ލޫޓުވައިފި މުޒާހަރާގައި ބައިވެރިވި ދެބެއިން އާރުޑީސީގެ ވަޒީފާ އިން ވަކިކޮށްފި
ސިޔާސީ މަގާމެއްގައި ހުރި މީހަކު ފިޔަވާ އެއްވެސް މީހަކު ވަޒީފާއިން ވަކި ނުކުރާނެކަމަށް ބުނި ނަމަވެސް، އޮކްޓޯބަރު 3 ގެ އިހުތިޖާޖުގައި ބައިވެރިވި ގިނަ ބަޔަކު ވަނީ ވަޒީފާއިން ވަކިކޮށްފަ
އޮކްޓޯބަރު 3 ގެ މުޒާހަރާއަށްފަހު ރައީސް މުއިއްޒުގެ ސަރުކާރުން އިދިކޮޅުފަރާތްތަކުގެ އަޑު ކަނޑުވާލަން ގިނަ މަސައްކަތްތަކެއް ކުރާކަމަށް އިދިކޮޅު ފަރާތްތަކުން ތުހުމަތުކުރޭ
ލޫޓުވައިފި، ލޫޓުވައިފި ނަމުގައި އޮކްޓޯބަރު 3 ވަނަ ދުވަހު މާލޭގައި އެމްޑީޕީ އިން ބޭއްވި ބޮޑު މުޒާހަރާގައި ބައިވެރިވި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގައި މަސައްކަތްކުރާ އެއްބަނޑުއެއްބަފާ ދެބެއިން ވަޒީފާއިން ވަކިކޮށްފިއެވެ.
އާރުޑީސީ ގެ ހެޑް އޮފް ހިއުމަން ރިސޯސަސް އަހުމަދު ފަހުމީ އޮކްޓޯބަރ 13 ވަނަ ދުވަހު ސޮއިކުރައްވާ، ވަޒީފާއިން ވަކި ކުރިކަމުގެ ލިޔުން މި ދެ މުވައްޒަފުންނަށް ވަނީ ފޮނުވާފައެވެ. ވަޒީފާއިން ވަކިކޮށްފައިވަނީ އާރުޑީސީ ހެޑް އޮފީހުގެ އައިސީޓީ ޑިޕާޓްމެންޓްގެ އެސިސްޓެންޓް މެނޭޖަރުގެ މަގާމުގައިހުރި އަހްމަދު އަދީބް އަދި އާރްޑީސީ މާލެ ސައިޓްގެ ސީނިއަރ އިންވެންޓްރީ މެނޭޖްމެންޓް އޮފިސަރުގެ މަގާމުގައި ހުރި މުހައްމަދު އަރީބް އެވެ.
ސިޔާސީ މަގާމެއްގައި ހުރި މީހަކު ފިޔަވާ އެއްވެސް އިތުރު މީހަކު ވަޒީފާ އިން ވަކި ނުކުރާނެ ކަމަށް ރައީސް މުއިއްޒު ރިޔާސީ ކެމްޕޭނުގައި ވަދުވެފައިވާއިރު އޮކްޓޯބަރު 3 ގެ އިހުތިޖާޖުގައި ބައިވެރިވުމާ ގުޅިގެން ސަރުކާރުގެ ބައެއް މުއައްސަސާތަކަށް ނިސްބަތްވާ މުވައްޒަފުންތަކެއް ވަނީ ވަޒީފާއިން ވަކިކޮށްފައެވެ. އަދި މީގެ އިތުރުންވެސް ވީވައުދާ ހިލާފުވެ، ސިޔާސީގޮތުން ހިޔާލުތަފާތުވާ މީހުންނަށް މިސަރުކާރުން ދަނީ އެތަކެއް ދުއްތުރާތަކެއް ކުރަމުންނެވެ.
ވަޒީފާއިން ވަކިކުރުމުގެ އިތުރުން އެމްޑީޕީ އަށް ނިސްބަތްވާ ބައެއް ފަރާތްތަކުގެ ފޯނު ފުލުހުން މެދުވެރިކޮށް ހިފަހައްޓާ އެ ފަރާތްތަކުގެ ޒާތީ ފޮޓޯތައް ލީކުކުރުމުގެ ހަރަކާތެއްވެސް ރައީސް މުއިއްޒުގެ ސަރުކާރުން ވަނީ ފަށާފައެވެ.
މީގެ އިތުރުން ލޫޓުވައިފި މުޒާހަރާގެ ތެރެއިން ހައްޔަރުކުރި 6 މީހަކު އަދިވެސް ވަނީ ދޫނިދޫ ޖަލުގައި ބަންދުކޮށްފައެވެ. އަދި އޭސީސީ ފަދަ މިނިވަން މުއައްސަސާތައް މެދުވެރިކޮށް އެއްވެސް އަސާސެއްނެތް ތުހުމަތު ތަކެއްކޮށް، ކުރީ ސަރުކާރުގެ ވަޒީރުންގެ މައްސަލަތައް ބެލުމުގެ ސިލްސިލާއެއް ރައީސް މުއިއްޒު ވަނީ ފައްްޓަވާފައެވެ.
މިއިން ކޮންމެ ކަމަކީ ވެސް އިދިކޮޅު ފަރާތްތަކަށް ބިރުދެއްކުމަށާއި އަދި ހުރިހާ އިދިކޮޅު އަޑުތަކެއް ކަނޑުވާލުމަށް ކުރެވޭ ސިޔާސީ މަސައްކަތެއްކަން ޝައްކެއްނެތް މިންވަރަށް ސާބިތުވާ ކަމަށް އިދިކޮޅު މައި ޕާޓީ އެމްޑީޕީ އިން ވަނީ ބުނެފައެވެ. އަދި މިފަދަ ފިނޑި ޢަމަލުތަކަކީ މި ސަރުކާރުގެ ނާކާމިޔާބުކަމުގެ ހެއްކެއް ކަމަށާއި އަދި އާންމުންގެ މައްޗަށް ބާރު ހިންގުމަށް ސަރުކާރުން ކުރާ ނާކާމިޔާބު މަސައްކަތުގެ ހެއްކެއް ކަމަށް ވެސް އެމްޑީޕީ އިން ވަނީ ބުނެފައެވެ.
