ކޮންސްޓްރަކްޝަން އިންޑަސްޓްރީ ފޯރަމް 2025 (ސީ.އައި.އެފް 25) ގެ 3 ވަނަ އެޑިޝަން ކާމިޔާބު ކަމާއި އެކު ނިންމާލައިފި އެވެ.

މި ފޯރަމް ކުރިޔަށް ދިޔައީ ހޯމަ ދުވަހު ހެނދުނު 9:30 އިން މެންދުރު 12:00 އަށް ހޮޓެލް ޖެން ގައި އެވެ.

މި ފޯރަމްގައި އިމާރާތްކުރުމުގެ ދާއިރާގެ އިސް ފަރާތްތަކާއި، ސަރުކާރުގެ އިދާރާތަކާއި އަދި އަމިއްލަ ސެކްޓަރގެ ތަޖުރިބާކާރުން ބައިވެރިވިއެވެ.

މެޑިއަމް އިވެންޓްސް ޕްރައިވެޓް ލިމިޓެޑުން އިންތިޒާމްކޮށްގެން ބޭއްވުނު މި ފޯރަމްގައި 4 ޕެނަލް ޑިސްކަޝަން އެއް ވަނީ ކުރިޔަށް ގެންގޮސްފަ އެވެ.

މީގެ ތެރޭގައި މާލީ ސަލާމަތްތެރިކަމާއި ދެމެހެއްޓެނިވިކަން ހިމެނޭއިރު، އޭގެ ތެރޭގައި މަސައްކަތު ބާޒާރުގައި ހުރި ގޮންޖެހުންތަކާއި ސިޔާސަތުތަކަށް ހުރި ހުރަސްތަކާއި އަންހެނުން އިމާރާތްކުރުމުގެ ދާއިރާގައި އަދި ރިއަލް އެސްޓޭޓް އަދި ރީޓެއިލް ކޮންސްޓްރަކްޝަންގެ މާރކެޓް ބަދަލުވަމުންދާ ގޮތްތައް ހިމެނެއެވެ.

މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީން ބުނީ މި ފޯރަމަކީ ރާއްޖޭގެ އިމާރާތްކުރުމުގެ ސިނާއަތަށް އައު ހިތްވަރަކާއި އުއްމީދުތަކެއް ގެނެސްދިން ފޯރަމެއް ކަމަށެވެ.

މި ފޯރަމްގައި ފޯސައިޓް ސަރވޭސް، އޫރީދޫ ބިޒްނަސް އަދި އެލައިޑް އިންޝުއަރެންސް ކުންފުނިން ޚާއްސަ ޕްރެޒެންޓޭޝަންތަކެއް ވަނީ ހުށަހަޅާފަ އެވެ.

މި ޕްރެޒެންޓޭޝަންތަކުގައި އިމާރާތްކުރުމުގެ ދާއިރާއަށް އަންނަމުންދާ އައު ބަދަލުތަކާއި ކުރިއެރުންތައް އަދި ޓެކްނޮލޮޖީގެ ބޭނުން ހިފުމާއި، އަދި ކުރިމަގުގެ ޓްރެންޑްތަކާ ބެހޭ މަޢުލޫމާތު މި ފޯރަމްގައި ހިއްސާކުރި އެވެ.

މި ފޯރަމްގެ އޮފިޝަލް އިންޝުއަރެންސް ޕާޓްނަރަކީ އެލައިޑް އިންޝުއަރެންސް ކުންފުންޏެވެ. އަދި އޮފިޝަލް ޑިޖިޓަލް ޕާޓްނަރަކީ އޫރީދޫ މޯލްޑިވްސްއެވެ. ޕްރިންޓް ލެބް ކްރިއޭޓިވްއަކީ މި ފޯރަމްގެ ގޯލްޑް ސްޕޮންސަރއެވެ.