އީޔޫގެ އެހީތެރިކަމަށް ފޮރިން މިނިސްޓަރ ތައުރީފް ކުރައްވައިފި

ޔޫރަޕިއަން ޔޫނިއަންއާ ރާއްޖެއާމެދު އޮތް ގުޅުމުގެ އަގު ރާއްޖެއިން ވަރަށްބޮޑަށް ވަޒަން ކުރާކަމަށް ރާއްޖޭގެ ފޮރިން މިނިސްޓަރ މުހައްމަދު އާސިމް އަންގާރަ ދުވަހު ވިދާޅުވެއްޖެއެވެ.

ޔޫރަޕިއަން ޔޫނިއަންއާ ދިވެހި ސަރުކާރާދެމެދު އަންގާރަ ދުވަހު ބަނޑޮސް އައިލެންޑްގައި ބޭއްވި ބައްދަލުވުމުގައި މިނިސްޓަރ އާސިމްވަނީ އީޔޫއާ އެ ޖަ ޖަމާއަތުގެ މެމްބަރު ގައުމުތަކުން ރާއްޖެއަށް، މޫސުމަށް އަންނަ ބަދަލުތަކުގެ ސަބުން ދިމާވާ މައްސަލަތަކަށާއި، ޝަރުއީ ދާއިރާއަށާއި،ޓެރެރިޒަމާއި ހައްދުފަހަނައެޅުމާ ދެކޮޅަށް ކުރާ މަސައްކަތުގައި ދޭ އެއްބާރުލަމަށް ޝުކުރު އަދާކުރައްވާފައި ކަމަށް ފޮރިން މިނިސްޓްރީގެ ވެބްސައިޓްގައިވާ ބަޔާނުގައިވެއެވެ.

"މީގެއިތުރުން މިނިސްޓަރ އާސިމް ވަނީ އީޔޫ ޕޮލިސީ ޑައިލޮގަކީ އީޔޫއާ ދިވެހި ރާއްޖެއާ ދެމެދު އެކި ދާއިރާތަކުން ގުޅުން އިތުރަށް ބަދަހިކޮށް އެއްބާރުލުން އިތުރުކުރުމަށް ދެ ފަރާތުގެ މެދުގައި ދެކެވޭ ވާހަކަތަކެއްކަމަށް" ވިދާޅުވެފައި ވާކަމަށް ބަޔާނުގައިވެއެވެ.

މީގެ އިތުރުން ދެ ފަރާތުންވެސް އެ ކަންކަމަކާ ކަންބޮޑުވާ ކަންކަމާ ބެހޭގޮތުންވެސް މަޝްވަރާ ކުރެވިފައިވާކަމަށް ފޮރިންމިނިސްޓްރީއިން ބުނެފައިވެއެވެ. އޭގެ ތެރޭގައި މުސްލިމުންނާމެދު ނަފްރަތް އުފެއްދުމާއި އިސްލާމް ދީނާ ދެކޮޅަށް ޔޫރަޕްގައި ކަނާތުފިޔައިގެ ސިޔާސީ ލީޑަރުން ވާހަކަދެއްކެވުން ފާހަގަކުރައްވާފައިވެއެވެ.

މީގެ އިތުރުން ޔޫރަޕްގައި ހިންގޭ ރުޅިވެރިކަމުގެ އަމަލުތަކުގެ ވާހަކަ ފާހަގަކުރައްވާފައިވެއެވެ.

މި ބައްދަލުވުމުގައި، ކޮލަމްބޯއާއި ދިއްލީގައި ތިއްބަވާ އެމްބަސެޑަރުންނާއި އީޔޫގެ އެކި ގައުމުތަކުގެ މިޝަންތަކުގެ ވެރިންގެ ތެރެއިން އީޔޫގެ 9 ގައުމަކުން ބޭފުޅުން ބައިވެރިވެ ވަޑައިގެންފައިވާކަމަށް ބުނެފައިވެއެވެ.

އީޔޫ ވަފްދުގެ އިސްވެރިޔަކަށް ހުންނެވީ ޔޫރަޕިއަން ޔޫނިއަންއިން ރާއްޖެއަށް ކަނޑައަޅުއްވާފައިވާ އެމްބަސެޑަރ ތުންގ ލައި މާގެ އެވެ.

ޔޫރަޕިއަން ޔޫނިއަންއަށް ތައުރީފްކުރައްވާ ފޮރިން މިނިސްޓަރ ވާހަކަފުޅު ދައްކަވާފައިވާއިރު ރައީސް އަބްދުﷲ ޔާމީން ވެރިކަމަށް ވަޑައިގެންނެވިފަހުން އެ މަނިކުފާނު ޔޫރަޕްގެ އެއްވެސް ގައުމަކަށް ރަސްމީ ދަތުރުފުޅެއް ކުރައްވާފައެއް ނުވެއެވެ.އަދި މި ސަރުކާރުގެ ވިސްނުން ހުރީ އިރުމައްޗާ ދިމާލަށްކަމަށް ރައީސް ޔާމީން ވަނީ ވިދާޅުެވެފަެއެެވެ. މީގެ އިތުރުން ރާއްޖިން ގަބޫލުކުރާ ގަބޫލްކުރުންތަކެއްގެ ސަބަބުން ރާއްޖެއާމެދު ތަފާތު ކުރާކަމަށް ވިދާޅުވެ ރައީސް ޔާމީން ވަނީ ޔޫރަޕަށް ފާޑުވިދާޅުވެފައެވެ.