ކުޑަކުދިންގެ ކެއްސުމުގެ ބޭހެއްގެ ގޮތުގައި އާންމުކޮށް ބޭނުންކުރަމުން އަންނަ 'ކޮފްސީ ސިރަޕް' ވިއްކުމާއި އެތެރެކުރުން އެމް.އެފް.ޑީ.އޭ އިން މަނާކޮށްފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ވަނީ އިންޑިއާގެ އެމް.އެމް.ސީ ހެލްތްކެއަރ ލިމިޓެޑުން އުފައްދާ ކޮފްސީ ސިރަޕް ރާއްޖޭގެ ބާޒާރުން ނެގުމަށް އަމުރުކޮށްފައެވެ.

އެމްއެފްޑީއޭއިން ބުނީ ރާއްޖޭގެ މާރކެޓުގައި ލިބެން ހުންނަ ބޭހަކީ ފެންވަރު ރަނގަޅު، ރައްކާތެރި ބޭސްކަން ކަށަވަރު ކުރުމަށްޓަކައި އެ އޮތޯރިޓީގެ ފަރާތުން މެދުކެނޑުމެއްނެތި މަސައްކަތް ކުރަމުން އަންނަ ކަމަށެވެ. އެގޮތުން ރާއްޖެ އެތެރެކޮށް ބޭނުން ކުރަމުންގެންދާ ބޭހުގެ މާރކެޓް ސާވެއިލަންސް ކުރުމުގެ މަސައްކަތުގެ ތެރެއިން 'ކޮފްސީ ސިރަޕް' އިން ވަނީ ކޮލިޓީ މައްސަލަތަކެއް ދިމާވެފައި ކަމަށް އެމްއެފްޑީއޭ އިން ބުނެއެވެ.

އެހެންކަމުން ބުދަ ދުވަހުން ފެށިގެން 'ކޮފްސީ ސިރަޕް 100 އެމް އެލް' (sulbutamol sulpahte BP + Ambroxol Hydrochloride BP + Guiphenesin BP + Menthol BP) ރާއްޖެއަށް އިމްޕޯޓް ކުރުމާއި، ވިއްކުމާއި އަދި ބޭނުންކުރުމަކީ މަނާ ކަމެއް ކަމަށް އެމްއެފްޑީއޭއިން ބުނެފައިވެއެވެ. އަދި އެއްވެސް ފާމަސީއެއްގައި މި ބޭސް ހުރި ނަމަ، ބޭސް ނައްތާލުމަށް ހަމަޖެހިފައިވާ އުސޫލާއި އެއްގޮތަށް ބޭސްތައް ނައްތާލުމުގެ ކަންކަން ކުރިއަށް ގެންދިއުމަށް ވަނީ އެދިފައެވެ.

އެމްއެފްޑީއޭއިން ބުނީ މި ބޭނުންކުރުމުގެ ސަބަބުން، މިހާތަނަށް އެއްވެސް ފަރާތަކުން ސިއްހީ މައްސަލައެއް ދިމާވެގެން އެ އޮތޯރިޓީއަށް ރިޕޯޓްކޮށްފައި ނުވާ ކަމަށެވެ.

މި ބޭސް އުފައްދަނީ އިންޑިއާގެ ޗެންނާއީގައި ހުންނަ އެމް.އެމް.ސީ ހެލްތްކެއަރ ލިމިޓެޑުންނެވެ.