އިންޑިޔާ ގައި އުފައްދާފައިވާ ތިން ވައްތަރެއްގެ ކޯފް ސިރަޕް ތަޣައްޔަރުވެފައިވާ ކަމަށް ބުނެ ޑަބްލިޔުއެޗްއޯ އިން އިންޒާރެއް ނެރެފި

އިންޑިޔާގައި އުފައްދާފައިވާ ތިން ވައްތަރެއްގެ ކޯފް ސިރަޕް ތަޣައްޔަރުވެފައިވާ ކަމަށް ބުނެ ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން އިންޒާރެއް ނެރެފިއެވެ.

ހޯމަ ދުވަހު ނެރުނު އިންޒާރު ގައި މި ބާވަތުގެ ބޭސްތައް ޤައުމުތަކުން ފެނިއްޖެނަމަ އެކަން އެ ޖަމްޢިއްޔާ އަށް އަންގަން އެންމެހައި ފަރާތްތަކަށް ގޮވާލާ ކަމަށް ބުނެފައި ވެއެވެ.

ޑަބްލިޔުއެޗްއޯ އިން ބުނެފައި ވަނީ ތަޣައްޔަރު ވެފައިވާ ބޭސްތަކަކީ ސްރެސަން ފާމަސޫޓިކަލް އިން އުފައްދާފައިވާ ކޯލްޑްރިފް، ރެޑްނެކްސް ފާމަސޫޓިކަލްސް އިން އުފައްދާފައިވާ ރެސްޕިފްރެޝް ޓީއާރު އަދި ޝޭޕް ފާމާ އިން އުފައްދާފައިވާ ރީލައިފްގެ ވަކި ބެޗްތަކެއްގެ ކޯފް ސިރަޕް ކަމަށެވެ.

ޑަބްލިޔުއެޗްއޯ އިން ބުނެފައި ވަނީ ތަޣައްޔަރުވެފައިވާ މި އުފެއްދުންތަކުން ބޮޑެތި ނުރައްކާތަކެއް ކުރިމަތިވެ، ފުރާނަ އަށް ނުރައްކާވެދާނެ ފަދަ ބޮޑެތި ސިއްހީ މައްސަލަތަކަށް މަގުފަހިވެދާނެ ކަމަށެވެ.

އިންޑިޔާގެ ސިއްޙީ އޮތޯރިޓީ ކަމަށްވާ ސެންޓްރަލް ޑްރަގްސް ސްޓޭންޑަޑް ކޮންޓްރޯލް އޯގަނައިޒޭޝަން (ސީޑީއެސްސީއޯ) އިން ޑަބްލިޔުއެޗްއޯ އަށް އަންގާފައި ވަނީ މި ސިރަޕްތައް އިންޑިއާ ގައި ބޭނުންކޮށްފައި ވަނީ ފަސް އަހަރުން ދަށުގެ ކުޑަކުދިން ކަމަށާއި، މި ކުދިންތައް މަދިޔަ ޕްރަދޭޝްގެ ޗިންދްވާރާ ޑިސްޓްރިކްޓްގައި މަރުވެފައިވާ ކަމަށެވެ.

މި ކޯފް ސިރަޕްގައި ހުއްދަކުރެވިފައިވާ މިންވަރަށްވުރެ 500 ގުނަ އިތުރަށް ނުރައްކާތެރި ޑައިއެތިލީން ގްލައިކޯލް އެކުލެވިފައިވާ ކަމަށް ވެއެވެ.

ސީޑީއެސްސީއޯ އިން ބުނެފައިވަނީ މި ތަޣައްޔަރުވެފައިވާ ބޭސްތަކުގެ ތެރެއިން އެއްވެސް ބޭހެއް އިންޑިޔާއިން ބޭރަށް އެކްސްޕޯޓްކޮށްފައި ނުވާ ކަމަށާއި، އަދި ގާނޫނާ ޚިލާފަށް އެކްސްޕޯޓް ކޮށްފައިވާ ކަމުގެ އެއްވެސް ހެއްކެއް ނެތް ކަމަށެވެ.