ޖޫން 22 އަދި 23ގައި 87 ކައިވެނި

ޖޫން 22 އަދި 23ގައި މާލޭގައި 87 ކައިވެނި ކޮށްދީފައިވާކަމަށް ފެމިލީ ކޯޓުން ބުނެފިއެވެ.

ފެމިލީ ކޯޓުން ބުނީ ޖޫން މަހުގެ 22 ވަނަ ދުވަހު 44 ކައިވެނި ކޮށްފައިވާކަމަށެވެ. އެއީ ރަސްމީ ގަޑީގައި 27 ކައިވެނި އަދި ނުރަސްމީ ގަޑީގައި 17 ކައިވެންޏެވެ.

އަދި، ޖޫން 23 ވަނަ ދުވަހު 43 ކައިވެނި ކޮށްފައިވާކަމަށް ފެމިލީ ކޯޓުން ބުނެއެވެ.

މިއަހަރުގެ މިހާތަނަށް އެންމެ ގިނައިން ކައިވެނި ކޮށްފައިވަނީ ޖޫން 22 ވަނަ ދުވަހުއެވެ. ރަސްމީ ބަންދު ދުވަސްތަކުގައި ފެމިލީ ކޯޓުން، ކޯޓުގައި ކައިވެނި ކޮށެއްނުދެއެވެ. އެގޮތުން މިފަދަ ދުވަސްތަކުގައި ކޯޓުން ބޭރުގައި ކައިވެނި ކޮށްދޭނީ ހަވީރު 04:00ން ރޭގަނޑު 09:30އާ ހަމައަށެވެ.

ފެމިލީ ކޯޓުން އާންމުކޮށްފައިވާ ތަފާސް ހިސާބުތައް ދައްކާގޮތުން، ނިމިދިޔަ މޭ މަހު އެ ކޯޓުން 185 ކައިވެނި ކޮށްދީފައިވެއެވެ. އަދި 132 ވަރި ކޮށްދީފައިވެއެވެ.