ބާސެލޯނާގެ އެއްބަސްވުން ޝެޒްނީ އައު ކުރާނެކަން އިއުލާން ކޮށްފި

ސްޕެއިންގެ ބާސެލޯނާ އަށް ކުޅެމުން އަންނަ ޕޮލެންޑުގެ ގޯލު ކީޕަރު ވޮޒްޝިއޭ ޝެޒްނީގެ އެއްބަސްވުން އައު ކުރަން ނިންމާފައިވާ ކަމަށް، އެ ކުލަބުގެ ސްޕޯޓިން ޑިރެކްޓަރު ޑެކޯ ބުނެފި އެވެ.

ބާސެލޯނާގެ އެއް ނަންބަރު ގޯލު ކީޕަރު މާކް އަންދްރޭ ޓާ ސްޓެގެން އަށް އަނިޔާވެ ކުޅުމާ ދުރަށް ދާން ޖެހުމުގެ ސަބަބުން، އޭނާގެ ބަދަލު ކީޕަރެއްގެ ގޮތުގައި ޝެޒްނީ ބާސެލޯނާ އަށް ބަދަލުވީ 2024 ވަނަ އަހަރުގެ އޮކްޓޫބަރު މަހުގެ ތެރޭގަ އެވެ. އެއީ ފުޓުބޯޅަ އިން ރިޓަޔާ ވުމަށް ނިންމުމަށް ފަހު، އެ ނިންމުން ބަދަލު ކުރުމަށްފަހު އެވެ.

އުމުރުން 35 އަހަރުގެ ޝެޒްނީ ބާސެލޯނާއާ ގުޅުނީ އެއް ސީޒަންގެ މުއްދަތަކަށެވެ. އެ ކުލަބާ އެކު އޭނާ ސޮއި ކުރި އެއްބަސްވުމުގެ މުއްދަތު ޖޫން މަހުގެ ނިޔަލަށް ހަމަވާނެ އެވެ. ނަމަވެސް، ބާސެލޯނާގައި އޭނާ ދައްކަމުން އަންނަ މޮޅު ކުޅުމުގެ ސަބަބުން، އޭނާގެ އެއްބަަސްވުން އައު ކުރަން އެ ކުލަބުން އޮތީ ބޭނުންވެފަ އެވެ.

އެކަމާ ގުޅުން ހުރި މަޝްވަރާތައް ބާސެލޯނާ އިން ވަނީ ޝެޒްނީއާ އެކު ވެސް ކުރިއަށް ގެންގޮސްފަ އެވެ. އެކަމާ ގުޅޭ ގޮތުން މި ފަހުން ވާހަކަ ދައްކަމުން ޑެކޯ ބުނެފައި ވަނީ، ބާސެލޯނާގެ އެއްބަސްވުން ޝެޒްނީ އައު ކުރާނެ ކަމަށާއި، އަދި އަންނަ ސީޒަންގައި އޭނާ ބާސެލޯނާ އަށް ކުޅޭނެ ކަމަށެވެ. ޑެކޯ ބުނީ އެ ނިންމުމާ ހަމައަށް އާދެވުނީ ކުލަބާއި، ޝެޒްނީއާ ދެމެދު ކުރިއަށް ގެންދިޔަ ގިނަ މަޝްވަރާތަކަށް ފަހު ކަމަށެވެ.

ބާސެލޯނާގެ އެއްބަސްވުން ޝެޒްނީ އައު ކުރާނީ ދެ އަހަރުގެ މުއްދަތަކަށެވެ. އެހެންކަމުން، 2027 ވަނަ އަހަރާ ހަމައަށް އޭނާ އެ ކުލަބުގައި ހުންނާނެ އެވެ. ޝެޒްނީގެ އައު އެއްބަސްވުމުގެ ލިޔެކިޔުންތައް ބާސެލޯނާ އިން ފުރިހަމަ ކޮށްފައިވާ ކަމަށާއި، މިހާރު މަސައްކަތް ކުރަމުން އަންނަނީ އެއްބަސްވުމުގައި ސޮއި ކުރުމަށް ކަމަށް ސްޕެއިންގެ މީޑިއާ ތަކުގައި ވަނީ ބުނެފަ އެވެ.

އާސެނަލް، ބްރެންޓްފޯޑް، ރޯމާ އަދި ޔުވެންޓަސް އަށް ކުޅެފައިވާ ތަޖުރިބާކާރު ކީޕަރު ވަނީ މި ނިމުނު ސީޒަންގައި ބާސެލޯނާގައި މޮޅު ކުޅުމެއް ދައްކައިފަ އެވެ. އޭނާ ވަނީ މިދިޔަ ސީޒަންގައި 30 މެޗުގައި ބާސެލޯނާގެ ގޯލު ބަލަހައްޓައިފަ އެވެ. އަދި ބާސެލޯނާ އާއެކު އޭނާ ވަނީ ތިން ތައްޓެއް ވެސް ކާމިޔާބު ކޮށްފަ އެވެ. އެއީ ސްޕެނިޝް ލީގުގެ އިތުރުން، ކޮޕާ ޑެލް ރޭ އަދި ސްޕެނިޝް ސުޕަ ކަޕް އެވެ.

ބާސެލޯނާގައި ޝެޒްނީ ދައްކަމުން އައި މޮޅު ކުޅުމުގެ ސަބަބުން، އެ ޓީމުގެ ކޯޗު ހަންސީ ފްލިކް ގިނައިން އިސްކަން ދިނީ ވެސް އޭނާ އަށެވެ. އަދި ޝެޒްނީގެ އެއްބަސްވުން އައު ކުރުމަށާއި، އެ ކުލަބުގައި އޭނާ ބަހައްޓަން ފްލިކް ބޭނުންވެފައި ހުރި ކަމަށް ވެސް މީޑިއާ ތަކުގައި ވަނީ ބުނެފަ އެވެ.