އާރުޑީސީގެ މުވައްޒަފުންނަށް ފެބްރުއަރީ މަހުން ފެށިގެން ޕެންޝަން ފައިސާ ޖަމާ ނުވޭ

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މުވައްޒަފުންނަށް މި އަހަރުގެ ފެބްރުއަރީ މަހުން ފެށިގެން ޕެންޝަން ފަންޑަށް ފައިސާ ޖަމާ ނުވާ ކަމުގެ މައުލޫމާތު ލިބިއްޖެއެވެ.

އެކުންފުނީ ގައި މަސައްކަތް ކުރާ މުވައްޒަފަކު ނަން ނުޖެހުމަށް ޝަރުތު ކޮށް މި ނޫހަށް މައުލޫމާތު ދިން ގޮތުގައި، ކުންފުނިން ޕެންޝަން ފަންޑަށް ފައިސާ ޖަމާ ނުކުރި ނަމަވެސް މުވައްޒަފުންނަށް މުސާރަ ދީފައިވަނީ ޕެންޝަނަށް ވާ ފައިސާ ވަނީ އުނިކޮށްފައި ކަމަށެވެ.

ފާއިތުވި 8 މަސް ދުވަހުގެ ޕެންޝަން ފައިސާ ޖަމާކޮށްފައި ނުވަނީ ކޮން ސަބަބަކާ ހެދި ކަމެއް މުވައްޒަފުންނަށް ކުންފުނިން އަންގާފައި ނުވާ ކަމަށް ވެސް މައުލޫމާތު ދިން ފަރާތުން ބުނެފައިވެއެވެ.

ރިޓަޔަމަންޓް ޕެންޝަން ސްކީމަށް ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު މުވައްޒަފުގެ އަސާސީ މުސާރައިގެ %7 (ދެ ފަރާތުން ޖުމްލަ %14) ދައްކަން ޖެހެއެވެ.

އާރުޑީސީ އަކީ ސައްތައިން ސައްތަ ސަރުކާރުގެ ހިއްސާ އޮންނަ ކުންފުންޏެކެވެ. މިއީ 2019 ވަނަ އަހަރު މަގު ހެދުމުގެ މަސައްކަތައް އުފައްދާފައިވާ ކުންފުންޏެކެވެ. އޮޑިޓް އޮފީހުން އެންމެ ފަހުން އާންމު ކޮށްފައިވާ އޮޑިޓް ރިޕޯޓުގައިވާ ގޮތުން 31 ޑިސެމްބަރު 2021 ގެ ނިޔަލަށް 152.3 މިލިއަން ރުފިޔާގެ ގެއްލުން ކުންފުންޏަށް ވަނީ ޖަމާވެފައެވެ.

ކުންފުނީގެ މާލީ ހާލަތު ހުރި ގޮތުން ކުންފުނި ހިންގިދާނެތޯ އޮޑިޓް ރިޕޯޓުގައި ވަނީ ސުވާލު އުފައްދާފައެވެ. އެހެން ނަމަވެސް މިނިސްޓްރީ އޮފް ފިނޭންސް އެންޑް ޕްލޭނިންގ އިން އެ ކުންފުނި ހިންގުމަށް ބޭނުންވާ ފައިސާ ދޫކުރާނެ ކަމަށް ބުނެފައިވާ ކަމަށް ވެސް ރިޕޯޓުގައި ވެއެވެ. އެހެން ކަމާއެކު ކުންފުނި ހިނގުން ބިނާވާނީ ފިނޭންސް މިނިސްޓްރީން ފޯރުކޮށްދޭ މާލީ އެހީތެރި ކަމުގެ މައްޗަށް ކަމަށް ވެސް ރިޕޯޓުގައި ވެއެވެ.

މަގު ހެދުމުގެ މަގްސަދު ގައި އުފެއްދި ކުންފުންޏެއް ނަމަވެސް މި ސަރުކާރުން އާރުޑީސީ އަށް ތަފާތު ބާވަތްތަކުގެ މަޝްރޫއުތައް ގެންދަނީ ހަވާލު ކުރަމުންނެވެ. އެ ގޮތުން އައުޓޯ ޖިމް އެޅުމާއި، ފުޓްސަލް ސްޓޭޑިއަމް ހެދުމާއި، ހޮސްޕިޓަލް އިމާރާތް ކުރުމާއި، ނަރުދަމާގެ މަޝްރޫއުތަކާއި، ހެލްތު ސެންޓަރާއި ހޮސްޕިޓަލް އެޅުން ފަދަ މަޝްރޫއުތައް ވެސް ވަނީ އާރުޑީސީ އާ ހަވާލު ކޮށްފައެވެ.