ރައީސް ޑރ.މުހައްމަދު މުއިއްޒުގެ މި ސަރުކާރުން ދުރާލައި ރާވައިގެން ހީލަތްތެރިކަމާއި އެކު މީޑިއާ ނެތިކޮށްލައި ޚިޔާލު ފާޅުކުުރުމުގެ މިނިވަކަން ނިގުޅައިގަތުމަށް ދަނީ ކެނޑިނޭޅި މަސައްކަތް ކުރަމުންނެވެ.

ރައީސް މުއިއްޒުގެ އޯޑަރަށް މީޑިއާ ކޮންޓްރޯލް ކޮށް، ތަޅުއެޅުވުމަށް ބަންޑާރަ ނައިބު ފަރުމާކޮށް، މިނިވަން އެހެން ނަމަވެސް ސަރުކާރާ ގުޅުން ބޮޑު، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު މެދުވެރިކޮށް މީޑިއާ ކޮންޓްރޯލް ކުރުމަށް ބިލެއް ހުށަހަޅުއްވައިގެންނެވެ.

މި ބިލުން މޯލްޑިވްސް މިޑިއާ އެންޑް ބްރޯޑްކާސްޓިން ކޮމިޝަނެއް އުފެއްދުމާއި ކޮމިޝަންގައި ރައީސް އައްޔަންކުރައްވާ ތިން މެންބަރުން ތިއްބެވުމާއި އެ ކޮމިޝަންގެ ރައީސް އައްޔަންކުރައްވާނީ ވެސް ރައީސް ކަމުގައި ވަނީ ބުނެފަ އެވެ.

މީގެ އިތުރުން ކޮމިޝަނުން އަންގާ ކަމެއް އިސްލާހުނުކޮށްފި ނަމަ 5،000 އާއި 25،000 ރުފިޔާއާ ދެމެދުގެ ޖޫރިމަނާއެއް ކުރުމާއި ގާނޫނާ ހިލާފު ކަމެއް ކޮށްފިނަމަ 100،000 ރުފިޔާއިން ޖޫރިމަނާކުރެވުމާއި މައްސަލައެއް ބަލަން ފަށައި ވަގުތީ ގޮތުން ރަޖިސްޓްރީ ބާތިލުކުރުމުގެ ބާރު ވެސް މި ބިލުން ލިބެ އެވެ.

ކޯޓު މަރުހަލާ ނުނިމެނީސް، ނޫހުގެ ރަޖިސްޓްރީ ބާތިލުކުރެވުމާއި ނޫސްތަކުގެ ވެބްސައިޓް ބްލޮކްކޮށް، ޓިވީ ބްރޯޑްކާސްޓް ހުއްޓުވުމުގެ ބާރު ވެސް މި ލިބުން ލިބެ އެވެ.

މިއީ ރާއްޖޭގައި އޮތް މީޑިއާތައް މުށުތެރެއަށް ލުމަށް ރައީސް މުއިއްޒު ކުރައްވާ ހަޑިމުޑުދާރު އަމަލެއް ކަމާއި މެދު ޝައްކެއް ކުރާނޭ ހަމަ އެކަކު ވެސް މިއަދު ނެތެވެ. މިކަމުން ދޭހަވަނީ ރައީސް މުއިއްޒަކީ ހުދުމުހުތާރު ވެރިޔެއް ކަމެވެ.

އެމަނިކުފާނާ ދެކޮޅަށް ހިޔާލެއް ފާޅު ކުރުމަކީ ބަލައިގަނެވޭ ކަމަކަށް ނުވެ އެވެ. އެމަނިކުފާނު އެންމެ ބޮޑަށް ބިރުގަންނަނީ، އެމަނިކުފާނާއި އެމަނިކުފާނު ސަރުކާރުގެ ހަގީގަތް ހާމަވެދާނެތީ އެވެ. ތެދާއި ހަގީގަތަކީ އެމަނިކުފާނުގެ ދުޝްމަނުންނެވެ.

ބޭނުންވެވަޑައިގަންނަވަނީ ނޫސްތަކާއި ނޫސްވެރިން، އެމަނިކުފާނަށް ސަނާ ކިޔައި، ރައްޔިތުންނަށް ހަގީގަތް ފޮރުވުމެވެ. ދެކެވަޑައިގަންނަވާ ގޮތުގައި، ނޫސްވެރިންގެ ޒިންމާއަކީ ސަރުކާރުގެ ވައްކަންތައް ފޮރުވައި، ކޮރަޕްޝަންތަކަށް ބީރު ކަންފަތެއް ދީ، އެމަނިކުފާނު އޮފުކޮށްދިނުމެވެ.

މުއިއްޒު ދެކެވަޑައިގަންނަވާ ގޮތުގައި އެމަނިކުފާނާ ދެކޮޅަށް ފާޅު ކުރާ ހުރިހާ ހިޔާލަކީ ދޮގެވެ. މުއިއްޒުގެ ސިކުނޑިއަށް ވިސްނޭ ގޮތުގައި ތެދު ހަދަނީ ހަމައެކަނި އެމަނިކުފާނެވެ. މިނިވަން މީޑިއާ ނެތިކޮށްލަން ސަރުކާރުން ފަރުމާކޮށް ރައްޔިތުންގެ މަޖިލީހަށް ބިލެއް ހުށަހެޅީ އެހެންވެ އެވެ.

މިނިވަން މީޑިއާ ނެތިކޮށްލަން ސަރުކާރުން ކުރާ މަސައްކަތަށް، ޑިމޮކްރަސީއަށް ހެޔޮ އެދޭ އެންމެންގެ ފަރާތުން ދަނީ ފާޑުކިޔުން އަމާޒުވަމުންނެވެ. ފާޑުކިޔާ އެންމެން ވެސް ބުނަމުންދަނީ ސަރުކާރުގެ މަގުސަދަކީ، މިނިވަން މީޑިއާ ނެތިކޮށްލުން ކަމަށެވެ.

މޯލްޑިވްސް މީޑިއާ ކައުންސިލުން ބުނީ، އެ ބިލުގެ ސަބަބުން، އެއްވެސް އަދުލުވެރިކަމެއް ނެތި މީޑިއާތަކަށް ފިޔަވަޅު އެޅުމުގެ ދޮރު ހުޅުވިގެންދާނެ ކަމަށެވެ.

ނޫސްވެރިންގެ ހައްގުތައް ހިމާޔަތް ކުރުމުގެ މަސައްކަތް ކުރާ މޯލްޑިވްސް ޖާނަލިސްޓް އެސޯސިއޭޝަނުން ނެރުނު ބަޔާނެއްގައި ބުނީ، މީޑިއާ ރެގިއުލޭޓު ކުރުމުގެ ނަމުގައި ހުށަހެޅި ބިލުގެ ސަބަބުން ރައީސުލްޖުމްހޫރިއްޔާގެ މުށުތެރެއަށް މީޑިއާތައް ގެންދަން ފަސޭހަވާނެ ކަމަށެވެ.

މިފަދަން ގިނަ ކަންބޮޑުވުންތަކެއް ހުރިއިރު، ނޫސްވެރިން ގެންދަނީ މި ބިލު ބޭރުކޮށްލުމަށް ގޮވާލައި އަޑުއުފުލަމުންނެވެ. އެގޮތުން ރައީސް އޮފީހުގެ ދޮރުމައްޗާއި މުލިއާގެ ދޮށުގައި ނޫސްވެރިން ވަނީ އަޑު އުފުލާފަ އެވެ. ނޫސްވެރިން ގޮވާލަމުން ދަނީ މަޖިލީހަށް ހުށަހަލާފައި އޮތް މީޑިއާ ނެތިކޮށްލާ ބިލް ވަގުތުން ބޭރުކުރުމަށެވެ.

ރައީސް މުއިއްޒު ނޫސްވެރިންގެ އަގުވައްޓާލުމަށް ދެއްކެވީ ހީލަތްތެރި، ހަޑި ހުތުރު މަންޒަރު ތަކެކެވެ.

އެއީ ނޫސްވެރިން މި ބިލާއި މެދު ކަންބޮޑުވުން ފާޅުކޮށް އަޑުއުފުލަން ރައީސް އޮފީސް ކުރިމަތީގައި ހުރި މީޑިއާ ފެންޑާގައި އަޑުއުލަމުން ދިޔަ ދެވަނަ ދުވަހެވެ. ނޫސްވެރިން އަޑުއުފުލައި އިހުތިޖާޖެއް ކުރަމުން ގެންދިޔަ އެވަގުތު ރައީސް އޮފީހުން ގެއަށް ވަޑައިގަތުމަށް ޓަކައި ރައީސް ނުކުންނެވިއެވެ. ހަށިފާރަވެރިންނާއި ފުލް ސެކިއުރިޓީ އާއި އެކުގަ އެވެ. އޭރު ރައީސް އޮފީހުގެ ކުރިމަތީގައި ހުންނަ ނޫސްވެރިންގެ ފެންޑާގައި އިހްތިޖާޖުގައި ގިނަ އަދަދެއްގެ ނޫސްވެރިން ތިއްބެވެ. ނޫސްވެރިން ތިބީ ރައީސް އާއި ބައްދަލުކުރުމަށް ޑިމާންޑް ކޮށްގެންނެވެ.

ރައީސް މުއިއްޒު ރައީސް އޮފީހުން ނިކުމެވަޑައިގަތުމާއެކު ނޫސްވެރިން އެމީހުންގެ ކަންބޮޑުވުންތައް ރައީސްއަށް ހިއްސާކުރަން ފެށި އެވެ. ފަސްފަހަތުން ހިނގައި ސުވާލުތައް ކުރަން ފެށި އެވެ. ގައުމުގެ ވެރިޔަކަށް ވީތީ ދެއްވަން ޖެހޭ އަދަބު އިހުތިރާމް ވެސް ދީގެންނެވެ.

"ރައީސް ވިދާޅުވެދެއްވާ އެ ބިލު ބޭރުކުރައްވާނަންތޯ؟ ރައީސް ފަލާހުގެ ދެއްކެވި ވާހަކައަށް ފިޔަވަޅު އަޅުއްވާނަންތޯ.. ރައީސް ކީކޭތޯ މިކަމާއި މެދު ވިދާޅުވަނީ." މިއީ އެދުވަހު ރައީސް މުއިއްޒުގެ ފަހަތުން ހިނގައި ނޫސްވެރިން އެމަނިކުފާނަށް އަމާޒު ކުރެއްވި ބައެއް ސުވާލުތެކެވެ.

ނޫސްވެރިންގެ މި ސުވާލުތަކާއި އެކުގައި ވެސް ރައީސް ހިންގަވަމުންދެވި އެވެ. ނޫސްވެރިން ފަހަތުން ހިނގަމުން ދުވަމުންދެ އެވެ. ރައީސްގެ ވަށައިގެންތިބި ސަލާމަތީ ބާރުތަކުން ނޫސްވެރިން ގަޅުވާ ކޮއްޕާ ބިންމައްޗަށް ވައްޓަމުންދެ އެވެ. ރައީސް ހުންނެވީ ހިނިތުންވުމަކާއި އެކު ވަރަށް ހަމަޖެހިލައިފަ އެވެ. އެތަނުން ދެ ނޫސްވެރިޔަކު ފުލުހުން ކޮއްޕާ ވައްޓާ ވެސް ލިއެވެ. ރައީސް ކުރެއްވި ކަމަކީ ހަމަ އެކަނި އެދިމާއަށް ބަލާލުމެވެ. ހިނިތުންވުމާއި އެކުގަ އެވެ.

މިފަދަ ގޮތަކަށް ރައީސް އެވަޑައިގެންނެވި ތަނަކަށް ވަޑައިގެންފި އެވެ. ނޫސްވެރިން ކުރި ޑިމާންޑަށް އަޅާލުމެއް ވެސް ނެތި އެވެ. ނޫސްވެރިން ތަކުރާރުކޮށް ކުރަމުން ގެންދިޔަ ސުވާލުތަކަށް އެއްވެސް ޖަވާބެއް ދިނުމެެއް ނެތި އެވެ. ނޫސްވެރިންނަށް އެކި ވަރުގެ އަނިޔާތައް ލިބުން ނޫން ކަމެއްނުވި އެވެ.

ގިނަ ބަޔަކު ގަބޫލުކުރާ ގޮތުގައި މިއީ ރައީސް މުއިއްޒުގެ ބޮޑާކަމާއި ކިބުރުވެރިކަން ދައްކާލަން ޖެހި މަޅި އެވެ. ނޫސްވެރިންގެ އަގު މީޑިއާގެ ކުރިމަތީގައި ވައްޓާލަން ހީލަތްތެރި ކަމާއި އެކު ރޭއްވެވި ރޭވުމެކެވެ.

ނޫސްވެރިކަމަށް ފުރިހަމައަށް ޖާގަދޭ ސަރުކާރެއް ކަމަށް ތާއަބަދު ވިދާޅުވަމުން ގެންދަވާ ރައީސެއްގެ ފަހަތުން ނޫސްވެރިން ސުވާލުކުރަމުން ދުވި އިރުވެސް ހުއްޓިވަޑައިގެން އެއިން މީހަކާއި އަނގައިން ބުނެލަން ވެސް އެ ރައީސް ބޭނުންފުޅު ނުވި އެވެ.

ރައީސް މުއިއްޒު ސާބިތުކޮށްދެއްވަން ބޭނުންފުޅުވީ ނުވަތަ ދައްކަވަން އުޅުއްވީ ކޮން މަންޒަރެއްކަން ވަރަށް ސާފެވެ. އެމަނިކުފާނު ބޭނުވްފުޅުވީ ތިމާގެ ހުރި ބޮޑާކަމާއި ކިބުރުވެރިކަން ދައްކައި ނޫސްވެރިން ބަދުނާމުކޮށް އަގުވައްޓާލުމަށެވެ. އެހެން އެއްވެސް ބޭނުމެއް އެ ރައީސްގެ ނެތެވެ.

މަނިކުފާނެވެ. ހީލަތްތެރިކަމާއި އެކު ނޫސްވެރިން ބަދުނާމުކޮށް، އަގުވައްޓާލުމަށް ޖެހި މަޅީގައި ޖެހި ބަނދެވުނީ ނޫސްވެރިންނެއް ނޫނެވެ. އެ މަޅީގައި ބަނދެވުނީ ޚުދު މަނިކުފާނެވެ.