އިންޑިއާ އަށް އެތެރެވުމުގެ ކުރިން "އީ-އެރައިވަލް ކާޑު" ފުރަން ޖެހޭ ގޮތައް ހަދައިފި
އިންޑިއާއަށް ދަތުރުކުރާ ފަރާތްތަކުން ފުރުމުގެ 72 ގަޑިއިރު ކުރިން އީ-އެރައިވަލް ކާޑު ފުރިހަމަ ކުރަން ޖެހޭ
އިންޑިއާގެ ކެރެލާގެ ޓްރިވެންޑްރަމް އިންޓަނޭޝަނަލް އެއާޕޯޓުގައި ފަސިންޖަރުން ޕާސްޕޯޓް ކޮންޓްރޯލް ގައި ކިޔު ޖެހިފައި
އިންޑިއާ އަށް ދަތުރުކުރާ ކޮންމެ ޕެސެންޖަރަކު ވެސް އެ ޤައުމަށް އެތެރެވުމުގެ ކުރިން "އީ-އެރައިވަލް ކާޑު" އޮންލައިންކޮށް ފުރިހަމަ ކުރަން ޖެހޭ ގޮތަށް ހަދައިފިއެވެ.
ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ މިއީ އިންޑިއާގެ އިމިގްރޭޝަންގެ އުސޫލުތަކަށް ގެނައި ބަދަލުތަކަކާ ގުޅިގެން 10 އޮކްޓޫބަރު 2025 އިން ފެށިގެން އަމަލު ކުރަން ފެށި އުސޫލެއް ކަމުގައެވެ.
މިގޮތުން، އިންޑިއާއަށް ދަތުރުކުރާ ކޮންމެ ޕެސެންޖަރަކުވެސް ފުރުމުގެ ކުރިން 72 ގަޑިއިރުތެރޭގައި މި ފޯމު ފުރަން ޖެހޭނެ ކަމަށް ފޮރިން މިނިސްޓްރީން ވަނީ ބުނެފައެވެ.
މީގެ ސަބަބުން، އިންޑިއާ އިން ދިވެހިންނަށް ވިސާ ދިނުމަށް ހަމަޖެހިފައިވާ އިންތިޒާމަކަށް ނުވަތަ ސިޔާސަތަކަށް ބަދަލެއް އައިސްފައިނުވާ ކަމަށް ވެސް ފޮރިން މިނިސްޓްރީން ބުނެފައިވެއެވެ.
އިންޑިއާ އަށް ދަތުރުކުރާ ފަރާތްތަކުން ދަތުރު ކުރުމުގެ ކުރިން "އީ-އެރައިވަލް ކާޑު" އޮންލައިންކޮށް ފުރުމަށް ފޮރިން މިނިސްޓްރީން ވަނީ އިލްތިމާސް ކޮށްފައެވެ.
މި ފޯމް ފުރިހަމަކުރަން ބޭނުން ކުރާނެ ލިންކަކީ:
https://indianvisaonline.gov.in/earrival/
