ރަޝިޔާ އިން ދިން ވަރުގަދަ ހަމަލާ އެއްގައި އެތައް ބަޔަކު މަރުވެ ޔޫރަޕިއަން ޔޫނިއަންގެ މިޝަން އަށް ގެއްލުން ވެއްޖެ

ޖުލައި މަހުގެ ފަހުން ޔުކްރެއިންގެ ވެރިރަށް ކީވް އަށް ރަޝިޔާ އިން ދިން އެންމެ ވަރުގަދަ ހަމަލާ ހަމަލާއާ ގުޅިގެން ޔޫރަޕިއަން ޔޫނިއަންގެ އެގްޒެކެޓިވް ކޮމިޝަންގެ އިސްވެރިޔާ އުރްސުލާ ވޮން ޑަރ ލެޔަން ކަންބޮޑުވުން ފާޅުކުރައްވައިފިއެވެ.

މި ހަމަލާގައި ޔުކްރެއިންގެ ވެރިރަށުގައި ހުރި އީޔޫގެ މިޝަންވެސް ގެއްލުންވެފައިވެއެވެ.

ޔުކްރެއިން އޮފިޝަލުން ބުނާ ގޮތުގައި މި ހަމަލާގައި 4 ކުޑަކުދިން ހިމެނޭ ގޮތަށް 17 މީހުން މަރުވެ، އަދި އެތައް ބަޔަކު ޒަޚަމްވެފައިވެއެވެ.

މި ހަމަލާ ގައި 5 ބުރީގެ އާންމުން ދިރިއުޅޭ އިމާރާތެއް ހަލާކުވެ، އީޔޫ މިޝަނާއި ކައިރީގައި ހުރި ބްރިޓިޝް ކައުންސިލަށް ވެސް ގެއްލުން ލިބުނެވެ.

ވޮން ޑަރ ލެޔަން ނެރުއްވި ހަރުކަށި ބަޔާނެއްގައި ވިދާޅުވި ގޮތުގައި ރަޝިޔާގެ މިސައިލްތައް ޑިޕްލޮމެޓިކް މިޝަނާ ވަރަށް ކައިރި އަށް އަރާފައިވެއެވެ: "20 ސިކުންތުގެ ތެރޭގައި 2 މިސައިލް ޑެލިގޭޝަނާ 50 މީޓަރު (165 ފޫޓު) ދުރަށް އަމާޒުވިއެވެ."

ބުރާސްފަތި ވިލޭރޭ ގެ މި ހަމަލާތައް އައީ ހަނގުރާމަ ނިންމުމަށް އެމެރިކާ އިސްވެ ހިންގި ޑިޕްލޮމެޓިކް މަސައްކަތްތަކަކަށް ފަހުގައެވެ.

މި ހަމަލާގެ ސަބަބުން އިނގިރޭސިވިލާތާއި އީޔޫ ވަނީ ރުޅިއައިސްފައެވެ.

އިނގިރޭސި ބޮޑުވަޒީރު ސަރ ކީރ ސްޓާމަރ ވަނީ ރަޝިޔާގެ ވްލަޑިމިއަރ ޕުޓިން "ސުލްހައިގެ އުންމީދުތައް ހަލާކު ކުރަމުންދާ" ކަމަށް ތުހުމަތު ކުރައްވާފައެވެ. އަދި އީޔޫގެ ޚާރިޖީ ސިޔާސަތުގެ އިސްވެރިޔާ ކަޖާ ކަލާސް ވިދާޅުވީ، މިއީ "ގަސްތުގައި ދިން ހަމަލާއެއް ކަމަށާއި މިއީ ސުލްހައިގެ މަސައްކަތްތަކަށް ފުރައްސާރަ ކުރުން،" ކަމަށެވެ.

ޔުކްރެއިންގެ ރައީސް ވުލޮޑިމިއަރ ޒެލެންސްކީ ވިދާޅުވި ގޮތުގައި މޮސްކޯ އިން ވަނީ މޭޒުދޮށުގައި މަޝްވަރާކުރުމުގެ ބަދަލުގައި ބެލިސްޓިކްސް،" އިޚްތިޔާރު ކޮށްފައެވެ. އޭގެ އިތުރުން ޒެލެންސްކީ ވަނީ ރަޝިޔާ ގެ މައްޗަށް ހަރުކަށި ފިޔަވަޅު އެޅުމުގެ މުހިންމުކަން ތަކުރާރު ކުރައްވާފައެވެ.

ކްރެމްލިން އިން ބުނެފައި ވަނީ ރަޝިޔާ އިން އަދިވެސް މަޝްވަރާތަކަށް ޝައުގުވެރިކަން ހުރި ކަމަށެވެ. ނަމަވެސް ވޮން ޑަރ ލެޔަން ވިދާޅުވީ މި ހަމަލާތަކަކީ އަނެއްކާ ވެސް ހިތި ތަޖުރިބާ އެއް ކަމަށާއި، ރަޝިޔާ އިން ޔުކްރެއިން ބިރުގެންނެވުމަށް އެއްވެސް ކަމެއް ނުކޮށް ދޫކޮށްނުލާނެ ކަމަށެވެ. އަދި ފިރިހެނުންނާއި، އަންހެނުންނާއި، ކުޑަކުދިން މަރައި، އީޔޫ އަށް ވެސް ޓާގެޓް ކުރާ ކަމުގައެވެ.

އީޔޫގެ ތަރުޖަމާނު ވިދާޅުވި ގޮތުގައި އެއްވެސް ޑިޕްލޮމެޓިކް މިޝަނަކަށް ހަމަލާ އަމާޒުކޮށްގެން ނުވާނެ ކަމަށާއި، މި ހަމަލާއާ ގުޅިގެން ބްރަސެލްސްގައި ހުންނަ ރަޝިޔާގެ މަންދޫބު ހާޒިރު ކުރެވޭނެ ކަމަށެވެ. އިނގިރޭސިވިލާތުން ބުނެފައިވަނީ ލަންޑަންގައި ހުންނަ ރަޝިޔާގެ އެމްބެސެޑަރ އަންޑްރޭ ކެލިން ފޮރިން އޮފީހަށް ހާޒިރުކުރެވޭނެ ކަމަށެވެ.

ޔުކްރެއިން ބާރުތަކުން ބުނާ ގޮތުގައި ރަޝިޔާ އިން ވަނީ 600 އާ ކައިރި އަދަދެއްގެ ޑްރޯން އާއި 30 އަށްވުރެ ގިނަ ބެލިސްޓިކް އަދި ކްރޫޒް މިސައިލް ފޮނުވާލާފައެވެ. މިއީ މި މަހު ޔުކްރެއިންގެ ވެރިރަށަށް ދިން އެންމެ ބޮޑު ހަމަލާއެވެ.

ކީވްގައި މަރުވި ގިނަ މީހުން ތިބީ ވެރިރަށުގެ އިރުމަތީ ފަރާތުގައި އޮންނަ ދަރްނިޓްސްކީ ސަރަހައްދުގެ 5 ބުރީގެ އާންމުން ދިރިއުޅޭ އިމާރާތެއްގައެވެ.

ބުރާސްފަތި ދުވަހުގެ ފަތިހު 3:00 ހާއިރު އިމާރާތައް އެރި މިސައިލް ވަނީ ފްލެޓް އިމާރާތް ފޫއަޅުވާލާ، އިމާރާތް ވެއްޓިފައެވެ.

މީހުން ސަލާމަތްކުރާ މީހުން ވަނީ ހެނދުނުން ފެށިގެން ފުނޑުވެފައިވާ އިމާރާތުގެ ތެރޭގައި ދިރިހުރި މީހުން ހޯދުމުގެ މަސައްކަތް ކޮށްފައެވެ. މީހުން ހޯދުމުގެ މަަސައްކަތް ކުރަމުން ދިޔައިރު ވެސް އިމާރާތުގައި ވަނީ ރޯވެފައެވެ.