މަޖުބޫރު ކުރުވި އިސްތިއުފާ
30 ޖުލައި 2025 | ބުދަ 12:33މައުރޫފްގެ ކުއްލި ރިޓަޔާމަންޓާ، ގުޅިގެން އެތަކެއް ސުވާލުތަކެއް އުފެދިފައި ވަނިކޮށް ކުއްލިއަކަށް މިއަދު އެވަނީ މަގާމުން އިސްތިއުފާ ވެސް ދެއްވާފަ އެވެ.
އެޗްޑީސީގެ އެމްޑީގެ މަގާމުހައި ހުންނެވި މައުރޫފް މަގާމުން އިސްތިއުފާ ދެއްވުން
އެއީ މީގެ ހައެއްކަ މަސް ކުރިއެވެ. މިދިޔަ އަހަރުގެ ޑިސެންބަރު މަހުގެ 22 ވަނަ ދުވަހު މައުރޫފް, ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އިސްވެރިއަކަށް އަނެއްކާ ވެސް ހަވާލުވެވަޑައިގަތީއެވެ.
އެދުވަހު ވެސް ގިނަ ބަޔަކު ކުރެއްވި ސުވާލެއް އޮތެވެ. މައުރޫފް ޖަމީލް ފަދަ ބޭފުޅަކު އަނެއްކާ ވެސް އެނބުރި އެ ވަޑައިގެނެވީ ކީއްކުރަން ބާއެވެ. ހަމަ ގައިމުވެސް މި ސަރުކާރުގެ އަވައިގައި ޖެހިގެން އެޅި އެ ފިޔަވަޅެއްގެ ސަބަބުން ރަނގަޅަށް ކަމެއް ނުކުރެއްވޭތާ ރީތި ނަމެއް ވެސް ނުލިބޭނެއެވެ. ބޮލުގައި އެޅޭނީ ކޮރަޕްޝަނާއި ވައްކަމުގެ ތުހުމަތު ތަކެވެ.
އެ ވިސްނުން އައީ މި ސަރުކާރުން މިހާތަނަށް ވެސް ކަން ކުރަމުން އަންނަ ގޮތާއި މެދު ވިސްނާލާ ފައެވެ. ރާއްޖޭގެ ފަހުގެ ތާރީހުގައި މި އައި ހުރިހާ ސަރުކާރުތަކުގެ ތެރެއިން މިހާރު މި އޮތް ރައީސް މުއިއްޒުގެ ސަރުކާރުގައި ކަންކަން ހިނގާފައި ވާގޮތުން ދެން ވެސް ރަނގަޅެއް ނުކުމެދާނެ ކަމަށް ގަބޫލު ނުކުރެވޭތީއެވެ. ގާބިލުކަމުގެ އިތުރުން ކަން އޮންނަ އުސޫލުން ކަންކަން ކުރައްވަން އުޅުއްވާ ބޭފުޅުންނަށް އެ ފުރުސަތު މި ސަރުކާރުގައި އޮތްތަން ފެންނަމުން ނުދާތީ އެވެ.
ކޮންމެއަކަސް ކަންކަން ހިނގަމުން މިދަނީ އެންމެން ވެސް ހީކުރި ގޮތަށެވެ. މައުރޫފާއި ސަރުކާރުން މިކަން ހާމަނުކުރި ނަމަވެސް މައުރޫފް އެޗްޑީސީގެ މެނޭޖިން ޑިރެކްޓަރުގެ މަގާމުންވަކިވެ، ރިޓަޔާ ކުރައްވަން ނިންމެވި ދުވަސް ވެސް ނުޖެހެނީސް މިވަނީ އަމިއްލަފުޅަށް މަގާމުން އިސްތިއުފާ ދެއްވާފަ އެވެ. ހަމަ ގައިމުވެސް މިއީ މަގާމާ ހަވާލުވެވަޑައިގެންނެވިއިރު ރޭވިފައި އޮންނާނޭ ގޮތެއް ނޫނެވެ. ސަރުކާރުގެ ވަޒީފާއާ ދުރުގައި, އެތައް އަހަރަކު ހުންނެވުމަށް ފަހު, އެ ވަރުގެ މަގާމަކަށް އެންމެ ހަ މަސް ދުވަހަށް މައުރޫފް ފަދަ ބޭފުޅަކު ވަޑައިގަންނަވާނޭ ކަމަކަށް ހަމަބުއްދި ހުރި އެއްވެސް މީހަކު ގަބޫލެއް ނުކުރާނެއެވެ.
ރައީސް މުއިއްޒުގެ މި ސަރުކާރަށް އަދި މިވީ އެންމެ ދޮޅު އަހަރެވެ. ސަރުކާރުގެ ތެރެއިންނާއި ބޭރުން އެޗްޑީސީއަށް ދިޔައީ ކޮރަޕްޝަންގެ ގިނަ އަމަލުތަކެއް ހިންގާ ކަމުގެ އެތައް ތުހުމަތުތަކެއް ކުރެވެމުންނެވެ. އެންމެ ފަހުން މިދިޔަ އަހަރުގެ ފަހުކޮޅު އެކަން ފަޅައިގެން ދިޔައީއެވެ. މި ސަރުކާރުން އެ ކުންފުނީގެ މެނޭޖިން ޑިރެކްޓަރަކަށް, މިނިސްޓަރު ފެންވަރުގައި ފުރަތަމަ އައްޔަންކުރެއްވި އިބްރާހީމް ފަޒުލް ރަޝީދުގެ މައްޗަށް ކުރެވުނީ އާދައިގެ ތުހުމަތުތަކެއް ނޫނެވެ. އަމިއްލަ މަންފާއާއި ފައިދާތައް ހިތުހުރި ގޮތަކަށް މަގާމުގެ ނާޖާއިޒު ފައިދާ ނަގައިގެން ކަންކަން ކުރެއްވިކަމުގެ ކޮރަޕްޝަންގެ އެތައް ތުހުމަތުތަކެއް ކުރެވުނެވެ.
މި ކަންކަމުގެ ތެރެއިން މި ސަރުކާރަކީ ވައްކަމާއި ކޮރަޕްޝަނުގެ ހާއްޔެއް ކަމުގައި އެންމެ ބުނަން ފެށިއެވެ. ޚާއްސަކޮށް ވަރަށް މުހިންމު ބޭނުމެއްގައި އުފައްދާފައިވާ އެޗްޑީސީއަށް ލިބުނު ނަން ވަރަށް ހުތުރެވެ. އާއްމުންނާއި ވިޔަފާރިވެރިންގެ އިތުބާރު އެ ކުންފުއްޏަށް ގެއްލުނެވެ. އެ ދަނޑިވަޅުގައި މައުރޫފް ފަދަ ގިނަ ބަޔަކު އިހުތިރާމު ކުރާ ބޭފުޅަކު އެޗްޑީސީއާ ހަވާލުވެވަޑައިގެންނެވުމަކީ ސަރުކާރަށާއި އެޗްޑީސީއަށް ވެސް ލިބުނު ބޮޑު ކުރިއެރުމެކެވެ. އެއީ، ގެއްލުނު އިތުބާރު އަލުން ހޯދޭނެ އެ ނޫން ރަނގަޅު އެހެން ގޮތެއް އޭރު ނެތުމުން ނެވެ.
އެ މަގާމަށް މައުރޫފް އައްޔަން ކުރީ އިލްމާއި ތަޖުރިބާގެ ގޮތުން ވެސް އެފަދަ އެހެން ބޭފުލަކު ނެތުމުންނެވެ. ސަބަބަކީ ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި ހުޅުމާލެ ހިއްކުމުގެ މަޝްރޫއު ފެއްޓެވިއިރު އެކަމުގައި އެންމެ އިސްކޮށް އުޅުއްވި އެއްބޭފުޅަކީ ވެސް މައުރޫފެވެ. އެ މަޝްރޫއަށްޓަކައި އޭރުގެ ރައީސް އޮފީހުގެ ދަށުން ހިންގާ ގޮތަށް އުފެއްދި ހުޅުމާލެ ޑިވެލޮޕްމަންޓް ޔުނިޓްގެ އެންމެ އިސްވެރިއަކަށް ވެސް އައްޔަންކުރެއްވީ މައުރޫފެވެ.
މައުރޫފްގެ ކުއްލި ރިޓަޔާމަންޓާ، ގުޅިގެން އެތަކެއް ސުވާލުތަކެއް އުފެދިފައި ވަނިކޮށް ކުއްލިއަކަށް މިއަދު އެވަނީ މަގާމުން އިސްތިއުފާ ވެސް ދެއްވާފަ އެވެ.
ގިނަ ބަޔަކަށް ލިބުނީ ސިހުމެކެވެ. ރިޓަޔާކުރައްވަން އިއުލާނު ކުރި ތާރީޚުގެ ވެސް ކުރިން ކުއްލިއަކަށް އިސްފިއުފާ ދެއްވުމުންނެވެ. އެކަން ކުރައްވަން މައުރޫފަށް މަޖުބޫރު ކުރުވީ ރައީސް މުއިއްޒުގެ އޯޑަރުތަކަށް ކިޔަމަން ނުވުމުން ކަމަށް ވަނީ އެނގިފައެވެ. މައުރޫފު މި ސަރުކާރުން ސިޔާސީ ގޮތުން އަންނަ އޯޑަރުތަކަށް ބޯނުލަނބަ އެވެ. އެހެން ކަމުން އޭނާއަށް މަގާމު ދޫކޮށްލަން މަޖުބޫރު ކުރުވީ އެވެ.
އެޗްޑީސީ އަކީ އަބަދު ވެސް ސިޔާސީ މީހުންނާއި ވިޔަފާރިވެރިންގެ އައްޑާއެއްގެ ގޮތުގައި ބެލެވިފައިވާއިރު، އެ ކުންފުނިން ދޫކޮށްފައި ހުންނަ ބިންތަކުގެ މަހު ކުލި މާފުކޮށްދޭން އެދުމާއި ކުލި ދައްކަން ޖެހޭ މުއްދަތު ފަސްކޮށް ދިނުމަށް އެދުންފަދަ ކަންކަން ކުރުމަށް އެތަނުގެ ވެރިޔަކަށް ހުންނަ މީހާއަށް ޕްރެޝަރު ކުރެއެވެ.
މިފަދަ އޯޑަރުތަކަށް މައުރޫފު ނޯ ޖެއްސެވުމުން ދެން އެ ޖެހުނީ އިސްތިއުފާ ވެސް ދެއްވާ ށެވެ. ސިޔާސީންގެ ބަސް ނޭއްސެވުމުންނެވެ. ރައީސް މުއިއްޒުގެ މި ސަރުކާރުން ސިއްރިއްޔާތުގައި ހިންގާ ކޮރަޕްޝަނުގެ އަމަލުތަކަށް ހުރަސް އެޅުމުންނެވެ.
