ލ.ގަމު ލިންކް ރޯޑުގައި މިދިޔަ މަހު 6 ވަނަ ދުވަހު ހިނގި އެކްސިޑެންޓްގައި އަނިޔާވި މީހަކު، ހޮސްޕިޓަލުގައި ފަރުވާދެމުން ދަނިކޮށް ނިޔާވެއްޖެއެވެ.

މައުލޫމާތު ލިބިފައިވާ ގޮތުން ޖުލައި މަހުގެ 6 ވަނަ ދުވަހު ހެނދުނު 9 ޖަހާ ކަންހާއިރު މި އެކްސިޑެންޓް ހިނގީ ފޮނަދޫ އިން ގަމަށް ދަތުރު ކުރަމުން ދިޔަ ސައިކަލެއް މަގުމަތީގައި ހުރި ހޮޅިދަނޑިއެއްގައި ޖެހިގެންނެވެ. އެކްސިޑެންޓްގައި އަނިޔާވީ ސައިކަލުގައި ތިބި ދެ އަންހެނަކަށެވެ.

އެ ހާދިސާގައި ސައިކަލުގައި ތިބި ދެ މީހުންނަށް އަނިޔާވެގެން ގަމު ރީޖަނަލް ހޮސްޕިޓަލަށް ގެންދިޔަ ކަމަށް އޭރު ފުލުހުން ބުންޏެވެ.

މި އެކްސިޑެންޓްގައި ހާލުބޮޑުވެގެން މާލެ ގެނެސް އައިޖީއެމްއެޗްގައި ފަރުވާދެމުންދިޔަ އަންހެނަކު ބުރާސްފަތި ދުވަހު ހެނދުނު ނިޔާވެފައި ވާކަމަށް އެހޮސްޕިޓަލުން ކަށަވަރު ކޮށްދީފައިވެއެވެ.

މައުލޫމާތު ލިބިފައިވާގޮތުން ނިޔާވެފައިވަނީ ކ. ގުރައިދޫ އަށް ނިސްބަތްވާ މީހެކެވެ.