އާގިލް މަރާލި ކަމަށް ސާބިތުވެ ހަމްދޫން މަރަން ހުކުމް ކޮށްފި
އާގިލް މަރާލީ 2018 އޮގަސްޓް 31 ވަނަ ދުވަހުގެ ރޭ އެމްއެމްއޭ ސަރަހައްދަށް ދަތުރުކުރި ލޯންޗް ކައިރިކުރި ތަނުން ހަމަލާދީގެން
އާގިލްގެ މަރުގެ މައްސަލައިގައި ދައުވާ އުފުލި ތިން މީހުން
ގދ. ފަރެސްމާތޮޑާ، ކޮކާ، އިބްރާހީމް އާގިލް (18އ) މަރާލި މައްސަލައިގައި ދައުވާ އުފުލާފައިވާ ލ. ފޮނަދޫ ހިޔާ ހަމްދޫން ހަމްޒަތު މަރަން ހުކުމް ކޮށްފި އެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓްމަހުގެ 31 ވަނަ ދުވަހުގެ ރޭ އެމް.އެމް.އޭ ސަރަޙައްދަށް އާގިލް ދަތުރުކުރި ލޯންޗް ކައިރިކުރި ތަނުންނެވެ. އޭނާ މަރާލީ ވ. ފެލިދޫން މާލެ އައި ލޯންޗަކުން އެއް ނަމްބަރު ފާލަމަށް ފޭބުމާއި އެކު ހަމަލާ ދީގެންނެވެ. އޭނާ މަރާލި އިރު އޭނާ އަށް 19 އަަހަރެވެ.
މި މައްސަލައިގައި ކުށް ސާބިތުވެ، ހަމްޒަތު މަރަން ޙުކުމްކޮށްފައި ވަނީ އާދިއްތަ ދުވަހު އެވެ. ކްރިމިނަލް ކޯޓުން އެގޮތަށް ޙުކުމް ކޮށްފައި ވަނީ އާގިލްގެ ވާރިސުން މަރަަށް މަރު ހިފަން އެދޭތީ އެވެ.
ދައުލަތުން ހަމްދޫންގެ މައްޗަށް ޙުކުމް ކޮށްފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އެވެ.
މި މައްސަލައިގައި ދައުލަތުން ދެން ދައުވާ ކޮށްފައި ވަނީ ސ. ހިތަދޫ، ސްވޭހުހީނާގޭ އަލީ މިޖުވާދު މާލިކްގެ މައްޗަށެވެ. އާގިލް މަރަން އެހީތެރިވިކަމުގެ ކުށުގެ ދައުވާ، ހއ. ދިއްދޫ ސްނޯބޯޑް އިބްރާހިމް ވިޝާމްގެ މައްޗަށް ދައުލަތުން ކުރި ނަމަވެސް މި މައްސަލައިގައި ދެން ދައުވާ ކުރި ދެ މީހުންގެ މައްޗަށް ކުށް ސާބިތު ވެފަ އެއް ނުވެ އެވެ.
ފުލުހުން މީގެ ކުރިން ބުނެފައި ވަނީ އެމްއެމްއޭ ކައިރީގައި މަރާލި އިބްރާހިމް އާގިލް އާއި އޮޓޯ ގަރާޖު ކައިރީގައި މަރާލި އިސްމާއިލް ޝައްފާން މަރާލީ ބަދަލު ހިފުމުގެ ގޮތުން ކަމަށެވެ.
