ގާނީ: ނުވާނެ ކަމަށް ބުނެ މާޔޫސްކުރުވި، އެކަމަކު އެއީ މިހާރު ބްރޭންޑެއް!

ގައުމުގެ އުފެއްދުންތެރިކަން އިތުރުކުރަން ޖެހެއެވެ. ހުނަރުވެރިކަމާއި ފަންނުވެރިކަން އިތުރުކޮށް، މިފަދަ ހުނަރު ލިބިފައިވާ ޒުވާނުންނަށް ފުރުސަތު ހޯދައިދޭންޖެހެއެވެ. އެގޮތުން އެޒުވާނުންގެ ހުނަރު ތަރައްގީ ކުރުމަށް އެކި މުއައްސަސާތަކާއި ކޮލެޖް، ޔުނިވާސިޓީތައް ގުޅިގެން ތަފާތު ޕްރޮގްރާމްތައް ހިންގައެވެ. މިޕްރޮގްރާމްތަކުން ހުނަރުވެރިކަން ދައްކާލުމަށް ފުރުސަތު ލިބުނު ނަމަވެސް އަމަލީ މައިދާނަށް ނުކުތުމުގެ ފުރުސަތު ލިބެނީ މަދު މީހަކަށޭ ބުނުން ދޮގަކަށް ނުވާނެއެވެ.

ބައެއް ހާލަތްތަކުގައި ހުނަރުވެރި މީހެއްކަމުގައިވީ ނަމަވެސް ހުނަރުގެ ބޭނުން ހިފަން ނޭނގޭ ފަހަރު ވެސް އާދެއެވެ. އަނެއްބައި ހާލަތުގައި މީހުންގެ ފާޑުކިޔުންތަކުގެ ސަބަބުން ފަހަތަށް ޖެހޭ ފަހަރު ވެސް އާދެއެވެ. ނަމަވެސް ހުވަފެން ހަގީގަތަށް ހެދުމަށްޓަކައި މަސައްކަތް ނުކުރާ ކަމަށްވާނަމަ ދުވަހަކު ވެސް ކުރިއަކަށް ނުދާނެއެވެ. އަބަދުވެސް ދާނީ ފަހަތަށެވެ. މީހުން ކިޔާ އެއްޗިއްސަށް ބެލުމެއްނެތި މިގޮތުން ކުރިއަށްދިޔަ އެއްޒުވަނީ އުމުރުން 16 އަހަރުގެ އައިޝަތު ގާނިތާ (ގާނީ) އެވެ.

ދަރުމަންވަންތަ ސްކޫލުން ތައުލީމް ހާސިލް ކުރި ގާނީ އޯލަވަލް ނިންމާލީ މިދިޔަ އަހަރުއެވެ. ރަނގަޅު ނަތީޖާއާއެކު ނުކުތް މިޒުވާނާ މިހާރު ވަނީ އަމިއްލަ މޭކަޕް ބްރޭންޑެއް އުފައްދައި ވިޔަފާރީގެ ބާޒާރަށް ނެރެފައެވެ. މިޕްރޮޑަކްޓް މަގުބޫލުވަމުންދާއިރު، ގާނީއަށް މިހާރު ގިނަ ބައެއްގެ ފަރާތުން ވަރަށް ސަޕޯޓު ލިބެއެވެ. ނަމަވެސް ވިޔަފާރީގެ ބާޒާރަށް ނުކުތުމުގައި ގާނީއަށް ވަނީ ގިނަ ކަންތައްތަކާއި ކުރިމަތިލާން ޖެހިފައެވެ. އުމުރުން ހަގުވުމާއި ގުޅިގެން ގިނަ ދޫތަތަކަކުން މިކަން ނުވާނެ ކަމަށް ބުނެފައިވެއެވެ. ގާނީގެ ވަށައިގެން އުޅުނު ގިނަ ރައްޓެހިން އެއީ ބޭކާރު، ކާމިޔާބު ނުވާނެ މަސައްކަތެއް ކަމަށް ވިސްނައިދޭން މަސައްކަތް ކޮށްފައިވެއެވެ. ހިތް މަރާލުމުގެ އެތައް ބަސްތަކަކާއި ކުރިމަތިވި ނަމަވެސް ގާނީގެ އުންމީދު ކަނޑައެއްނުލައެވެ.

ކުޑައިރުއްސުރެ މޭކަޕަށް ހުންނަ ލޯތްބެއްގެ ސަބަބުން އަމިއްލަ އުފެއްދުމެއް ނެރުމަކީ މިއަދާ ހަަމައަށް އެންމެ ބޮޑު ހުވަފެނެވެ. މި ހުވަފެނުގައި ކުލަ ޖެއްސުމަށް އޭނާގެ އަތުގައި ހިފީ އެއްބަނޑުއެއްބަފާ ބޭބެ އަބްދުﷲ ގާއިދް އާދަމްއެވެ. ބޭބެގެ އެހީތެރިކަމާއެކު އަމަލީ މަސައްކަތް ފެށީ އޯލެވަލް އިމްތިހާނާއެކުގައެވެ.

ގާނީ ކިޔައިދިން ގޮތުގައި އޯލެވަލް އިމްތިހާން ދުވަސްވަރު މޭކަޕް ބްރޭންޑް ނެރުމުގެ މަސައްކަތް ކުރީ ވަރަށް ބޮޑަށް ވަގުތު މެނޭޖްކޮށްގެނެއެވެ. މިއީ ވަރަށް ޗެލެންޖިން މަސައްކަތްތެއްގެ ގޮތުގައި އޭނާ ސިފަކުރިއެވެ. ނަމަވެސް މަންމައާއި ބައްޕަގެ ފަރާތުން ލިބުނު ހިތްވަރާއެކު މަސައްކަތް ވަރަށް ކާމިޔާބު ކަމަށް އޭނާ ބުނެއެވެ. އެގޮތުން އޭނާގެ އުފަންދުވަހާއި ދިމާކޮށް 16 ސެޕްޓެންބަރު 2020ގައި ގާނީގެ ބްރޭންޑް ލޯންޗު ކުރިއެވެ. ކުރިއަށް އޮތްތަނުގައި ގާނީގެ އަމިއްލަ އިތުރު އުފެއްދުންތައް ބާޒާރަށް ނެރޭނެއެވެ. ތިން ވައްތަރެއްގެ ލިޕްސްޓިކް ބާޒާރަށް ނެރެފައިވާއިރު، އިންޝަނޭޝަނަލް މާކެޓަށް ނެރުމަށްޓަކައި ކުރަންޖެހޭ މަސައްކަތްތައް ދަނީ ކުރަމުންނެވެ. އެގޮތުން އަންނަ އަހަރުގެ ތެރޭގައި ބޭރުގެ ގައުމެއްގައި އައުޓްލެޓެއް ހުޅުވަން މިހާރު ވަނީ ނިންމާފައެވެ.

ގާނީ ކިޔައިދިން ގޮތުގައި، ދާން ބޭނުންވާ ދާއިރާއިން ކުރިއަށް ދިއުމަށް ހުރަސްއަޅާ ނުވަތަ ބަދުބަސް ބުނާ ރައްޓެހިންނާއި ދުރުވުމަކީ ވަރަށް މުހިންމު ކަމެކެވެ. ގިނަ ރައްޓެހިންތަކެއް ގެއްލުނު ކަމުގައިވިޔަސް ހެޔޮއެދޭ ރަނގަޅު ރައްޓެހިން އަބަދުވެސް ހިތްވަރު ދިނުމަށް ކައިރީގައި ތިބޭނެއެވެ. މަސައްކަތެއް ފެށުމަށް ނިންމާއިރު، ބޮޑަށް އަމިއްލަ އުފެއްދުމަކަށް އިސްކަން ދިނުމަށް އޭނާ އެދިފައިވެއެވެ. އަދި ގާނީއަށް އަމިއްލަ އުފެއްދުމެއް ބާޒަރަށް ނެރެވުމުން މިކަމަށް ޝައުގުވެރިވާ ކޮންމެ މީހަކަށް ވެސް މިކަން ކުރެވޭނެ ކަމަށް ގާނީ ބުންޏެވެ. ބޭނުންވަނީ ކުޑަ ހިތްވަރެކެވެ.

ގައުމުގެ އުފެއްދުންތެރިކަން އިތުރުވެ، ޒުވާން ފިޔަފާރިވެރިން ފެނުމަކީ ގައުމަށް ވެސް ލިބޭ ކުރިއެރުމެކެވެ. މިއަދު ގާނީގެ މަސައްކަތުން އޭނާގެ އާއިލާއަށް ވެސް އެތައް އުފާވެރިކަމެއް ގެނެސްދީފައިވާއިރު، ގާނީ މިހާރު ވަނީ މަތީތައުލީމަށް ކިޔަވަން ނިންމާފައެވެ. އެގޮތުން ބިޒްނަސްގެ ދާއިރާއިން ކުރިއަށް ދިއުމަށް ޑިސެންބަރު މަހުގެ ކިޔަވަން ފަށާނެއެވެ. ކިޔަވަމުން ވަޒީފާއެއް މެނޭޖްކުރުމަކީ އުނދަގޫކަމެއް ނަމަވެސް އޭނާ މިހާރު ހުރީ މިކަމާއި ކުރިމަތިލާން ތައްޔާރަށެވެ.