ކާބުލްގެ ޑިޕްލޮމެޓިކް ސަރަހައްދަށް ދިން ހަމަލާ ރައީސް އަޝްރަފް ޣަނީ ކުށްވެރި ކުރައްވައިފި

އަފްޣާނިސްތާނުގެ ވެރިރަށް ކާބުލްގެ ޑިޕްލޮމެޓިކް ސަރަހައްދެއްގައި ގޮއްވާލި ބާރުގަދަ ބޮމުގެ ހަމަލާ، އެގައުމުގެ ރައީސް އަޝްރަފް ޣަނީ ކުށްވެރި ކުރައްވައިފިއެވެ.

ބުދަ ދުވަހު ގޮއްވާލި މި ބޮމުގެ ހާދިސާ ގައި މަދުވެގެން 90 މީހުން މަރުވިއެވެ.

ބުދަ ދުވަހު ދިން މިހަމަލާ އޮފިޝަލުން ސިފަ ކޮށްފައި ވަނީ ކާބުލްގައި ދިން "އެންމެ ބޮޑު އެއް ހަމަލާ"ގެ ގޮތުގައެވެ. ޚަބަރުތައް ބުނާ ގޮތުން ބުދަ ދުވަހު މި ގޮވުން ގޮވާފައި ވަނީ ކާބުލްގެ 10 ވަނަ ޑިސްޓްރިކްޓް ކަމަށްވާ ޒަންބަޤް ސްކްއެއަރ ކައިރިންނެވެ. އެއީ ޖަރުމަނު އެމްބަސީގެ ކައިރިއެވެ.

ސެކިޔުރިޓީ ވަރުގަަދަ ކާބުލްގެ ޑިޕްލޮމެޓިކް ސަރަހައްދުގައި ދިން ހަމަލާ ދީފައި ޓޭންކަރެއްގައި ގޮވާތަކެތި ފޮރުވާފަ ބަހައްޓާފައެވެ. މި ހަަމަލާ ގައި 400 އެއްހާ މީހުން ޒަޚަމްވިއެވެ.

މިހާތަނަށް އެއްވެސް ފަރާތަކުން ހަމަލާގެ ޒިންމާ ނަގާފައި ނުވާއިރު، މިފަހުން ކާބުލްގައި ދިން ބޮމުގެ ހަމަލާތަކުގެ ޒިންމާ ނަގާފައި ވަނީ ތާލިބާން ނުވަތަ އިސްލާމިކް ސްޓޭޓް (އައިއެސް) އިންނެވެ.

ކާބުލްގެ ފުލުހުންގެ ތަރުޖަމާނު ބަސީރު މުޖާހިދް ރޮއިޓާސްގައި ވިދާޅުވީ މި ގޮވުން ގޮވާފައި ވަނީ ޖަރުމަނު އެމްބަސީކައިރީގައި ކަމަށާއި ހަމަލާ އަމާޒުކޮށްފައިވަނީ ކޮންތަނަކަށް ކަން ބުނަން ދަތި ކަމަށެވެ. އެ ސަރަހައްދުގައި އެތައް އިމާރާތްތަކެއް ހުންނައިރު އިނގިރޭސިވިލާތުގެ އެމްބަސީއާ އިންޑިއާ އެމްބަސީ އަދި ރިޔާސީ ގަނޑުވަރު ވެސް ހިމެނެއެވެ.

ސަލާމަތީ ގޮތުން އެހާ ވަރުގަދަ ސަރަހަދެއްގައި މިހާ ވަރުގަދަ ހަމަލާއެއް ދެވުނު ގޮތަކާ މެދު ސުވާލު އުފެދިގެން ދާނެއެވެ. އެ ސަރަހައްދަކީ މީޓަރު އުސް ފާރެއްލައި ރައްކާތެރި ސަރަހައްދެއްގެ ގޮތުގައި ކަނޑައަޅާފައިވާ ސަރަހައްދެކެވެ.

ބޮމުގެ ހަމަލާގެ ޝިކާރައަކަށް ވި ގިނަ މީހުންނަކީ އަފްޣާން ރައްޔިތުންނެވެ. ހަމަލާގައި އެމެރިކާގެ 11 ރައްޔިތަކު ޒަޚަމްވި އިރު ޖަރުމަނުގެ އެމްބަސީގެ މުވައްޒަފުން ވެސް ޒަޚަމްވިއެވެ. މިހަމަލާ ގައި ބީބީސީ އަފްގާންގެ ޑްރައިވަރުވެސް މަރުވިއެވެ. އަދި ބީބީސީގެ އިތުރު ހަތަރު މުވައްޒަފަކުވެސް މަރުވިއެވެ.

އެތައް ގައުމެއްގެ އެމްބަސީ އިމާރާތަށް ގެއްލުންވިކަމަށް ރިޕޯޓުކޮށްފައި ވެއެވެ. އޭގެތެރޭގައި ފްރާންސް އަދި ތުރުކީ އެމްބަސީ ހިމެނެއެވެ.