ރާއްޖޭގައި މަަސައްކަތް ކުރާ އިންޑިއާގެ މަސައްކަތްތެރިނަށް ޑޮލަރުން މުސާރަ ދޭން ބާރު އެޅުމަށް އިންޑިއާ ހައިކޮމިޝަނުން ގޮވާލައިފި

ރާއްޖޭގައި މަސައްކަތް ކުރާ އިންޑިއާ ރައްޔިތުންނަށް ޑޮލަރުން މުސާރަ ދިނުމަށް ވަޒީފާ ދޭ ފަރާތްތަކަށް ބާރު އެޅުމަށް ރާއްޖޭގައި މަސައްކަތް ކުރާ އިންޑިއާ ރައްޔިތުންނަށް އިންޑިއާ ހައިކޮމިޝަނުން ގޮވާލައިފިއެވެ.

ހައިކޮމިޝަނުން މިހެން ބުނެފައިވަނީ އޮކްޓޯބަރު 25 އިން ފެށިގެން ސްޓޭޓް ބޭންކް އޮފް އިންޑިއާގެ ރާއްޖޭ ގޮފިން ރާއްޖޭގައި މަސައްކަތް ކުރާ އިންޑިއާގެ ރައްޔިތުންނަށް ބޭރަށް ފައިސާ ފޮނުވޭ މިންވަރު 400 އެމެރިކާ ޑޮލަރުން 150 އެމެރިކާ ޑޮލަރަށް ދަށްކުރުމާ ގުޅިގެން އެކަމުގެ ކަންބޮޑުވުން ފާޅުކޮށް ނެރުނު ބަޔާނެއްގައެވެ.

ސްޓްޓޭޓް ބޭންކް އޮފް އިންޑިއާ އިން އެކައުންޓް ހޯލްޑަރުންނަށް ފޮނުވި މެސެޖެއްގައި، އެމެރިކާ ޑޮލަރުގެ ދަތިކަން ހުރުމުގެ ސަބަބުން މިގޮތަށް ހަމަޖައްސަން ޖެހުނު ކަމަށް ބަޔާންކޮށްފައިވެއެވެ.

މި މައްސަލައިގެ ސީރިއަސް ކަމަށް ބަލައި، ހައި ކޮމިޝަނުން ގެންދަނީ ރާއްޖޭގެ މިނިސްޓްރީ އޮފް ފޮރިން އެފެއާޒް އާއި މޯލްޑިވްސް މަނިޓަރީ އޮތޯރިޓީ އަދި ކަމާބެހޭ އެހެނިހެން އިދާރާތަކާއި އިންޑިއާގެ ކަމާބެހޭ ފަރާތްތަކާ ގުޅިގެން، ފައިސާ ފޮނުވުމުގައި ދިމާވެފައިވާ ގޮންޖެހުންތައް ޙައްލުކުރުމަށް މަސައްކަތް ކުރަމުން ކަމަށް ބަޔާނުގައި ބުނެފައިވެއެވެ. މި މައްސަލަ ޙައްލުކުރުމަށް ގޮތްތަކެއް ހޯދުމަށް މި ހަފްތާގައި ވެސް ދިވެހި ސަރުކާރުގެ ކަމާ ބެހޭ ފަރާތްތަކާ އެކު މަޝްވަރާކޮށްފައިވާނެ ކަމަށް ހައިކޮމިޝަނުން ވަނީ ބުނެފައެވެ.

ރާއްޖޭގައި މަސައްކަތް ކުރާ ރައްޔިތުންނަށް ހައިކޮމިޝަނުން ގޮވާލާފައިވަނީ މި ދަތި ކަމާ ގުޅިގެން ފައިސާ ފޮނުވުމުގެ ކަންކަން ދުރާލާ ރޭވުމަށާއި، އެމެރިކާ ޑޮލަރުން މުސާރަ ދިނުމަށް ވަޒީފާ ދޭ ފަރާތްތަކަށް ބާރުއެޅުމަށެވެ.

މި ޙާލަތުގެ ސަބަބުން ދިވެހިރާއްޖޭގައި ދިރިއުޅޭ އިންޑިއާގެ ރައްޔިތުންނަށާއި އިންޑިއާގައި ތިބި އެފަރާތްތަކުގެ ޢާއިލާތަކަށް ކުރިމަތިވެފައިވާ ދަތިތައް ފުރިހަމައަށް ގަބޫލު ކުރެވޭ ކަމަށް ބަޔާނުގައި ވެއެވެ.