އިންޓަރ މިއާމީ އާއި ޕަލްމެއިރާސް ގަދަ 16 އަށް

އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް އޭގައި އިންޓަރ މިއާމީ އާއި ޕަލްމެއިރާސް ބައްދަލު ކުރި މެޗު އެއްވަރުވެ، ދެ ޓީމަށް ވެސް މުބާރާތުގެ ގަދަ 16 ވަނަ ބުރުން ޖާގަ ލިބިއްްޖެ އެވެ.

މުބާރާތުގައި އިންޓަރ މިއާމީގެ ފުރަތަމަ މެޗުގައި އަލް އަހްލީއާ އެއްވަރުވި ނަމަވެސް، ދެ ވަނަ މެޗުގައި ވަނީ ޕޯޓޯގެ މައްޗަށް ކުރި ހޯދައިފަ އެވެ. ޕަލްމެއިރާސްގެ ފުރަތަމަ މެޗުގައި ޕޯޓޯއާ އެއްވަރުވީއިރު، ދެ ވަނަ މެޗުގައި ވަނީ އަލް އަހްލީގެ މައްޗަށް ކުރި ހޯދައިފަ އެވެ.

އަންގާރަ ދުވަހުގެ ފަތިހު މި ދެ ޓީމު ބައްދަލު ކުރި މެޗު ނިމުނީ 2-2 އިން އެއްވަރުވެގެންނެވެ. މެޗުގައި އިންޓަރ މިއާމީ އިން ދެ ލަނޑު ޖަހައިގެން ކުރި ހޯދާފައި ވަނިކޮށް، ޕަލްމެއިރާސް އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 16 ވަނަ މިނެޓުގައި އިންޓަރ މިއާމީ އިން ވަނީ ލަނޑު ޖަހައި ލީޑު ނަގައިފަ އެވެ. އުރުގުއޭގެ ލުއިސް ސުއަރޭޒް ތަނަވަސްކޮށްދިން ފުރުސަތެއްގައި މިއާމީ އަށް ލީޑު ނަގައިދިނީ ޓަޑެއޯ އަލެންޑޭ އެވެ. އޭގެ ފަހުން ދެ ވަނަ ހާފުގެ 65 ވަނަ މިނެޓުގައި ސުއަރޭޒް ވަނީ މިއާމީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

އޭގެ ފަހުން މެޗުގެ 80 ވަނަ މިނެޓުގައި ޕަލްމެއިރާސްގެ ފުރަތަމަ ލަނޑު ޖެހީ ޕައުލީނިއޯ އެވެ. އޭގެ އަށް މިނެޓު ފަހުން އެ ޓީމުގެ މައުރީސިއޯ ވަނީ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގައި މި ދެ ކުޅުންތެރިން ވެސް ކުޅެން ނިކުމެފައި ވަނީ ބަދަލު ކުޅުންތެރިންގެ ގޮތުގަ އެވެ.

މި ނަތީޖާ އާއެކު މި ގުރޫޕުގެ އެއް ވަނައިގައި ގަދަ 16 އިން ޖާގަ ހޯދީ ޕަލްމެއިރާސް އެވެ. އެއީ އެ ޓީމު ކުޅުނު ތިން މެޗުން ފަސް ޕޮއިންޓާ އެކު އެވެ. މިއާމީ ވެސް ކުޅުނު ތިން މެޗުން ފަސް ޕޮއިންޓު ލިބޭއިރު، އެ ޓީމު ދިޔައީ ދެ ވަނައިގަ އެވެ.