މިންގަނޑަށް ނުފެތޭ 25 ކެފޭ އަދި ރެސްޓޯރަންޓް ބަންދުކޮށްފި
23 ސެޕްޓެމްބަރު 2025 | އަންގާރަ 08:20އެމްއެފްޑީއޭގެ ހުއްދަ ނުނަގައި ގަވައިދާ ޚިލާފަށް ކާބޯތަކެތީގެ ޚިދުމަތްދޭ ތަންތަނާއި، ސާފުތާހިރުކަން ކުޑަކޮށް ޚިދުމަތްދޭ ތަންތަން ބަންދުކުރެވޭނެ
ކެފޭއެއް ބަންދުކޮށް ނޯޓިސް ހަރުކުރަނީ
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި މާލެ ސިޓީ ކައުންސިލު ގުޅިގެން ކުރިއަށްގެންދާ އޮޕަރޭޝަނެއްގެ ދަށުން މާލެއާއި ވިލިމާލޭގައި ހުރި ކާބޯތަކެތީގެ ޚިދުމަތްދޭ ތަންތަނުގެ ތެރެއިން 25 ތަނެއް އިއްޔެއާ ހަމައަށް ބަންދުކޮށްފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި މާލެ ސިޓީ ކައުންސިލު ގުޅިގެން ކުރިއަށްގެންދާ މި އޮޕަރޭޝަން މި ހަފުތާގެ އާދީއްތަ ދުވަހު ވަނީ ފަށައިފަ އެވެ. އަދި މި އޮޕަރޭޝަން މި ހަފްތާގެ ބުރާސްފަތި ދުވަހުގެ ނިޔަލަށް ކުރިއަށްދާނެ ކަމަށް މައުލޫމާތު ލިބެއެވެ.
މި އޮޕަރޭޝަންގެ ދަށުން ސައި ހޮޓާތަކާއި ޓޭކްއަވޭގެ ޚިދުމަތްދޭ ތަންތަނާއި ކެއުންބުއިމުގެ ޚިދުމަތްދޭ އެންމެހައި ތަންތަން ބަލައި ޗެކްކުރަމުންދާ ކަމަށް ސިޓީ ކައުންސިލުން މަޢުލޫމާތު ދީފައިވެއެވެ.
އެމްއެފްޑީއޭގެ ހުއްދަ ނުނަގައި ގަވައިދާ ޚިލާފަށް ކާބޯތަކެތީގެ ޚިދުމަތްދޭ ތަންތަނާއި، ސާފުތާހިރުކަން ކުޑަކޮށް ޚިދުމަތްދޭ ތަންތަނަށް ނޯޓިސް ދިނުމަށްފަހު އެފަދަ ތަންތަން ބަންދުކުރެވޭނެ ކަމަށް އެ ކައުންސިލުން ބުނެފައިވެއެވެ. މި އޮޕަރޭޝަން ކުރިއަށް ގެންދިއުމަށް ހަމަޖެހިފައިވަނީ މާލޭގެ އެކި ސަރަހައްދުތަކަށް ބަހާލައިގެން، ކޮންމެ ސަރަހައްދެއްގައި ކައުންސިލާއި އެމްއެފްޑީއޭގެ ޖޮއިންޓް ޓީމެއް މަސައްކަތްކުރާ ގޮތަށެވެ.
މީގެ އިތުރުން އެކައުންސިލުން ބުނީ ގިނަ ތަންތަން ބަލަންޖެހޭތީ، މި އޮޕަރޭޝަން ކުރިއަށްގެންދާ މުއްދަތު އިތުރުކުރަން ވަނީ ނިންމާފައި ކަމަށެވެ. ނަމަވެސް އިތުރުކުރެވޭނީ ކިހާ މުއްދަތެއްކަން ހާމަކޮށްފައެއް ނުވެ އެވެ. މާލޭގައި ހުރި ތަންތަން ބަލައި ނިމުމުން، ވިލިމާލޭގައި ހުރި ކާބޯތަކެތީގެ ޚިދުމަތްދޭ ތަންތަން ވެސް ބަލާނެ ކަމަށް ސިޓީ ކައުންސިލުން ވަނީ ބުނެފައެވެ.
މި އޮޕަރޭޝަނަކީ މާލެ ސަރަހައްދުގައި ކާބޯތަކެތީގެ ޚިދުމަތްދޭ ތަންތަނުގެ ސާފުތާހިރުކަމާއި ރައްކާތެރިކަން ކަށަވަރުކުރުމަށް ކުރިއަށްގެންދާ ޚާއްސަ އޮޕަރޭޝަނެއް ކަމަށް ކައުންސިލުން ފާހަގަކޮށްފައިވެއެވެ.
