ޣައްޒާ ހަނގުރާމަ ހުއްޓާލުމުގެ މަޝްވަރާތައް ވަގުތުން ފެށުމަށް ހަމާސް އިން އެއްބަސްވެއްޖެ

އިސްރާއީލާއި ހަމާސް ޖަމާއަތާ ދެމެދު ކުރިއަށް ދަމުން އަންނަ ޣައްޒާ ހަނގުރާމަ ހުއްޓާލުމުގެ މަޝްވަރާތައް ވަގުތުން ފެށުމަށް، ހަމާސް ޖަމާއަތުން އެއްބަސްވެއްޖެ އެވެ. 

ހަމާސް ޖަމާއަތުން ހޮނިހިރު ދުވަހު ބުނެފައި ވަނީ، ޣައްޒާ ހަނގުރާމަ ހުއްޓާލުމުގެ މަޝްވަރާތައް ފެށުމަށް އެ ޖަމާއަތް އޮތީ ތައްޔާރަށް ކަމަށެވެ. ހަމާސް އިން އެކަން އިއުލާން ކޮށްފައި މި ވަނީ، އިސްރާއީލްގެ ހަމަލާތަކުގައި ޣައްޒާ އިން 50 އަށް ވުރެ ގިނަ މީހުން ޝަހީދުވެފައިވާ ކަމަށް ސިވިލް ޑިފެންސް އިން ހާމަކޮށްފައި ވަނިކޮށެވެ. 

ޣައްޒާ ހަނގުރާމަ ހުއްޓާލުމުގެ މަޝްވަރާތައް ފެށުމަށް ތައްޔާރަށް ތިބިކަން ހަމާސް އިން ހާމަކޮށްފައި ވަނީ، ފަލަސްޠީނުގެ ޙައްގުގައި މަސައްކަތް ކުރަމުން އަންނަ އެހެން ޖަމާއަތްތަކާ ވެސް މަޝްވަރާ ކުރުމަށް ފަހު އެވެ. އަދި ޖުލައި މަހުގެ ހަތް ވަނަ ދުވަހު، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާ އަށް ވެސް ވަޑައިގަންނަވަން ތައްޔާރުވެފައިވާ ދަނޑިވަޅެއްގަ އެވެ.

އެމެރިކާ އިން ހުށަހަޅާފައިވާ 60 ދުވަހުގެ ހަނގުރާމަ ހުއްޓާލުމުގެ އެއްބަސްވުމާ ގުޅޭ ގޮތުން ހަމާސް އިން ބުނެފައި ވަނީ، އެމެރިކާ އިން ހުށަހަޅާފައިވާ އެއްބަސްވުމާ މެދު މަޝްވަރާކޮށް، އަދި އަމާން ކަމާ އެކު މަޝްވަރާތައް ކުރިއަށް ގެންދިޔުމަށް އެ ޖަމާއަތުން ތައްޔާރު ކަމަށެވެ. މީގެ އިތުރުން އިސްލާމިކް ޖިހާދުން ވެސް ވަނީ މަޝްވަރާތަކަށް ތާއީދު ކުރާ ކަމަށް ހާމަކޮށްފަ އެވެ. އެހެން ނަމަވެސް، އިސްރާއީލް އިން އިތުރު ހަމަލާތެއް ނުދޭނެ ކަމުގެ ޔަގީންކަން ބޭނުންވާ ކަމަށް ވެސް ހާމަކޮށްފައިވެ އެވެ.

މިދިޔަ ހަފުތާގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ، ހަނގުރާމަ ހުއްޓާލުމަށް އެމެރިކާ އިން ހުށަހަޅާފައި ވަނީ އެންމެ ރަނގަޅު ހުށަހެޅުން ކަމަށެވެ. އަދި އެ އެއްބަސްވުމުގެ މުހިންމު ކަންކަމަށް އިސްރާއީލް އިން އެއްބަސްވެފައިވާ ކަމަށާއި، ހަމާސް ޖަމާއަތުން ވެސް އެކަން ބަލައި ގަތުމަށް ވަނީ ގޮވާލައްވައިފަ އެވެ. 

ހަމާސް އިން އިސްރާއީލަށް އަމާޒުކޮށް ދިން ހަމަލާއަކާ ގުޅިގެން މި ހަނގުރާމަ ފެށުނީ 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އެވެ. އޭގެ ފަހުން މިހާތަނަށް ވަނީ، އިސްރާއީލްގެ ހަމަލާތަކުގައި ޣައްޒާ އިން 57،268 މީހަކު ޝަހީދުވެފަ އެވެ. ހަމާސްގެ ހަމަލާތަކުގައި އިސްރާއީލްގެ 1219 މީހަކު ވަނީ މަރުވެފަ އެވެ.

ޣައްޒާ ހަނގުރާމަ ހުއްޓާލުމަށް އެމެރިކާ އިން ބާރު އަޅަމުން އަންނައިރު ވެސް، އިސްރާއީލް އިން އަންނަނީ ޣައްޒާ އަށް ދެމުން އަންނަ ހަމަލާތައް އިތުރު ކުރަމުންނެވެ. އެގޮތުން ޣައްޒާގައި އިންސާނީ އެހީ ބެހުމުގެ މަސައްކަތް ކުރަމުން އަންނަ މަރުކަޒުތަކަށް އަމާޒުކޮށް ވެސް އިސްރާއީލް އިން އަންނަނީ ހަމަލާތައް ދެމުންނެވެ. 

މީގެ ކުރިން ވެސް އިސްރާއީލް އިން ވަނީ ހަނގުރާމަ ހުއްޓާލުމަށް އެއްބަސްވެފަ އެވެ. މިއަހަރުގެ ޖަނަވަރީ މަހުގެ ތެރޭގައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައިވާއިރު، އެ އެއްބަސްވުމާ ޚިލާފަށް މާޗު މަހުގެ ތެރޭގައި އިސްރާއީލް އިން ވަނީ އަނެއްކާ ވެސް ޣައްޒާ އަށް ހަމަލާތައް ދޭން ފަށައިފަ އެވެ.