ފަލަސްތީނުގެ ދައުލަތް ބަލައިގަތުމަށް ކުރެވޭ މަސައްކަތް ހުއްޓުވަން އިސްރާއީލަށް ކުރެވޭނެ އެއް ކަމެއް ވެސް ނެތް: ފަރަންސޭސި ރައީސް

ފަލަސްތީނުގެ ދައުލަތް ބަލައިގަތުން ހުއްޓުވުމަށް އިސްރާއީލަށް ކުރެވޭނެ އެއް ކަމެއް ވެސް ނެތް ކަމަށް ފްރާންސްގެ ރައީސް އެމެނުއެލް މެކްރޯން އަންގާރަ ދުވަހު ވިދާޅުވެއްޖެ އެވެ.

އޭނާ އިތުރަށް ވިދާޅުވީ، ޣައްޒާ ގައި ހިންގާ ހަމަލާތައް ފުޅާ ކޮށްގެން ނުވަތަ އިތުރު ފަލަސްތީނު ސަރަޙައްދުތައް ހިސޯރު ކޮށްގެން ފަލަސްތީނު ދައުލަތެއް ބަލައިގަތުމުގެ މަސައްކަތް އިސްރާއީލަށް ހުއްޓުވޭނެ ކަމަށް ދެކެވަޑައި ނުގަންނަވާ ކަމަށެވެ.

ނިއުޔޯކްގައި ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގައި ފަލަސްތީނު ދައުލަތެއް ބަލައިގަންނާނެ ކަމަށް ފްރާންސް އާއެކު އެތައް ޤައުމަކުން ވަނީ އިޢުލާނު ކޮށްފައެވެ. އެންމެ ފަހުން ބެލްޖިއަމް ވެސް ވަނީ މިކަމަށް ތާއީދު ކުރާނެ ކަމަށް ބުނެފައެވެ.

"އަޅުގަނޑުމެން (ސަޢޫދީ) ވަލީއަހުދާއެކު އުފައްދާފައިވާ އިއްތިހާދުން ކުރަމުން ދާ މަސައްކަތް، އެއްވެސް ހަމަލާ އަކުން، ހިސޯރު ކުރުމުގެ މަސައްކަތަކުން ނުވަތަ މީހުން ހިޖުރަކުރުވުމުގެ މަސައްކަތަކުން ހުއްޓުވޭނެ ކަމެއް ނޫން - މިހާރު އެތައް ބައިވެރިންނެއް މި މަސައްކަތާ ގުޅިފައިވޭ،" މެކްރޯން ސަޢޫދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އާ ވާހަކަ ދެއްކެވުމަށް ފަހު އެކްސް ގައި ވިދާޅުވިއެވެ.

މެކްރޯން ވިދާޅުވީ އޭނާ އާއި ވަލީއަހުދު "ސެޕްޓެމްބަރު 22 ގައި ނިއުޔޯކްގައި ބޭއްވޭ ދެ ދައުލަތުގެ ހައްލާ ބެހޭ ޖަލްސާގެ ރިޔާސަތު ދެފަރާތުން އެކުގައި ބަލަހައްޓަވާނެ" ކަމަށެވެ.

"އަޅުގަނޑުމެންގެ މަޤްޞަދު ސާފު: ދެ ދައުލަތުގެ ހައްލަށް ވީހާ ވެސް ފުޅާ ބައިނަލްއަޤްވާމީ ތާއީދެއް ހޯދުން - އިސްރާއީލުގެ ރައްޔިތުންނާއި ފަލަސްތީނުންގެ ޙައްގު އުންމީދުތައް ޙާޞިލު ކުރެވޭނެ ހަމައެކަނި ގޮތް މިއީ،" ފްރާންސްގެ ވެރިޔާ ވިދާޅުވިއެވެ.

"މިކަމަށްޓަކައި ދާއިމީކޮށް ހަނގުރާމަ ހުއްޓުން، ހުރިހާ ރަހީނުން ދޫކޮށްލުން، ޣައްޒާގެ ރައްޔިތުންނަށް ފުޅާ ދާއިރާއެއްގައި އިންސާނީ އެހީ ފޯރުކޮށްދިނުން، އަދި ޣައްޒާ ގައި ސްޓެބިލައިޒޭޝަން މިޝަނެއް ޤާއިމުކުރުން ބޭނުން ވާނެ،" ކަމަށް މެކްރޯން ވިދާޅުވިއެވެ.

"އަޅުގަނޑުމެން އިތުރަށް މަސައްކަތް މި ކުރަނީ، ހަމާސް އަތުން ހަތިޔާރު އަތުލައި، ޣައްޒާގެ ވެރިކަމަކުން ދުރުކޮށް، ފަލަސްތީނު އޮތޯރިޓީ އިޞްލާޙުކޮށް ވަރުގަދަކޮށް، އަދި ޣައްޒާ ސްޓްރިޕް ފުރިހަމަ އަށް އަލުން ބިނާ ކުރުމަށް." އޭނާ ވިދާޅުވިއެވެ.

ކުރިއަށް އޮތް އދ. ގެ އާންމު މަޖިލީހަށް ފަލަސްތީނު އޮފިޝަލުންނަށް ވީސާ ނުދިނުމަށް އެމެރިކާ އިން ނިންމި ނިންމުމަކީ "ބަލައިގަނެވޭނެ ކަމެއް ނޫން" ކަމަށާއި މިކަން ބަދަލު ކުރަން ޖެހޭ ކަމަށް ވެސް މެކްރޯން ވިދާޅުވިއެވެ.