އެމްޑީޕީގެ ދެ ފެކްޝަންގެ ދެމެދުގައި އުފެދިފައިވާ ޚިޔާލުތަފާތުވުންތައް މަޖިލީހުގެ ތަޅުމާއި ހަމައަށް މީގެކުރިންވެސް ތިލަވެގެންގޮސްފައިވެއެވެ. އެމްޑީޕީގެ 65 މެމްބަރުންގެ ތެރޭގައި މިހާރު ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރައްވާ މެމްބަރުންނާއި ރައީސް މުހައްމަދު ނަޝީދަށް ތާއީދުކުރައްވާ މެމްބަރުންގެ ދެމެދުގައި ފެކްޝަނެއް ރަނގަޅަށް އުފެދިފައެވެ. މި ދެ ފެކްޝަންގެ މެދުގައި ހިނގަމުންދާ ހިތްހަމަނުޖެހުންތަކާއި ކޯޅުންތައް މިވަނީ ބުރާސްފަތި ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގެ ތަޅުމުންވެސް ފެނިގެންގޮސްފައެވެ.
އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުމަކީ ކުށެއް ކަމަށް ކަނޑައެޅުމަށް ޤާނޫނުލް ޢުޤޫބާތަށް ހުށަހެޅި އިސްލާހުގެ ބިލް ދިރާސާކުރި ޖުޑީޝަރީ ކޮމިޓީގެ ރިޕޯޓަށް ބަހުސްކުރައްވަމުން ރައީސް ނަޝީދަށް ތާއީދުކުރައްވާ މެމްބަރުންނާއި ރައީސް ޞާލިހަށް ތާއީދުކުރައްވާ މެމްބަރުންގެ ދެމެދުގައި ވަނީ ބަހުގެ ހަމަލާތަކެއް ބަދަލުކުރައްވާފައެވެ. ސަރުކާރުގެ ފަރާތުން މިބިލް ހުށަހަޅުއްވާފައިވަނީ ތުޅާދޫ ދާއިރާގެ މެމްބަރ ހިސާން ހުސައިންއެވެ. އެމްޑީޕީގެ ބައެއް މެމްބަރުންގެ އެންމެ ބޮޑު ކަންބޮޑުވުމަކީ މިބިލް ހިސާންގެ ނަމުގައި ހުށަހެޅުއްވުމާއެކު ހިސާން ނުރައްކަލަށް ހުށަހެޅުނުއިރުވެސް ސަރުކާރުން ހިސާންގެ ދިފާއުގައި އެއްވެސް ކަމެއް ނުކުރެއްވުމެވެ. ވަކިން ޚާއްސަކޮށް ސަރުކާރުގެ ފަރާތުން ހުށަހެޅި ބިލަކަށް އެބިލް ވާއިރު ބިލާއި ގުޅިގެން ނުރައްކަލާ ކުރިމަތިވެވަޑައިގެންނެވި މެމްބަރަކީ ހިސާން ކަމަށްވުމެވެ.
ބަހުސް މަރުހަލާގައި މިކަން އެންމެ ފުރަތަމަ ފާހަގަކުރައްވާފައިވަނީ ޖުޑިޝަރީ ކޮމިޓީގެ މުގައްރިރުކަން ކުރައްވާ، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެވެ. އެގޮތުން ކޮމެޓީ ރިޕޯޓު ތަޅުމަށް ހުށަހަޅުއްވަމުން އޭނާ ވިދާޅުވީ މި ބިލު މަޖިލީހަށް ހުށައެޅުއްވި ތުޅާދޫ ދާއިރާގެ މެމްބަރު ހިސާން ހުސެއިންގެ އިތުރުން މި ބިލުގެ މަސައްކަތް އެޖެންޑާކުރައްވާތީ ރިޔާސަތު ބަލަހައްޓަވަމުން ގެންދަވާ، މަޖިލީހުގެ ނައިބު ރައީސް އީވާ އަބްދުﷲ އަށް ވެސް ނުރައްކާ އޮތް ކަމަށް ވިދާޅުވެފައެވެ.
އޭގެއިތުރަށް މި ބިލު ދިރާސާކުރަމުންދާ ޖުޑީޝަރީ ކޮމިޓީގެ މެމްބަރުންނަށްވެސް ނުރައްކާ އެބައޮތް ކަމަށް އިންތި ވިދާޅުވި އެވެ. އިންތި ވިދާޅުވީ އެމްޑީޕީ ތެރެއިން ވެސް ފިތުނައާއި ނަފުރަތު އުފެއްދުމަށް މަސައްކަތް ކުރަމުންދާ ކަމަށެވެ.
މިއީ މިއަދު މި ގައުމުގައި ހާލަތު ގޮސްފައިވާ ހިސާބަކީ. އެހެންވީމާ މި ހާލަތު މިގޮތަށް ދިޔަ ދިނުމުގެ ފުރުސަތު ސަރުކާރުން ދެއްވި ކަމަކީ އަޅުގަނޑު އިންތިހާއަށް ކަންބޮޑުވާކަމެއް. ސަރުކާރުން މި ބިލު ޑިފެންޑް ކޮށްދެއްވަން ވެސް ޖެހޭނެ.އިމްތިޔާޒު ފަހުމީ / މާފަންނު އުތުރު ދާއިރާ
މެމްބަރުންގެ މެދުގައި އަރާރުން ބޮޑަށް އުފެދިގެންދިޔައީ ރައީސް ޞާލިހު ފެކްޝަންގެ މެމްބަރުން މިބިލް ތަޅުމުން ބޭރުކޮށްލުމަށް ބޭނުންފުޅުވެ ވާހަކަދެއްކެވުމުންނެވެ. ނަމަވެސް އޭރުވެސް އޮތީ އެމްޑީޕީގެ ޕީޖީ ގްރޫޕުން މިބިލް އަނބުރާ ކޮމިޓީއަށް ފޮނުވުމަށް ފާސްކޮށްފައެވެ.
އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވީ ސަރުކާރުން ބިލު ފޮނުވާފައި، ބިލު ސްޕޮންސާ ކުރެއްވި ތުޅާދޫ ދާއިރާގެ މެމްބަރު ހިސާން ހުސައިން ހަވަރަށް ދޭ އުސޫލުން ކަންތައް ކޮށްފައިވާ ކަމަށެވެ. ސަރުކާރުގެ އަމަލުތައް ކުށްވެރިކޮށް ވައްޑޭ ވަނީ ރައިސުލްޖުމްހޫރިއްޔާއަށް ވެސް ފާޑުވިދާޅުވެ ބަހުގެ ހޫނު ހަމަލާތަކެއް ދެއްވާފައެވެ.
ރައިސުލްޖުމްހޫރިއްޔާއަށް ދަންނަވާލަން، ހިތްވަރު ނެތިއްޔާ ނުކުރާނީ މިކަހަލަ ކަންކަން. ހަމަ ނެއްޓިލާފަ، ހިސާނުގެ ބިލު، ދައުލަތުގެ މީޑިއާއިން ޕީއެސްއެމުން މި ބިލަށް ހިސާނުގެ ބިލް. އިސްލާމްދީނަށް ތައުހީނުކުރުން މަނާކުރާ ބިލުވީމާ ސަރުކާރުގެ ބިލް. މި ފާޑަށް ކަންތައް ނުކުރާށޭ.މުހައްމަދު ވަހީދު (ވައްޑެ) / އުނގޫފާރު ދާއިރާގެ މެމްބަރ
މީގެއިތުރުން ވައްޑެ ވަނީ ސަރުކާރުގެ ފަރާތުން މަޖިލީހަށް ހުށައަޅާ ބިލުތަކުގެ ތެރެއިން 'ސަރުކާރުގެ ބިލެއް' ކަމަށް ކަނޑައެޅޭ އުސޫލެއް ސާފުކޮޮށް ނިންމަން ޖެހޭ ކަމަށް ވިދާޅުވެ އެމްޑީޕީގެ ޕީޖީ ގްރޫޕަށްވެސް ފާޑުވިދާޅުވެފައެވެ. ސަރުކާރުގެ ސުޕަރމެޖޯރިޓީ އޮންނަ މަޖިލީހުގައި ހުންނަވައިގެން ކުރިމަތިވާ ކަންކަމުގެ ވާހަކަވެސް ދެއްކެވިއެވެ.
ހަމަ އެ މީހަކާ އެ މީހެއް ދެން އޮންނާނީ. ވަރަށް މިނިވަންކޮށް އުޅެލާ ހިތްވޭ އަޅުގަނޑު ވެސް. ފަސްދޮޅަސް ފަހެއްގެ ތެރޭގައި [ރައްޔިތުންގެ މަޖިލީހުގައި އެމްޑީޕީގެ މެމްބަރުންގެ އަދަދު] މިހެން ހުރެހުރެ މީހާ ހަލާކުވެއްޖެ މިހާރު. މަގުމައްޗަށް ނުކުމެވެން ނެތް މީހުން ގޮވާ އެއްޗިހިންމުހައްމަދު ވަހީދު / އުނގޫފާރު ދާއިރާ
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމްގެ ވާހަކަވެސް ހުރީ ހަމަ މިމޭރުމުންނެވެ. މީކާއިލް ވިދާޅުވީ ސަރުކާރުން ހުށައެޅި ބިލަކާއި ގުޅިގެން މެންބަރުންގެ ފުރާނަފުޅަށް ނުރައްކާ ވިއިރުވެސް، ދިފާއުގައި ސަރުކާރުން އެއްޗެއް ވިދާޅުނުވި ކަމަށެވެ. އޭނާ ވަނީ މިދިޔަ އަހަރުތަކުގެ ތެރޭގައި ހަރުކަށި ފިކުރާއި ގުޅުން ހުރި މަރުތަކަށް އިންސާފު ހޯދަދިނުމަށް އައި ސަރުކާރުން، މި ބިލު ދިފާއު ނުކުރައްވާތީ ނުރުހުން ފާޅުކުރައްވާފައެވެ. އަދި ވޯޓު ހޯދަންވީމާ ނިކަން ފޯރީގައި ރިލްވާން މަންމަ، ޔާމީންގެ ދައްތަ ފެނޭނޫންތޯ ވިދާޅުވެ މީކާއިލް ފާޑުވިދާޅުވިއެވެ.
އިއްޒަތްތެރި ރައީސް، މި ބިލު އޮޅައިލުމަށް ފަހު ފަސްދޮޅަސް ފަހެކޭ މިކިޔާ ފިނޑި، ފިނޑި ސުޕަ މެޖޯރިޓީ ޑރ. އަފްރާޝީމްގެ އާއިލާއޭ ކިޔައިގެން ނުވާނެ،މީކާއިލް އަހުމަދު ނަސީމް / ގަލޮޅު ދެކުނު ދާއިރާ
މިބިލާ ގުޅިގެން ދެން އެންމެ ހޫނެއް ރައްދުދެއްވި އަނެއް މެމްބަރަކީ މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ) އެވެ. ބޮންޑޭ ތުހުމަތު ކުރެއްވި ގޮތުގައި، ސަރުކާރުން އެ ބިލު މަޖިލީހަށް ފޮނުވީ މަޖިލީހުގެ ރައީސް ނަޝީދު އަވަހާރަކޮށްލަން ދިން ބޮމުގެ ހަމަލާގެ ތަހުގީގުގެ ފޯކަސް ގެއްލުވައިލުމަށެވެ. " އެ ދަލުގައި" ގައުމު ވަރަށް ރަނގަޅަށް ޖެހިއްޖެ ކަމަށްވެސް ވިދާޅުވިއެވެ.
މަޖިލީހުގެ ރައީސް އަވަހާރަކޮށްލަން ބޮން ގޮއްވާލީ. އެ އަށް ވުރެ ބޮޑު ކަމެއް ނުކުރޭ. އެއީ ޕާލަމެންޓަށް ދިން ހަމަލާއެއް. ދިވެހިރާއްޖޭގެ ޑިމޮކްރަސީ އަށް ދިން ހަމަލާއެއް. އެ ހުރިހާ ހަމަލާއެއް ދީފައި އެ ފޯކަސް އަނބުރައިލަނީ ހަމަ އެންމެ ދިމާލަކަށް. އަޅުގަނޑު އެދެން ރައީސުލްޖުމްހޫރިއްޔާ އިސްތިއުފާ ދެއްވަން،އިބްރާހީމް ރަޝީދު (ބޮންޑޭ) / މާފަންނު މެދު ދާއިރާ
ބިލު ފާސްކުރެވޭ ގޮތް ނުވުމާއެކު ނަޝީދުގެ ފެކްޝަންގެ މެމްބަރުން ހިތްހަމަޖެހިވަޑައިނުގަން ވާހަކަދެއްކެވި އިރުވެސް ރައީސަށް ތާއީދުކުރައްވާ ބައެއް މެމްބަރުން ވަނީ ބިލު މަޖިލީހުން ބޭރުކުރުމަށެވެ. އެގޮތަށް ގޮވައިލެއްވީ ދުވާފަރު ދާއިރާގެ މެމްބަރު އިސްމާއީލް އަހުމަދާއި ތިނަދޫ ދެކުނު ދާއިރާގެ މެމްބަރު މުހައްމަދު ސަނީފެވެ.
ބިލް ބޭރުކޮށްލުމަށް ސަނީފު ގޮވާލެއްވުމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ސަނީފު ވެސް ނިސްބަތްވެވަޑައިގަންނަވާ އެމްޑީޕީގެ ޕާލަމެންޓްރީ ގްރޫޕުން ހުށަހަޅާފައި އޮތީ ބިލު އަލުން ކޮމިޓީ އަށް ގެންދިއުމަށް ކަމަށާއި އެކަމަށް ތާއީދު ވެސް ލިބިފައިވާ ކަމަށެވެ. ސަނީފްގެ ވާހަކަފުޅުގައި ވަނީ ބިލް ހުށަހެޅުއްވި މެމްބަރު ބިލް އަނބުރާ ނުގެންދަވައިގެންވެސް ފާޑުވިދާޅުވެފައެވެ.
