ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީގެ ވަރުގަދަ ސުވާލުތަކެއް ރައީސް މުހައްމަދު މުއިއްޒަށް އަމާޒު ކުރައްވައިފި އެވެ.

އަބްދުﷲ ދީދީގެ ސުވާލުތައް އަމާޒު ކުރެއްވީ ވެލާނާ އެއަރޕޯޓުގެ އާ ޓާރމިނަލް ގައި ފަސް ވަގުތު ބަންގީގެ އަޑު އިވޭ ގޮތަށް ހަމަޖައްސާ އެގޮތަށް އާދިއްތަ ދުވަހު އަމަލު ކުރަން ފެށިކަން ހާމަކުރައްވާ ރައީސް މުއިއްޒު ކުރެއްވި ޕޯސްޓަކާ ގުޅިގެންނެވެ.

ރައީސް ކުރެއްވި މި ޕޯސްޓުގައި ވިދާޅުވީ ހޮނިހިރު ދުވަހުގެ ރޭ ހުޅުވި ވެލާނާ އިންޓަނޭޝަނަލް އެއަރޕޯޓު (ވީއައިއޭ)ގެ އާ އިންޓަނޭޝަނަލް ޓާރމިނަލްގައި ފަސް ވަގުތު ބަންގީގެ އަޑު އިވޭ ގޮތަށް ހަމަޖައްސާފައިވާ ކަމަށެވެ. އަދި އާދިއްތަ ދުވަހު އަސްރު ނަމާދުން ފެށިގެން އެގޮތަށް އަމަލުކުރަން ފަށާފައިވާ ކަމަށް ވެސް އެމަނިކުފާނު ވިދާޅުވި އެވެ.

މިކަމަށް ރައްދުދެއްވައި އަބްދުﷲ ދީދީ ކުރެއްވި ޕޯސްޓުގައި ވިދާޅުވީ އިސްލާމްދީނަށް ހުރުމަތްތެރިކޮށް ހިތުމަށް ރައީސް މުހައްމަދު މުއިއްޒު ހުވާ ކުރައްވައިގެން ހުންނެވިއިރު، ދީނަކީ ހަމައެކަނި އަޅުކަމެއް ނޫންކަން އެ މަނިކުފާނަށް އެނގިވަޑައިގަންނަވަންޖެހޭ ކަމަށެވެ.

މީގެ އިތުރުން ގާނޫނުއަސާސީގެ ދެ ވަނަ މާއްދާގައި ދިވެހިރާއްޖޭގެ ޖުމްހޫރިއްޔާއަކީ އިސްލާމީ އުސޫލުތަކުގެ މައްޗަށް ބިނާކުރެވިފައިވާ ދައުލަތެެއްކަމަށް ބަޔާން ކޮށްފައިވާއިރު، އެކަން ދެނެގަނެވޭނެ ސުވާލުތަކެއް އަބްދުﷲ ދީދީ ރައީސް މުއިއްޒުއާ ކުރައްވާފައިވެ އެވެ.

މިގޮތުން އަބްދުﷲ ދީދީ ވިދާޅުވީ އެ ދީނަކަށް ހުރުމަތްތެރިކޮށް ހިތުމަށް ހުވާ ކުރައްވައިގެން ހުންނެވި އިސްލާމްދީނަކީ ހަމައެކަނި އަޅުކަމެއް ނޫންކަން ރައީސް މުއިއްޒަށް އެނގިވަޑައިގަންނަވަން ޖެހޭ ކަމަށެވެ.

އެގޮތުން އިސްލާމްދީނަކީ އަގީދާއާއި، އަހުލާގާއި، އަޅުކަމުގެ އިތުރުން މުއާމަލާތު (ޕަބްލިކް ލޯ އާއި ޕްރައިވެޓް ލޯ) ގެ އެންމެހައި ބާބުތަކާ، އަދި، ސިޔާސަތާއި އިގުތިސާދުގެ އުސޫލުތައް ބަޔާންވެގެންވާ ޝާމިލު ދީނެއްކަމަށާއި، ގާނޫނުއަސާސީގެ 2 ވަނަ މާއްދާގައި ދިވެހިރާއްޖޭގެ ޖުމްހޫރިއްޔާ އަކީ އިސްލާމީ އުސޫލުތަކުގެ މައްޗަށް ބިނާކުރެވިފައިވާ ދައުލަތެެއްކަމަށް ބަޔާންކޮށްފައިވާކަމަށް އަބްދުﷲ ދީދީ ވިދާޅުވި އެވެ.

އެހެން ކަމުން، ދިވެހި ދައުލަތާއި ދިވެހި ސަރުކާރުގެ އެންމެ އިސްވެރިޔާގެ ހައިސިއްޔަތުން ދިވެހި ދައުލަތް ހިންގެވުމުގައި އިސްލާމީ އުސޫލުތަކާއި ގަވާއިދުތަކަށް ރިއާޔަތް ކުރައްވަންތޯ އާއި ދިވެހި ރައްޔިތުންގެ އެންމެ މަތީ މަސްލަހަތުތައް ހިމާޔަތް ކުރައްވަންތޯ އަބްދުﷲ ދީދީ ވަނީ ސުވާލުކުރައްވާފަ އެވެ.

އަބްދުﷲ ދީދީ ވިދާޅުވީ މިފަދައިން އަމަލު ނުކުރާނަމަ، އިސްލާމްދީނަށް ހުރުމަތްތެރިކޮށް ހިތްތަވާކަމަކަށް އަދި އިސްލާމީ އުސޫލުތަކާ އެއްގޮތަށް ދައުލަތް ހިންގަވާކަމަކަށް ނުވާނެ ކަމަށެވެ.

އިސްލާމްދީނާ އެއްގޮތަށް އަމަލުކުރެއްވުމަށް މުއިއްޒު ހަނދާންކޮށް ދެއްވަމުން ގެންދަވާއިރު، އެމަނިކުފާނު އިންތިހާއަށް ދޮގު ހަދާ ކަމާއި މިވެރިކަމުގެ ބައެއް ވެރިންގެ މައްޗަށް ކުރެވޭ ހިޔާނާތާއި ވައްކަމުގެ ތުހުމަތުގެ އަޑުތައް ވަނީ ގަދަވެފައިއެވެ.

ރިޔާސީ އިންތިހާބު ކާމިޔާބު ކުރުމަށް މައިގަނޑު ގޮތެއްގައި މުއިއްޒު ވިއްކީ "އިންޑިއާ އައުޓް" ކެމްޕޭނެވެ. އޭގެ ތެރެއިން އިންޑިއާގެ ނުފޫޒު ނުރައްކާތެރި ދަރަޖައެއްގައި ރާއްޖެ އަށް އޮތް ކަމަށް ބުނެ، އިންޑިއާގެ އަސްކަރިއްޔާ ބޭރު ކުރުމަށް ވެސް ދިއައީ ގޮވާލަމުންނެވެ.

މީގެ އިތުރުން ދެން އެންމެ ބޮޑަށް ވިއްކީ އޭރު ޖަލުގައި ހުންނެވި ކުރީގެ ރައީސް އަބްދުﷲ ޔާމީން މިނިވަން ކުރާނެ ކަމުގެ ވައުދާއި އެކު އެމަނިކުފާނުގެ ފޮޓޯ ފުޅެވެ. އެގޮތުން ރައީސް ޔާމީން މިނިވަން ކުރެވޭނީ އޭރު އޮތް އެމްޑީޕީ ވެރިކަން ނިމުކަމަށް ގެނެވި، ރައީސް މުއިއްޒަށް ވެރިކަން ލިބިވަޑައިގެން ކަމަށް ވިދާޅުވެ އެވެ.

އެހުރިހާ އެއްޗެއް ވިއްކައިގެން މަކަރާއި ހީލަތުން ވެރިކަމަށް އާދެވުނު މުއިއްޒު އޭރު ވެވަޑައިގެން އެއްވެސް ވައުދެއް އަދި މިހާތަނަށް ފުއްދަވާފައި ނުވެ އެވެ.