ރަހީނުންގެ އާއިލާތަކަށް ވިކްޓޮފް ވިދާޅުވީ، ހަނގުރާމަ ނިންމުމަށް މަސައްކަތް ކުރަމުންދާ ކަމަށް

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް މަސައްކަތް ކުރަމުން އަންނަ ކަމަށް، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިކްޓޮފް ވިދާޅުވެއްޖެ އެވެ.

ވިކްޓޮފް މިހެން ވިދާޅުވީ، ޣައްޒާ ހަނގުރާމައިގައި ހަމާސް ޖަމާއަތުން ރަހީނު ކޮށްފައިވާ މީހުންގެ އާއިލާ މެމްބަރުންނާ ބައްދަލު ކުރައްވައި ވާހަކަ ދައްކަވަމުންނެވެ. އެ އާއިލާތަކާ ބައްދަލު ކުރައްވައި ވިކްޓޮފް ވިދާޅުވީ، ޣައްޒާ ހަނގުރާމަ ނިމުމަކަށް ގެނައުމަށް ވަރަށް ބޮޑަށް މަސައްކަތް ކުރައްްވަމުން ގެންދަވާ ކަމަށެވެ.

ވިކްޓޮފް ވިދާޅުވީ އިސްރާއީލް އިން ޣައްޒާގައި ހިންގަމުން އަންނަ އަނިޔާވެރި ހަނގުރާމަ ނިންމުމަށް، އިސްރާއީލްގެ ސަރުކާރާ އެކު މަޝްވަރާތައް ކުރިއަށް ގެންދަމުން އަންނަ ކަމަށެވެ. އާއިލާތަކުގެ މެމްބަރުންނާ ބައްދަލު ކުރައްވައި ވިކްޓޮފް މި ވާހަކަ ދައްކަވާފައި ވަނީ، ރަހީނުން މިނިވަން ކުރުމުގެ މަސައްކަތް ކުރަމުން އަންނަ ކަަމަށް އިސްރާއީލްގެ ސަރުކާރުން ވެސް އެތައް ފަހަރެއްގެ މަތިން ބުނެފައި ވަނިކޮށެވެ.

ރޮއިޓަރސްގެ ނޫސްވެރިންގެ ވެސް އެ ސަރަހައްދުގައި ތިބިއިރު، ވިކްޓޮފް ވިދާޅުވެފައި ވަނީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ އެކު މަޝްވަރާތައް ކުރިއަށް ގެންދަމުން އަންނަ ކަމަށާއި، ޣައްޒާ އަލުން ބިނާ ކުރުމުގެ ރަނގަޅު ވިސްނުން ތަކަކަށް މަސައްކަތް ކުރައްވަނުން ގެންދަވާ ކަމަށެވެ. އަދި އޭގެ މާނައަކީ ހަނގުރާމަ ނިމުމަށް މަގު ފަހިވުން ކަމަށް ވެސް އޭނާ ވަނީ ވިދާޅުވެފައި ވެއެވެ. 

ނަމަވެސް ހަމާސް ޖަމާއަތުން ބުނެފައި ވަނީ، ފުރިހަމަ އަލިއްލަ ވެރިކަން އޮންނަ އަދި ޖެރޫސަލަމް އަކީ އޭގެ ވެރި ރަށް ކަމަށްވާ ފަލަސްޠީނުގެ ދައުލަތެއް ޤާއިމު ނުުކުރެވޭހާ ހިނދަކު، ހަތިޔާރުގެ މުއާމަލާތް އެ ޖަމާއަތުން ދޫ ނުކުރާނެ ކަމަށެވެ. 

2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިސްރާއީލަށް އަމާޒުކޮށް ދިން ހަމަލާގައި، އިސްރާއީލްގެ 1200 މީހުން ވަނީ މަރުވެފަ އެވެ. އަދި ހަމާސް ޖަމާއަތުން ވަނީ އިސްރާއީލްގެ 251 މީހަކު ރަހީނު ކޮށްފަ އެވެ. 

އޭގެ ތެރެއިން ބައެއް ރަހީނުން މިނިވަން ކޮށްފައިވާއިރު، ހަމާސްގެ ބެލުމުގެ ދަށުގައި މިވަގުތު ތިބީ 50 މީހުން ކަމަށް ވަނީ ހާމަކޮށްފަ އެވެ. އޭގެ ތެރެއިން ދުނިޔޭގައި ތިބީ 20 މީހުން ކަަމަށް ވެސް ހާމަކޮށްފައިވެ އެވެ. 

އެ ހަމަލާތަކާ ގުޅިގެން އިސްރާއީލް އިން ދޭން ފެށި ހަމަލާތަކުގައި، ޣައްޒާ ހަނގުރާމައިގައި މިހާތަނަށް ވަނީ 60،000 އަށް ވުރެ ގިނަ މީހުން ޝަހީދުވެފަ އެވެ. އަދި އެތައް ބަޔަކަށް އިތުރު ޒަޚަމްތައް ލިބިފައިވާ ކަމަށް ވަނީ ހާމަ ކޮށްފަ އެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް އެމެރިކާ އިސްވެ ވަނީ، ހުށަހެޅުމެއް ހުށަހަޅައިފަ އެވެ. ޤަތަރުގެ ވެރި ރަށް ދޯހާގައި އެ ހުށަހެޅުމުގެ މަޝްވަރާތައް ކުރިއަށް ގެންދިޔަ ނަމަވެސް، ވަކި ހިސާބަކުން ވަނީ މަޝްވަރާތައް މެދު ކެނޑިފަ އެވެ.