ލޫޓުވައިފި، ލޫޓުވައިފި ނަމުގައި އޮކްޓޯބަރު 3 ވަނަ ދުވަހު މާލޭގައި އެމްޑީޕީ އިން ބޭއްވި ބޮޑު މުޒާހަރާގައި ބައިވެރިވި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މުވައްޒަފަކު ވަޒީފާ އިން ވަކި ކޮށްފިއެވެ.

ސިޔާސީ މަގާމެއްގައި ހުރި މީހަކު ފިޔަވާ އެއްވެސް އިތުރު މީހަކު ވަޒީފާ އިން ވަކި ނުކުރާނެ ކަމަށް މުއިއްޒު ރިޔާސީ ކެމްޕޭނުގައި ވަދުވެފައިވާއިރު، ރ. މަޑުއްވަރީ އަލިރެސް މުހައްމަދު ނިޝާމް އާރުޑީސީގައި އަދާ ކުރާ ވަޒީފާ އިން ވަކި ކުރިކަން ކުއްލި ގޮތަކަށް ވަނީ އަންގާފައެވެ.

ސީނިއަރ ބިލްޑިން މެއިންޓަނަންސް އޮފިސަރު ގެ މަގާމުގައި ހުރި ނިޝާމް މަގާމުން ވަކި ކުރި ސަބަބެއް ކަމަށް ޗިޓު ގައި އޮތީ އެ "ކޯޕަރޭޝަންގެ ހިއުމަން ރިސޯސް ޕޮލިސީ" އަށް ރިއާޔަތް ކޮށްފައި ކަމުގައެވެ.

އޮކްޓޯބަރު 8 ވަނަ ދުވަހު ނިޝާމް ވަޒީފާ އިން ވަކި ކުރީ ނޯޓިސް ދިނުމުގެ ބަދަލުގައި އެންމެ އަވަހަށް ވަޒީފާ އިން ވަކި ކުރެވޭނެ ގޮތް ހެދުމުގެ ގޮތުން އިތުރު އެއް މަސް ދުވަހުގެ މުސާރަ ދޭ ގޮތައް ކަން ފާހަގަ ކުރެވެއެވެ.

އެމްޑީޕީ ގެ ގާނޫނީ ޓީމުން ބުނެފައިވަނީ ނިޝާމް ވަޒީފާ އިން ވަކި ކުރި މައްސަލަ ވަޒީފާ އާ ބެހޭ ޓްރިބިއުނަލް އަށް ހުށަހަޅާނެ ކަމުގައެވެ.

ވަޒީފާ އިން ވަކި ކުރުމާ ބެހޭ ގޮތުން އެކްސް ގައި ކުރި ޕޯސްޓެއްގައި "މުހިންމީ ގައުމު، ނުހުއްޓުވޭނެ،" ކަމަށް ނިޝާމް ބުނެފައިވެއެވެ.