއި، އޭނާގެ ވިޔަފާރިތަކާއި މުދާ ރާއްޖެއިން ބޭރުގައި ހުރި ކަމަށް ބަޔާންކޮށްފައިވާ އިންޓެލިޖެންސް ރިޕޯޓެއްގެ މައްޗަށް ބިނާކޮށް، ހިތުގެ ބައްޔަށް ފަރުވާ ހޯދުމަށް އިންޑިއާއަށް ދަތުރުކުރުމަށް ބޭނުންވާ ޓްރެވަލް ޑޮކިއުމަންޓް ދޫކުރެވެން ނެތް ކަމަށް ކްރިމިނަލް ކޯޓުން ބުނެފައިވާތީ އެވެ.

ސައީދުގެ ފަރާތުން ފުލުހަށް ހުށަހެޅި ސިޓީގައި ބުނެފައިވަނީ، ފުލުހުންގެ ފަރާތުން އެފަދަ ރިޕޯޓެއް ތައްޔާރުކޮށް ހުށަހަޅައިފައިވާނަމަ އެއީ ކަނޑައެޅިގެން ހަގީގަތާ ހިލާފު ވާހަކަތަކެއް ހިމެނޭ ރިޕޯޓެއް ކަމަށެވެ. އަދި ސަޢީދުގެ އެއްވެސް މުދަލެއް ވިޔަފާރިއެއް އަދި ރާއްޖެއިން ބޭރުގައި ރައްކާކޮށްފައިވާ އެއްވެސް ފައިސާއެއް ވެސް ނުހުންނާނެ ކަމަށް ދަންނަވަނީ އިޚުލާސްތެރިކަމާ ތެދުވެރިކަމާއެކުގައި ކަމަށެެވެ. ރާއްޖެއިން ބޭރުގައި ސަޢީދުގެ މުދަލެއް ހުރި ނަމަ އެ މުދަލެއް އޭނާގެ މިލްކިއްޔާތަށް ވެއްދުމަށްޓަކައި، ވީ އެންމެ އަވަސް ފުރުސަތެއްގައި އެ މުދަލަކާ ވިޔަފާރީގެ ތަފްސީލު ދެއްވުމަށް ސަޢީދު ވަނީ އެދިވަޑައިގެންފެއިވެ އެވެ.

މީގެ އިތުރުން އެ ސިޓީގައި ބުނެފައިވަނީ ކަނޑައެޅިގެން ހަގީގަތާ ޚިލާފު ދޮގު ވާހަކަތަކެއްގެ މައްޗަށް ބިނާވެތިބެ، ރާއްޖޭގެ ޤާނޫނު އަސާސީން އޭނާއަށް ލިބިދީފައިވާ ބޭސްފަރުވާ ކުރުމުގެ ހައްގާއި ދިރިހުރުމުގެ ހައްގުން، ފުލުހުންގެ މުއައްސަސާއިން ފާޅުގައި ހުރަސްއަޅަމުންދާ ކަމަށެވެ. އެފަދަ ހަގީގަތާ ޚިލާފު ދޮގުވާހަކަތަކެއް ހިމެނޭ ރިޕޯޓެއް ފުލުހުންގެ މުއައްސަސާއިން ތައްޔާރުކޮށް ޕީޖީއަށް ހުށަހަޅާފައިވާނަމަ، އެކަން އިސްލާހުކޮށް އޭނާ އާއި ގުޅުން ހުރި ސައްޚަ މައުލޫމާތު ހޯއްދެވުމަށްފަހު ކަމާ ގުޅުން ހުރި އިދާރާތަކަށް ހިއްސާ ކުރުމަށް ވަނީ އެދިފަ އެވެ.

ސަޢީދުގެ ޕާސްޕޯޓް ހިފަހައްޓާފައިވަނީ 2024 ވަނަ އަހަރުގެ އޮކްޓޯބަރު މަހުގެ 19 ވަނަ ދުވަހުއެވެ. ސަޢީދަކީ ހިތުގެ ބައްޔަށް އިންޑިއާއިން ފަރުވާ ހޯދާފައިވާ އަދި މިހާރުވެސް ޑޮކްޓަރުގެ ލަފަޔާއި އިރުޝާދުގެ މަތިން ބޭސް ނެގުމުގެ ކަންކަމާ ސިއްޚީ ކަންކަމުގައި ލަފާ ހޯދަމުންދާ ފަރާތެކެވެ.

މިހަރުގެ ޖޫން މަހުގައި ސަޢީދުގެ ފަރާތުން ބޭސްފަރުވާއަށް ފުރޭނެ އިންތިޒާމް ހަމަޖައްސަވައި ދެއްވުމަށް އެދި ޕްރޮސެކިއުޓަރ ޖެނެރަލް (ޕީޖީ) އޮފީހުގައި އެދުމުން، ޕީޖީ އިން ވަނީ ހުށަހަޅާފައިވާ މެޑިކަލް ލިޔުންތަކަށް ރިޔާއަތްކޮށް ރާއްޖެއިން ބޭރަށް ބޭސްފަރުވާއަށް ދަތުރުކުރުމުގެ ޟަރޫރަތެއް އޮތްކަމަށް އެ އޮފީހުން ގަބޫލުކުރާ ކަމަށް ބުނެފައިވެއެވެ. އަދި ސަޢީދުގެ ފަރާތުން ޕާސްޕޯޓް ހިފެހެއްޓި އަމުރު މުރާޖާޢާ ކުރުމަށް އެދޭ ހާލަތުގައި 15 ދުވަހުގެ މުއްދަތަށް ޓްރެވަލް ޑޮކިއުމަންޓެއް ދޫކުރުމަށް އެ އޮފީހުގެ އިއުތިރާޒެއް ނެތް ކަމަށް ކްރިމިނަލް ކޯޓުގައި ދަންނަވާނެ ކަމަށް ވެސް ޕީޖީ އޮފީހުން ވަނީ ބުނެފަ އެވެ.

މިކަމާ ގުޅޭގޮތުން އޮގަސްޓު މަހުގެ 5 ވަނަ ދުވަހު ބޭއްވި އަޑު އެހުމުގައި، ފުލުހުންގެ ފަރާތުން އިންޓެލިޖެންސް ރިޕޯޓެއް ޕީޖީއަށް ލިބިފައިވާ ކަމަށާއި އަދި އެ ރިޕޯޓް ޝަރީއަތަށް ހުށަހަޅާފައިވާ ކަމަށް ޕީޖީން ވަނީ ބުނެފަ އެވެ. މި ރިޕޯޓުގެ މައްޗަށް ބިނާކޮށް ޝަރީއަތުން ވަނީ ޓްރެވެލް ޑޮކިއުމަންޓެއް ވެސް ދޫކުރެވެން ނެތް ކަމުގައި ނިންމާފަ އެވެ.