މެންޗެސްޓާ ހަމަލާ: ތަހުގީގައި ގުޅޭ މައުލޫމާތު އެމެރިކާ މީޑިއާގައި ލީކުވުން ރައީސް ޓްރަމްޕް ކުށްވެރި ކުރައްވައިފި

އިނގިރޭސިވިލާތުގެ މެންޗެސްޓާ ސިޓީގައި ދެވުނު ބޮމުގެ ހަމަލާގެ ތަހުގީގައި ބެހޭ މައުލޫމާތު އެމެރިކާގެ މީޑިއާގައި ލީކުވެގެން ދިޔަ ދިއުން އެމެރިކާގެ ރައީސް ޑޮނަލްޑް ޓްރަމްޕް ކުށްވެރިކުރައްވައިފިއެވެ.

ރައީސް ޓްރަމްޕް ވިދާޅުވީ ތަހުގީގައި ބެހޭ މައުލޫމާތު އެމެރިކާގެ މީޑިއާ އަށް ލީކު ވުމަކީ "ވަރަށް ކަންބޮޑުވެ ވަޑައިގަންނަވާ" ކަމެއް ކަމަށާއި އަދި އެއީ އެމެރިކާގެ "ގައުމީ ސަލާމަތަށް ހުރި ވަރަށް ބޮޑު ނުރައްކަލެއް ކަމަށެވެ." އަދި ޓްރަމްޕް ވަނި ކަމުގެ އެންމެ ފުނަށް ވާސިލުވާނެ ކަމަށް ވައުދުވެވަޑައިގެންފައެެވެ.

އެމެރިކާގެ މީޑިއާ އިން ވަނީ ހޯމަ ދުވަހުގެ ރޭ މެންޗެސްޓާ އެރީނާގައި ދިން ބޮމުގެ ހަަމަލާގެ ހެކި، ފޮޓޯގެ ޒަރީއާއިން ޝާއިއު ކޮށްފައެވެ.

މިކަމާ ގުޅިގެން އިނގިރޭސި ފުލުހުން ވަނީ އެމެރިކާއާ މައުލޫމާތު ހިއްސާ ކުރުން ހުއްޓާލައިފައިވާ ކަމަށް ބުނެފައެވެ. އެހެން ނަމަވެސް ފަހުން އެ ނިންމުން ވަނީ ބަދަލުކޮށްފައެވެ.

ބުދަ ދުވަހު އެމެރިކާގެ ނިއު ޔޯކް ޓައިމްސް އިން ވަނީ މެންޗެސްޓާ ސިޓީގައި ދިން ބޮމުގެ ހަމަލާގެ ކްރައިމް ސީންގެ މަންޒަރުތައް، ބޮމުގެ އެތިކޮޅުތައް ހިމެނޭ ގޮތަށް، ފޯޓޯތަކެއް ޝާއިއުކޮށްފައެވެ. މިކަމާ ގުޅިގެން އިނގިރޭސި ފުލުހުންނާއި އަދި ސަރުކާރުގެ އޮފިޝަލުން ވަނީ ވަރަށް ހިތްހަމަނުޖެހިފައެވެ. އިނގިރޭސި ފުލުހުން ބުނެފައި ވަނީ އެމެރިކާގެ މީޑިއާގެ އަމަލު ސަބަބުން ތަހުގީގަށް ހުރަސްއެޅިފައިވާ ކަމަށާއި އަދި މިހާރުވެސް ނުހަނު ހިތާމައިގައި ތިބި އާއިލާތަކަށް އިތުރު ހިތްދަތިކަމެއް ލިބިފައިވާ ކަމަށެވެ.

މިކަމާއި ގުޅިގެން ބެލްޖިއަމް ގައި ހުންނަވާ ރައީސް ޓްރަމްްޕް މިކަން ކުށްވެރިކުރައްވާ އިތުރަށް ވިދާޅުވީ މިކަން ހިނގައި ދިޔަ ގޮތް ބެލުމަށް އެމެރިކާގެ ޖަސްޓިސް ޑިޕާޓްމަންޓުގައި އެދިވަޑައިގަންނަވާނެ ކަމަށެވެ. އަދި މިކަން ކުރި ފަރާތެއް ހޯދުމަށް ފަހު އެކަމަށް ފުރުސަތު ތަންދޭ ނަމަ ކުރި ފަރާތެއްގެ މައްޗަށް ދައުވާ ވެސް ކުރަން ޖެހޭނެ ކަމަށެވެ.

ހޯމަ ދުވަހު މެންޗެސްޓަރ އެރީނާގައި ދިން ބޮމުގެ ހަމަލާގައި 22 މީހުން މަރުވެ 116 މީހުން ޒަޚަމްވިއިރު މަރުވި މީހުންގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.