އިސްރާއީލް އިން ނޫސްވެރިންތަކެއް ޝަހީދުކޮށްލުން އީޔޫ އިން ކުށްވެރި ކޮށްފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ކަވަރު ކުރުމަށް މަސައްކަތް ކުރަމުން ދިޔަ ނޫސްވެރިން ތަކަކަށް އަމާޒުކޮށް އިސްރާއީލްގެ އަސްކަރިއްޔާ އިން ދިން ހަމަލާގައި ނޫސްވެރިންތަކެއް ޝަހީދު ކޮށްލާފައި ވާތީ، ޔޫރަޕިއަން ޔޫނިއަން (އީޔޫ) އިން އެކަން ކުށްވެރި ކޮށްފި އެވެ.

އިސްރާއީލްގެ ވައިގެ ހަމަލާއެއްގައި ވަނީ އަލް ޖަޒީރާ އަށް ނިސްބަތްވާ ފަސް ނޫސްވެރިޔަކު ޝަހީދު ކޮށްލައިފަ އެވެ. އެކަމާ ގުޅިގެން ޔޫރަޕިއަން ޔޫނިއަންގެ ފޮރިން ޕޮލިސީގެ ވެރިޔާ، ކާޖާ ކަލާސް ވަނީ ކަންބޮޑުވުން ފާޅު ކުރައްވައިފަ އެވެ. އެގޮތުން ޔޫރަޕިއަން ޔޫނިއަންގެ ފޮރިން މިނިސްޓަރުގެ ބައްދަލުވުމެއްގައި އޭނާ ވަނީ އެކަން ފާހަގަ ކުރައްވައިފަ އެވެ. 

އަލް ޝިފާ ހޮސްޕިޓަލްގެ ކައިރީގައި ދިން ވައިގެ ހަމަލާގައި ޝަހީދުވި ނޫސްވެރިންގެ ތެރޭގައި އަލް ޖަޒީރާގެ ކޮންސްޕޮންޑެންޓް އަނަސް އަލް ޝަރީފް ވެސް ހިމެނެ އެވެ. އިސްރާއީލްގެ އަސްކަރިއްޔާ އިން ބުނެފައި ވަނީ، އަނަސް އަކީ ހަމާސް ޖަމާއަތަށް އެހީތެރިވަމުން އަންނަ "ޓެރަރިސްޓެއް" ކަމަށެވެ. އަދި އޭނާ އަކީ އެކަމުގެ އިސްވެރިއެއް ކަމަށާއި، ހަމާސް އިން އިސްރާއީލް އަށް ރޮކެޓު ހަމަލާ ދިނުމުގައި އަނަސްގެ ދައުރު އޮތް ކަމަށެވެ. 

ކަލާސް ވިދާޅުވީ އިސްރާއީލް އިން ކޮށްފައިވާ އެ ތުހުމަތުތަކަށް ޔޫރަޕިއަން ޔޫނިއަން އިން ސަމާލުކަމެއް ދޭ ކަމަށެވެ. ނަމަވެސް، މިފަދަ ޙާލަތްތަކުގައި ޤާނޫނުގެ ވެރިކަމަށް އިޙުތިރާމް ކުރުމާ އެކު، ނޫސްވެރިންނަށް ހަަމަލާ ނުދިނުމަށް އޭނާ ވަނީ އިލްތިމާސް ކޮށްފަ އެވެ. އަދި އެކަމަކީ އެއްވެސް ޙާލަތެއްގައި ބަލައި ގަނެވޭނެ ކަމެއް ނޫން ކަމަށާއި، އަދި އެއީ ކަންބޮޑުވާ ކަމެއް ކަމަށް ވެސް ވިދާޅުވެފައިވެ އެވެ. 

މީގެ އިތުރުން އިސްރާއީލް އިން އެ ފަދަ ތުހުމަތެއް ކުރާ ނަމަ، އެކަމާ ގުޅުން ހުރި ސާފު ހެކިތައް ދައްކަން ޖެހޭނެ ކަމަށާއި، އެކަން ހުށަހަޅަން ޖެހޭނެ ކަމަށް ވެސް ކަލާސް ވަނީ ފާހަގަ ކުރައްވައިފަ އެވެ. 

ޔޫރަޕިއަން ޔޫނިއަންގައި 27 ޤައުމު އެކުލެވޭއިރު، ޔޫރަޕިއަން ޔޫނިއަންގެ މެމްބަރު ޤައުމުތައް ވަނީ އިސްރާއީލް އަދި ފަލަސްޠީނުގެ މައްސަލައިގައި ދެބައިވެފަ އެވެ. ނަމަވެސް، ޣައްޒާ އަށް ބޭނުންވާ އިންސާނީ އެހީތެރިކަމާއި، ކާބޯ ތަކެއްޗާއި އަދި ބޭސް ފަރުވާގެ އާލާތް ފޯރުކޮށްދިނުމުގައި ހުރިހާ ޤައުމަކުން ވެސް އެއްބަސްވެ އެވެ. 

އެހެން ނަމަވެސް، މިއަދާ ހަމައަށް އައިރު ވެސް، އެ އެއްބަސްވުން އެންމެ ފުރިހަމަ އަށް ތަންފީޒު ކުރެވިފައި ނުވެ އެވެ. ޔޫރަޕިއަން ޔޫނިއަންގެ ފޮރިން ޕޮލިސީގެ ވެރިޔާ އިސްރާއީލް އަށް ގޮވާލާފައި ވަނީ، ޣައްޒާ އަށް ބޭނުންވާ އިތުރު އެހީ އަވަހަށް އެތެރު ކުރުމުގެ ފުރުސަތު ދިނުމަށެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާާމަ އިތުރަށް ފުޅާކޮށް، މުޅި ޣައްޒާ އެއްކޮށް ހިފުމަށް މިހާރު ވަނީ ފާސްކޮށްފަ އެވެ. އަދި އެކަން ތަންފީޒު ކުރާނެ ކަމަށް ހާމަ ކޮށްފައިވާއިރު، އިސްރާއީލް އިން ޣައްޒާ އަށް ދެމުން އަންނަ ހަމަލާތައް ވަނީ އިތުރު ކޮށްފަ އެވެ.