ރާއްޖޭގެ ގައުމީ އެއަރލައިން, މޯލްޑިވިއަންއަށް އެންމެ ޑިމާންޑް ބޮޑު އެއް ޑެސްޓިނޭޝަން ކަމަށްވާ ޓްރިވެންޑްރަމް އަށް ދަތުރުތައް ފެށުމަށް އިންޑިއާގެ އެންމެ މަޤްބޫލު އެއަރލައިން، އިންޑިގޯއިން ނިންމައިފި އެވެ.

މިކަން އިއުލާންކޮށް އިންޑިއާގެ ބަޖެޓް އެއަރލައިނެއް ކަމަށްވާ އިންޑިގޯއިން ބުނެފައިވަނީ ރާއްޖެ- ޓްރިވެންޑްރަމް ދަތުރުތައް 2025 ވަނަ އަހަރުގެ އޮކްޓޯބަރ 26 އިން ފެށިގެން، ސީދާ ވައިގެ ދަތުރުތައް ފެށުމަށް ވަނީ ނިންމާފައި ކަމަށެ އެވެ.

މިއީ ބެންގަލޫރު، މުންބާއީ އަދި ކޮޗީގެ އިތުރުން މާލެއާ ސީދާ ގުޅުން ޤާއިމްކުރެވޭ އިންޑިއާގެ ހަތަރުވަނަ ސިޓީއެވެ.

މި ކުރު ދަތުރުތަކުގައި އިންޑިގޯގެ އޭޓީއާރު މަތިންދާ ބޯޓުތައް ބޭނުންކުރާނެ އެވެ. ކޮންމެ ދުވަހަކު ކުރެވޭ މި ދަތުރުތަކަކީ ވިޔަފާރި އަދި ފަތުރުވެރިކަމުގެ ބޭނުމަށް ދަތުރުކުރާ ފަސިންޖަރުންނަށް އަގުހެޔޮ އަދި އިތުބާރުހުރި ޚިދުމަތެއް ފޯރުކޮށްދިނުމަށް ފަރުމާކުރެވިފައިވާ ދަތުރުތަކެއް ކަމަށް އިންޑިގޯއިން ބުނެއެވެ.

އިންޑިގޯގެ ސޭލްސް ވެރިޔާ، މިސްޓަރ ވިނޭ މަލްހޯތްރާ ވިދާޅުވި ގޮތުގައި، "އަޅުގަނޑުމެންނަށް ވަރަށް އުފާވޭ ތިރުވަނަންތަޕޫރަމް-މާލެ ދަތުރުތައް ފެށުމާއެކު، އިންޑިއާގެ ހަތަރު ސިޓީއަކުން ހަފްތާއަކު 28 ދަތުރު ދިވެހިރާއްޖެއަށް ކުރެވޭނެތީ. އިންޑިއާއަކީ ދިވެހިރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ އެއް ޤައުމުކަމަށްވެފައި، ދެ ޤައުމުގެ ވިޔަފާރީގެ ގުޅުން ވެސް ދަނީ ވަރުގަދަވަމުން." ނެއެވެ.

މި އައު ދަތުރުތައް ފެށުމަކީ އިންޑިއާ-ދިވެހިރާއްޖޭގެ ގުޅުން އިތުރަށް ބަދަހިވަމުންދާ ދަނޑިވަޅެއްގައި އަންނަ ކުރިއެރުމެއް ކަމަށް އިންޑިގޯއިން ވަނީ ބުނެފައެވެ.

އާއްމުކޮށް ދިވެހީން ބޭސްފަރުވާއަށް ގޮސް އުޅޭ, ޓްރިވެންޑްރަމާއި ރާއްޖެއާ ދޭތެރޭ ޑައިރެކްޓް ފްލައިޓްތައް މިހާރު ބާއްވަމުން އަންނަނީ މޯލްޑިވިއަންއިން އެކަންޏެވެ. އަދި ހަނިމާދޫ އިންޓަނޭޝަނަލް އެއަރޕޯޓް މެދުވެރިކޮށް ރާއްޖެއާއި ޓްރިވެންޑްރަމްއާ ދޭތެރޭ ދަތުރުތައް ވެސް ކުރެއެވެ.

ރާއްޖެއާއި ޓްރިވެންޑްރަމާ ދޭތެރޭ ކުރާ ދަތުރުތަކުގެ އަގުތައް އަދި އެ ކުންފުނިން ހާމަކޮށްފައި ނުވި ނަމަވެސް އިންޑިގޯ އެޕްލިކޭޝަން ނުވަތަ އެކުންފުނީގެ ވެބްސައިޓް މެދުވެރިކޮށް ޓިކެޓް ބުކް ކުރެވޭނެ އެވެ.