ރައީސް މުއިއްޒު މ.އަތޮޅަށް ކުރައްވާ ދަތުރުފުޅާ ގުޅިގެން މުލަކުގެ މަގުތަކުގައި ޖަހާފައިވާ ގައުތައް ޕެކްކޮށް އެއަތޮޅު އެހެން ދެރަށަކަށް ގެންދަނީ
މިދިޔަ 4 މަހު މަގު ހެދުމުގެ މަޝްރޫއުގެ އެއްވެސް މަސައްކަތެއް ކުރިއަށް ނުދޭ
މުލަކުގެ މަގު ހެދުމުގެ މަޝްރޫއުގެ ދަށުން ޖަހާފައިހުރި ގައުތަކެއް ނަގައި، ޕެކް ކުރަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މ.އަތޮޅަށް ކުރައްވާ ދަތުރުފުޅާ ގުޅިގެން މުލަކުގައި ޒަމާނީ ފެންވަރަށް ތަރައްގީ ކުރާ މަގުތަކުގައި ޖަހާފައިވާ ގައުތައް ނަގައި ޕެކްކޮށް އެއަތޮޅުގެ އެހެން ދެރަށަކަށް ގެންދިއުމަށް ނިންމައިފިއެވެ.
ރާއްޖެއެމްވީއަށް މުލަކު ކައުންސިލްގެ ރައީސް އަހުމަދު ޖަމާލް ވިދާޅުވީ އެރަށުގެ މަގު ޒަމާނީ ފެންވަރަށް ތަރައްގީ ކުރުމުގެ މަޝްރޫއު އެއްކޮށް ނުނިމޭ ކަމަށާއި، މިސަރުކާރާއެކު އެ މަޝްރޫއުގެ މަސައްކަތުގެ ސްޕީޑް ވަރަށް ލަސްވެފައިވާ ކަމަށެވެ. އަދި މިދިޔަ 4 މަހު މަގު ހެދުމުގެ މަޝްރޫއުގެ އެއްވެސް މަސައްކަތެއް ކުރިއަށް ނުދާ ކަމަށް އޭނާ ވިދާޅުވިއެވެ.
މ.އަތޮޅަށް ރައީސް މުއިއްޒު ވަރަށް އަވަހަށް ވަޑައިގަންނަވާކަން ފާހަގަކުރައްވައި ޖަމާލް ވިދާޅުވީ އެރަށުގެ ދެ މަގެއްގެ ކަންމަތީގައި ޖަހާފައިހުރި ގައުތައް ނަގައި، ދޮވެ ސާފުކޮށް ޕެކްކޮށްފައިވާ ކަމަށެވެ. އެސައިޓުގައި މަސައްކަތް މުވައްޒަފުންނާ ހަވާލާދީ ޖަމާލް ވިދާޅުވީ ގައުތައް ނަގައި، ޕެކް ކޮށްފައިވަނީ ކޮޅުފުށީ އަދި މުލީގެ މަގު ހެދުމުގެ މަޝްރޫއު އިފްތިތާހް ކުރާ ރަސްމިއްޔާތަށް ގެންދިއުމަށާއި، ކޮންމެ ރަށަކަށް 80 ގައު ގެންދަން ޖެހޭ ކަމަށް އެ މުވައްޒަފުން ބުނެފައިވާ ކަމަށެވެ. އަދި ވިދާޅުވީ މި ކަންކަމާ ގުޅޭ އެއްވެސް މައުލޫމާތެއް ސަރުކާރުގެ ފަރާތުން ކައުންސިލަށް ލިބިފައިނުވާ ކަމަށެވެ.
ޖަމާލް ވިދާޅުވީ މުލަކުގެ މަގުތައް ނުނިމޭއިރު، ޖަހާފައިހުރި ގައުތައް އެހެން ރަށްތަކަށް ގެންދިއުމަކީ ކަންބޮޑުވާ ކަމެއް ކަމަށާއި، މިއީ ބަލައިގަނެވޭނެ ކަމެއް ނޫން ކަމަށެވެ.
ތަރައްގީގެ ހުރިހާ މަޝްރޫއެއް ހުއްޓިފައިވާކަން ފާހަގަކުރައްވައި ޖަމާލް ވިދާޅުވީ މަގު ހެދުމުގެ މަސައްކަތް ކުރަމުންދާ އާރްޑީސީއާ އައުޓްޑޯ ޖިމް އަދި ޔޫތް ސެންޓަރު އެޅުމަށް ހަވާލުކޮށްފައިވާ ކަމަށެވެ. އަދި ރައީސް މުއިއްޒުގެ މިފަހަރުގެ ދަތުރުފުޅުގައި ޕޮލިސް ސްޓޭޝަން އެޅުމަށް އާރްޑީސީއާ ހަވާލު ކުރުމަށް ނިންމާފައިވާ ކަމަށް މައުލޫމާތު ލިބޭ ކަމަށެވެ.ނަމަވެސް އާރްޑީސީއަށް އެއްވެސް މަސައްކަތެއްގެ އަމަލީ މަސައްކަތް ކުރިއަށް ނުގެންދެވޭ ކަމަށާއި، މިއީ ރަށުގެ ތަރައްގީއަށް ދޭ ގެއްލުމެއް ކަމަށް އޭނާ ވިދާޅުވިއެވެ.
މުލަކުގެ މަގުތަކުން ގައުތައް ނަގައިގެން ގެންދާއިރު، މަގުގެ ހެދުމުގެ މަޝްރޫއާ ގުޅޭގޮތުން އެންމެފަހުން އާރްޑީސީން ބުނެފައިވަނީ މިމަޝްރޫއު %68 އަށްވުރެ ބޮޑު ބައި ނިމިފައިވާ ކަމަށެވެ.
މުލަކުގެ 5.8 ކިލޯމީޓަރުގެ މަގުގައި ތާރުއެޅުން އާރްޑީސީއާ ހަވާލުކޮށްފައިވަނީ 5 އެޕްރީލް 2021 ގައެވެ.
420 ދުވަހުން މަސައްކަތް ނިންމާގޮތަށް ހަވާލުކުރި މިމަޝްރޫއަކީ 106,230,722.25 ރުފިޔާ (ސަތޭކަ މިލިއަން ދެލައްކަ ތިރީސްހާސް ހަތްސަތޭކަ ބާވީސް ރުފިޔާ ފަންސަވީސް ލާރި) ސަރުކާރުގެ ބަޖެޓުން ޚަރަދުކުރާ މަޝްރޫއެކެވެ. މަގުގައި ތާރު އެޅުމުގެ މި މަޝްރޫއުގެ ތެރެއިން މަގުތަކުގައި ފެންހިންދާ ނިޒާމް ގާއިމްކުރުމާއި، މަގުބައްތި ޖެހުމަށްވެސް ވަނީ ހަމަޖެހިފައެވެ.
