ހޮސްޕިޓަލަށް ދާ މީހުންނަށް މަރުހަބާ ކިޔަން "ޕޭޝަންޓް ސަޕޯޓް ކޯޑިނޭޓާ" ގެ ނަމުގައި 55 ވަޒީފާ އައިޖީއެމްއެޗުން އުފައްދައިފި
އައިޖީއެމްއެޗުން އުފައްދާފައި ވަނީ "ޕޭޝަންޓް ސަޕޯޓް ކޯޑިނޭޓަރ" ގެ 55 ވަޒީފާ
ސަރުކާރުގެ ހޮސްޕިޓަލް އައިޖީއެމްއެޗް: އެ ހޮސްޕިޓަލުން ވަނީ މުޅިން އަލަށް 55 ވަޒީފާ އުފައްދައި އިއުލާނު ކޮށްފައި
ހޮސްޕިޓަލަށް ޒިޔާރަތްކުރާ މީހުންނަށް މަރުހަބާ ކިޔައި މަގު ދެއްކުމަށް "ޕޭޝަންޓް ސަޕޯޓް ކޯޑިނޭޓާ" ގެ ނަމުގައި އައިޖީއެމްއެޗު ހޮސްޕިޓަލުން 55 ވަޒީފާ އުފައްދައި އެ މަގާމުތަކަށް މީހުން ނެގުމަށް އިއުލާންކޮށްފި އެވެ.
އައިޖީއެމްއެޗް ހޮސްޕިޓަލުން އަންގާރަ ދުވަހު އެކްސްގައި ކުރި މި އިއުލާނުގައި ބުނީ ހޮސްޕިޓަލަށް ޒިޔާރަތްކުރާ މީހުންނަށް މަރުހަބާ ކިޔައި މަގު ދެއްކުމަށް ""ޕޭޝަންޓް ސަޕޯޓް ކޯޑިނޭޓާ" ގެ ނަމުގައި އުފައްދާ އިއިލާނު ކުރި މި މަގާމުތަކުގެ މަސްއޫލިއްޔަތުތައް އަދާކުރަން ޖެހޭނީ ދަރުމަވަންތަ ހޮސްޕިޓަލް، އައިޖީއެމްއެޗް، ހުޅުމާލޭ ހޮސްޕިޓަލް އަދި ވިލިމާލޭ ހޮސްޕިޓަލާއި މޯލްޑިވްސް ބްލަޑް ސާވިސަސްގައި ކަމަށެއެވެ.
އެ އިއުލާނުގައި ބުނެފައި ވަނީ މި 55 މަގާމަކީ ވެސް ކޮންޓްރެކްޓް ވަޒީފާތައް ކަމަށެވެ.
މި މަގާމުގެ ޝަރުތުތަކެއްގެ ގޮތުގައި ކަނޑައަޅާފައިވަނީ ގްރޭޑް 10 ނިންމާފައިވުން ނުވަތަ ގްރޭޑް ހަތެއް ނިންމާފައިވުމާއެކު ގުޅޭ ދާއިރާއަކުން ހަތަރު އަހަރު މަސައްކަތުގެ ތަޖުރިބާ ލިބުން ހިމެނެ އެވެ.
ވަޒީފާގެ މަސްއޫލިއްޔަތުތަކުގެ ތެރޭގައި ހިމެނެނީ ހޮސްޕިޓަލަށް ޒިޔާރަތްކުރާ ބަލިމީހުންނާއި އެހީތެރިންނަށް މަރުހަބާ ކިޔުމާއި މަގު ދެއްކުމާއި އެހީތެރިކަން ފޯރުކޮށްދިނުމުގެ އިތުރުން ދިމާވާ މައްސަލަތަކަށް ވަގުތުން އެހީތެރިކަން ފޯރުކޮށްދިނުމާއި އެ މައްސަލަތައް ހައްލުކޮށްދިނުމެވެ.
އަދި ހިދުމަތް ހޯދަން އަންނަ ފަރާތްތަކަށް ފުރިހަމަ މައުލޫމާތު ފޯރުކޮށްދިނުމާއި ހޮސްޕިޓަލުގެ އެކި ސަރަހައްދުތަކުގައި ހަރަކާތްތެރިވާއިރު، މާހައުލާއި ހިދުމަތުގެ ފެންވަރު ރަނގަޅުކޮށް ބެލެހެއްޓުމުގެ މަސައްކަތް ކުރުމުގެ އިތުރުން އެކިއެކި މީހުންގެ ހިޔާލު އެއްކުރުމާއި ތަޖުރިބާތައް މޮނީޓަރު ކުރުމާއި އޯގާތެރިކަމާއި، ހަމްދަރުދީވުމާއި އަދި ހިނިތުންވުމާ އެކުމުއާމަލާތް ކުރުން ވެސް ހިމެނެއެވެ.
މީގެ އިތުރުން ހޮސްޕިޓަލުގެ ސިޔާސަތުތައް ހާސިލުކުރުމަށް ކުރެވޭ އެންމެހާ މަސައްކަތްތަކުގައި ފުރިހަމައަށް ބައިވެރިވެ އޮފީހުގެ ރަސްމީ މަސައްކަތާ ގުޅޭގޮތުން ހަވާލުކުރެވޭ އެންމެހާ މަސައްކަތްތައް ކުރުން ޝަރުތުތަކުގެ ތެރޭގައި ހިމެނެއެވެ.
އައިޖީއެމްއެޗުން 55 މަގާމު އުފައްދައި އިއުލާނު ކޮށްފައިވާއިރު، މި އިއުލާނުގައި މި ވަޒީފާގެ މުސާރަ އެއް ބަޔާންކޮށްފައި ނެތެވެ.
މި މަގާމަށް ކުރިމަތިލުމުގެ ސުންގަޑިއަކީ ޖުލައި 29، ކަމަށް އިއުލާނުގައި އޮތް ނަމަވެސް ޖުލައި 23 އިން 30 އަށް އިންޓަވިއު ކުރިއަށްދާނެ ކަމަށް ބުނެފައިވެ އެވެ.
އިއުލާނުގައި ވާގޮތުން ވަޒީފާއަށް މީހުން ނެގުމުގައި ތައުލީމާއި ތަމްރީނުގެ އިތުރުން މަސައްކަތުގެ ތަޖުރިބާ އާއި މަގާމުގެ މަސައްކަތަށް ބޭނުންވާ ހުނަރާއި ފެންވަރާއި، ގާބިލުކަމާއި "އެހެނިހެން ސިފަތަކަށް" ބަލާނެ އެވެ.
