ހަނގުރާމަ ހުއްޓުމުގެ މަސައްކަތް އުންމީދީ ކަމަށް ވިކްޓޮފް ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުމަކަށް ގެނައުމަށްޓަކައި ކުރަމުން އަންނަ މަސައްކަތް ވަރަށް އުންމީދީ ކަމަށް، ސްޓީވް ވިކްޓޮފް ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ވިކްޓޮފް މިހެން ވިދާޅުވީ ހޯމަ ދުވަހު އެވެ. އޭނާ ވިދާޅުވީ ހަނގުރާމަ ހުއްޓުމަކަށް ގެނައުމަށްޓަކައި ގިނަ މަސައްކަތްތަކެއް ކުރަމުން އަންނަ ކަމަށާއި، އެ މަސައްކަތް ފެންނަނީ ވަރަށް އުންމީދީކޮށް ކަމަށެވެ.

ނިއު ޖާޒީގައި ނޫސްވެރިންނާ ވާހަކަ ދައްކަވަމުން ވިކްޓޮފް ވިދާޅުވީ، ފީފާ ކުލަބު ވޯލްޑް ކަޕްގެ ފައިނަލް މެޗުގެ ތެރެއިން އެމެރިކާގެ ރައީސް ޓްރަމްޕް ޤަތަރުގެ އޮފިޝަލުންނާ ވާހަކަ ދައްކަވާފައިވާ ކަމަށެވެ. އެ މަޝްވަރާތަކުގައި ދެކެވުނު ވާހައިގެ މާ ބޮޑު ތަފްސީލެއް ހާމަވެފައި ނެތް ނަމަވެސް، އެ ބައްދަލުވުމުގައި ހަނގުރާމައިގައި ރަހީނު ކޮށްފައިވާ މީހުން ދޫކޮށްލުމުގެ މަޝްވަރާ ކުރާނެ ކަމަށް ބެލެވޭ ކަމަށް ރިޕޯޓު ކޮށްފައިވެ އެވެ. 

އިސްރާއީލާއި ހަމާސްއާ ދެމެދު އެއްބަސްވުމެއް އެކުލަވާލައި ހަނގުރާމަ ހުއްޓާލުމަށް ކުރަމުން އަންނަ މަސައްކަތުގައި މެދެވެރިއެއްގެ ދައުރު އަދާ ކުރަމުން އަންނަ ޤައުމަކީ ޤަތަރު އެވެ. އެކަމާ ގުޅުން ހުރި މަޝްވަރާތައް ޤަތަރުގެ ވެރި ރަށް ދޯހާގައި ކުރިއަށް ގެންދާއިރު، އެއްބަސްވުމަކަށް އައުމުގައި ގިނަ ގޮން ޖެހުންތަކެއް ވަނީ ކުރިމަތިވެފަ އެވެ. 

ބައެއް މީޑިއާ ތަކުގައި ބުނެފައިވާ ގޮތުން މިހާތަނަށް އެއްބަސްވުމަކަށް އައުމުގައި ގޮންޖެހުންތަކެއް ކުރިމަތި ވެގެން އުޅެނީ، އިސްރާއީލް އިން ޣައްޒާގައި ތިބި ސިފައިން ބޭލުމަށް ދެކޮޅު ހަދަމުން އަންނާތީ އެވެ. ނަމަވެސް ހަމާސް އިން ވަނީ އެ ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ރަހީނުން މިނިވަން ކުރާނެ ކަމަށް ހާމަކޮށްފަ އެވެ.

އެ މަޝްވަރާތަކާ ގުޅޭ ގޮތުން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ މީގެ ކުރިން ވިދާޅުވެފައި ވަނީ، ރަހީނުން މިނިވަން ކުރުމަށް ކުރަމުން އަންނަ މަޝްވަރާތަކުގައި އެކަން ކާމިޔާބު ވާނެ ކަމުގެ އުންމީދު ބޮޑު ކަމަށެވެ. ހަމަ އެހެންމެ އެމެރިކާ އިން ހުށަހަޅާފައިވާ ގޮތަށް 60 ދުވަހަށް ހަނގުރާމަ ހުއްޓާލުމަށް ފަހު، އެ މުއްދަތުގެ ތެރޭގައި ދާއިމީ ގޮތެއްގައި ހަނގުރާމަ ހުއްޓާލުމުގެ މަޝްވަރާތައް ކުރިއަށް ގެންދެވޭނެ ކަމަށް ވެސް ނަތަންޔާހޫ ވަނީ ވިދާޅުވެފަ އެވެ.

ހަނގުރާމަ ހުއްޓާލުމުގެ މަޝްވަރާތައް ކުރިއަށް ގެންދަމުން އަންނައިރު ވެސް، އިސްރާއީލް އިން އަންނަނީ ޣައްޒާ އަށް ދެމުން އަންނަ ހަމަލާތައް އިތުރުކޮށް، ގިނަ ބަޔަކު ޝަހީދު ކުރަމުންނެވެ.