ދަރިންނަށް ހަރަދު ނުދޭ މީހެއްގެ ފޮޓޯ ފުރަތަމަ ފަހަރަށް ފެމިލީ ކޯޓުން އާންމުކޮށްފި

ދަރިންނަށް ހަރަދު ނުދޭ މީހެއްގެ ފޮޓޯ ފުރަތަމަ ފަހަރަށް ފެމިލީ ކޯޓުން އާންމުކޮށްފި އެވެ.

ފެމިލީ ކޯޓުގެ ސޯޝަލް މީޑިއާގައި ބުދަ ދުވަހު، ވަނީ ސާބިތު ހަރަދަށް ފައިސާ ނުދައްކާ މީހެއްގެ ފޮޓޯއާ އެކު، އޭނާގެ ފުރިހަމަ ނަން، ދާއިމީ އެޑްރެސް އަދި އައިޑީ ކާޑު ނަންބަރު ވެސް އާންމުކޮށްފަ އެވެ.

ކޯޓުން އާއްމުކުރި ފުރަތަމަ މީހަކީ ދަފްތަރު ނަމްބަރު 2758، އަހުމަދު އަލީ އެވެ.

ފެމިލީ ކޯޓުން ބުނީ އެއީ އެ މައްސަލަ ބެއްލެވި ގާޒީ މައްސަލައިގެ ދެ ހަސްމުގެ ވާހަކަތަކާއި ލިޔެކިއުންތަކަށް ބެލުމަށް ފަހު ހަރަދަށް ފައިސާ ނުދޭ ފަރާތުގެ ވަނަވަރު އަދި ފޮޓޯ އާންމުކުރަން ޖެހޭ ކަމަށް ޝަރީއަތަށް ގަބޫލުކުރެވިގެން ކޯޓުން އާންމުކުރި މައުލޫމާތެއް ކަމަށެވެ.

ދަރިންގެ ހަރަދު ނުދޭ މީހުންގެ މައުލޫމާތު އާންމުކުރަން އެންމެ ފުރަތަމަ ފެށީ، މިދިޔަ އަހަރުގެ ފަހުކޮޅު ހިސާބުގައި ޅ. ހިންނަވަރު ކޯޓުންނެވެ. އޭގެ ފަހުން ހދ. ކުޅުދުއްފުށީ ކޯޓުން ވެސް ވަނީ އެފަދަ މީހުންގެ މައުލޫމާތު ޝާއިއުކުރަން ފަށައިފަ އެވެ.

އެފަދަ މީހުންގެ ވަނަވަރު އާންމުކުރަން 2018 ވަނަ އަހަރު ފެމިލީ ކޯޓުން ނިންމި ނަމަވެސް މިހާތަނަށް އަދި އެކަން ތަންފީޒު ނުކުރެއެވެ.

އާއިލާއާ ބެހޭ ގާނޫނުގެ 72 ވަނަ މާއްދާގެ ދަށުން އެކުލަވާލާފައިވާ ގަވާއިދުގައި ކުއްޖާގެ އުމުރުން 18 އަހަރު ފުރެންދެން ކުއްޖާގެ ހަރަދަށާއި ކުއްޖާ ބެލުމުގެ ހަރަދަށް އެއް ކުއްޖަކު ހުރިނަމަ މަހަކު 2000 ރުފިޔާ ދޭން ޖެހޭނެ އެވެ.

އަދި އެއް ކުއްޖަކަށްވުރެ އިތުރުވާނަމަ އިތުރުވާ ކޮންމެ ކުއްޖަކަށް 1000 ރުފިޔާ ދިނުމަށް އެ ގަވާއިދުގައި ބުނެފައިވެ އެވެ.