ބޮޑުފޮޅުދޫ ކައުންސިލުން ލާމަރުކަޒީ ނިޒާމަށް ބަދަލު ގެނައުމާ ދެކޮޅު، މުޢިއްޒަށް ގޮވާލީ ކައުންސިލްތަކުން ދައްކާ ވާހަކަ އަޑު އެއްސެވުމަށް
ލާމަރުކަޒީ ނިޒާމަށް މިފަހުން ގެނައި ބަދަލާއި ގުޅިގެން ކައުންސިލްތަކަށް ދަތިވާނެ
ރައީސް މުޢިއްޒު ބޮޑުފޮޅަދު ރައްޔިތުންނާއެކު ބޭއްވި ބައްދަލުވުމުގެ ތެރެއިން
ލާމަރުކަޒީ ނިޒާމަށް މިފަހުން ގެނައި ބަދަލާއި ގުޅިގެން ކައުންސިތަކަށް ވަރަށް ބޮޑަށް ދަތިވާނެ ކަމަށާއި އެކަމާއި މެދު އަލުން ވިސްނަވައި ކައުންސިލްތަކުގެ އަޑު އެއްސެވުމަށް ރައީސް މުހައްމަދު މުއިއްޒުއަށް ބޮޑުފޮޅުދޫ ކައުންސިލުން ގޮވާލައްވައިފި އެވެ.
އަރިއަތޮޅު އުތުރުބުރީގެ މީހުން ދިރިއުޅޭ ރަށްރަށަށް ރައީސް މުޢިއްޒު މިހާރު ކުރައްވަމުން ގެންދަވާ ދަތުރުފުޅުގައި ބޮޑުފޮޅުދޫ ރައްޔިތުންނާއެކު ބެއްވި ބައްދަލުވުމުގައި ވާހަކަ ދައްކަވަމުން އެ ކައުންސިލްގެ ރައީސް ޝުޖާއު އާދަމް ވިދާޅުވީ، ލާމަރުކަޒީ ނިޒާމަށް މިފަހުން ގެނެވިގެން ދިޔަ ބަދަލުން ކައުންސިލްތަކަށް ވަރަށް ދަތިވާނެ ކަމަށާއި ހާއްސަ ގޮތެއްގައި ސިޓީއެއް ފޮނުވައިގެންވެސް ޖަވާބެއް ނުލިބި ތިބެންޖެހޭ ޖެހުން އެއީ ރައްޔިތުންނަށް ދޭ ހިދުމަތްތަކަށް ބުރުއަރާ ކަމެއް ކަމަށެވެ.
ވަރަށް ބޮޑަށް އަޅުގަނޑު ރައީސް ކިބައިން އެދެން އެންމެ ފަހުން މިގެނައި ބަދަލާމެދު އިތުރަށް ވިސްނުންފުޅު ބަހައްޓަވާ އަޅުގަނޑުމެން ކައުންސިލްތަކަށް ފަސޭހަވާނެ ގޮތަކަށް އަދިވެސް މިކަން ކޮށްދެއްވުން،ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް
އޭނާ ވިދާޅުވި ތިން މެންބަރުން ލައިގެން ކައުންސިލް ހިންގުމަކީ ވަރަށް ދަތި ކަމެއް ކަމަށާއި އެހެންކަމުން ކައުންސިލްތަކަށް ދަތި ނުވެ ހިންގޭނެ ގޮތަކަށް ފަސް މެންބަރުން އެކުލެވޭ ކޮމެޓީއެއް ނުވަތަ ކައުންސިލެއް އޮތުމަކީ ވަރަށް މުހިންމު ކަމެއް ކަމަށެވެ. އަދި އަތޮޅު ކައުންސިލްތަކަކީ ލާމަރުކަޒީ ނިޒާމުގެ މުހިންމު އަސާސެއްކަން ޝުޖާއު ވިދާޅުވި އެވެ.
މީގެ އިތުރުން އޭނާ ވިދާޅުވީ މަދު ކައުންސިލަކުން އެކައުންސިލްގެ ކަންކަން ނުހިނގާގޮތައް ބައްޓަން ކުރެވިފަ ހުރުމަކީ މުޅި ނިޒާމަށް ބަދަލު ގެންނަންޖެހޭ ކަމެއްގެ ގޮތުގައި ގަބޫލު ނުކުރެވޭ ކަމަށެވެ. އަތޮޅު ކައުންސިލުން އަތޮޅު ލެވެލްގައި ރަށްރަށުގައި ކަންކަން ހިންގާ ކަމަށާއި ގައުމީ ފެންވަރަށް ކުދިން ނެރެވި މީހުން ބިނާ ކުރެވޭ ކަމަށް ޝުޖާއު ވިދާޅުވި އެވެ. އެހެންކަމުން އަތޮޅު ކައުންސިލާ މެދުގައިވެސް ދެވަނަ ވިސްނުމަކަށް ދިއުމަށް އޭނާ ވަނީ ގޮވައިލައްވައިފަ އެވެ.
ލާމަޒުކަޒީ ނިޒާމު ޗެމްޕިއަން ކުރެވޭނީ މާލީ މިނިވަންކަން ފޯރުކޮށްދީ މަޝްރޫއުތައް ވެސް ކައުންސިލްތަކަށް ދީގެން ކަމަށް ދެކޭ ކަމުގައި އޭނާ ވިދާޅުވި އެވެ.
