އެމެރިކާ ލީގްސް ކަޕްގެ ކުއާޓަރ ފައިނަލްގައި ޓައިގްރެސްއާ ދެކޮޅަށް ކުޅުނު މެޗުން މޮޅުވެ، އިންޓަރ މިއާމީ އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

ބުރާސްފަތި ދުވަހުގެ ހެނދުނު ކުޅުނު ކުއާޓަރ ފައިނަލްގެ މެޗު މިއާމީ އިން ކާމިޔާބު ކުރީ 2-1 އިންނެވެ. މެޗުގައި މިއާމީ އިން ލަނޑު ޖަހައި ކުރި ހޯދާފައި ވަނިކޮށް، ޓައިގްރެސް އިން ވަނީ ލަނޑު ޖަހައި ނަތީޖާ ހަމަހަމަ ވެސް ކޮށްފަ އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން މިއާމީ ވަނީ މެޗުން މޮޅުވެފަ އެވެ.

މި މެޗުގައި މިއާމީ އަށް ކުޅެމުން އަންނަ އެ ޓީމުގެ ކެޕްޓަން ލިއޮނަލް މެސީ ކުޅެފައި ނުވެ އެވެ. އެ މެޗުގެ ކުރިން އެމެރިކާ ލީގުގައި ގެލެކްސީއާ ދެކޮޅަށް ކުޅުނު މެޗުގައި މެސީ ކުޅެ، ލަނޑު ވެސް ޖެހި އެވެ. ނަމަވެސް، ކުއާޓަރ ފައިނަލް މެޗަށް މިއާމީ އިން އެކުލަވާލި ސްކޮޑުގައި ވެސް މެސީ ހިމަނާފައި ނުވެ އެވެ.

މެޗު ފަށައިގެން 23 ވަނަ މިނެޓުގައި މިއާމީ އިން ވަނީ ލަނޑު ޖަހައި ލީޑު ނަގައިފަ އެވެ. އެއީ ޓައިގްރެސްގެ އޭރިޔާ ތެރެއިން ޖޯޑީ އަލްބާ ފޮނުވާލަން މަސައްކަތް ކުރި ބޯޅަ އެ ޓީމުގެ ކުޅުންތެރިޔެއްގެ އަތުގައި ޖެހުމުން މިއާމީ އަށް ލިބުނު ޕެނަލްޓީ ކާމިޔާބުކޮށް، އުރުގުއޭގެ ލުއިސް ސުއަރޭޒް ޖެހި ލަނޑެކެވެ.

އޭގެ ފަހުން މެޗުގައި ލީޑު ފުޅާ ކުރުމުގެ ފުރުސަތު މިއާމީ އަށް ލިބުނު ނަމަވެސް، އެ ޓީމަށް ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ ދެ ވަނަ ހާފުގައި ޓައިގްރެސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 67 ވަނަ މިނެޓުގައި ޓައިގްރެސް އަށް ނަތީޖާ ހަމަހަމަ ކޮށްދިނީ އެންހެލް ކޮރެއާ އެވެ.

އޭގެ ފަހުން މެޗުގެ އެންމެ ފަހު ވަގުތުގެ ތެރޭގައި މިއާމީ އަށް ވަނީ ދެ ވަނަ ޕެނަލްޓީއެއް ލިބިފަ އެވެ. އެއީ ޓައިގްރެސްގެ އޭރިޔާ ތެރެއިން ރޮޑްރީގޯ ޑި ޕައުލް ފޮނުވާލި ބޯޅަ އެ ޓީމުގެ ކުޅުންތެރިޔެއްގެ އަތުގައި ޖެހުމުން، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ރެފްރީ ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮށް، މިއާމީ ސެމީ ފައިނަލަށް ގެންގޮސްދިނީ ވެސް ސުއަރޭޒް އެވެ.

އިންޓަރ މިއާމީ އިން ވަނީ 2023 ވަނަ އަހަރުގެ ލީގްސް ކަޕް ކާމިޔާބު ކޮށްފަ އެވެ.