އިންޓެލިޖެންސް ރިޕޯޓާ ދެކޮޅު ހައްދަވައި، ޓްރަމްޕް ވިދާޅުވީ އީރާނުން ނިއުކްލިއާ ހަތިޔާރު އުފައްދާ ކަމަށް

އެމެރިކާގެ އިންޓެލިޖެންސް ކޮމިއުނިޓީން، އީރާންގެ ނިއުކްލިއާ ޕްރޮގްރާމާ ގުޅޭ ގޮތުން ނެރުނު ރިޕޯޓާ، އެ ޤައުމުގެ ރައީސް ޑޮނަލްޑް ޓްރަމްޕް ދެކޮޅު ހައްދަވައިފި އެވެ.

އެމެރިކާގެ ނެޝަނަލް އިންޓެލިޖެންސް ޑައިރެކްޓަރު ޓުލްސީ ގަބާޑްގެ ރިޕޯޓާ ދެކޮޅު ހައްދަވާކަން ހާމަކ ކުރައްވަމުން ޓްރަމްޕް ވިދާޅުވީ، އީރާން އިން އަންނަނީ ނިއުކްލިއާ ހަތިޔާރު އުފައްދަމުން ކަމަށެވެ. 

މިއަހަރުގެ މާޗު މަހުގެ 25 ވަނަ ދުވަހު އެމެރިކާގެ ކޮންގްރެސް އަށް ހުށަހެޅި ރިޕޯޓުގައި ގަބާޑް ވިދާޅުވެފައި ވަނީ، އީރާން އިން ނިއުކްލިއާ ހަތިޔާރު އުފެއްދުމުގެ މަސައްކަތް ނުކުރާ ކަމަށެވެ. އަދި އެފަދަ ޕްރޮގްރާމެއް އަލުން ފެށުމަށް، އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ހުއްދަ ދެއްވާފައި ނުވާ ކަމަށް ވެސް ވަނީ ފާހަގަ ކޮށްފަ އެވެ.

އެހެން ނަމަވެސް، ހުކުރު ދުވަހު ނޫސްވެރިޔަކު ކުރި ސުވާލަކަށް ޖަވާބު ދެމުން ޓްރަމްޕް ވިދާޅުވެފައި ވަނީ، އިންޓެލިޖެންސް ކޮމިއުނިޓީގެ ނިންމުން ރަނގަޅު ނޫން ކަމަށެެވެ. އަދި ވިދާޅުވީ ނެޝަނަލް އިންޓެލިޖެންސްގެ ޑައިރެކްޓަރު ގަބާޑް "ގޯސް" ކަމަށެވެ.

ޓްރަމްޕް އެހެން ވިދާޅުވީ ފަހުން، ގަބާޑް އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ ހަފުތާތަކެއް، ނުވަތަ މަސްތަކެއްގެ ތެރޭގައި އީރާނަށް ނިއުކްލިއާ ހަތިޔާރު އުފެއްދޭ ވަރަގެ ޤާބިލުކަން ލިބިފައިވާ ކަމަށެވެ. ނަމަވެސް، މިއީ އީރާން އިން މިހާރު ހަތިޔާރު އުފައްދަމުން ނުދާ ކަމަށް ބުނި ބުނުމާ، ފުށުއަރާ ވާހަކައެއް ނޫނެވެ. އަދި އީރާން އިން ނިއުކްލިއާ ހަތިޔާރު އުފައްދަމުން އަންނަ ކަމަށް ބުނާ އެމެރިކާގެ އިންޓެލިޖެންސް ރިޕޯޓެއް ވެސް މިހާތަނަށް ލިބިފައި ނުވެ އެވެ. 

އެކަމާ ގުޅިގެން އަލް ޖަޒީރާގެ ސީނިއާ ޕޮލިޓިކަލް އެނަލިސްޓު މަރްވާން ބިޝާރާ ވިދާޅުވެފައި ވަނީ، ޤައުމެއްގެ ރައީސަކު މިފަދަ ގޮތަކަށް އިންޓެލިޖެންސް ކޮމިއުނިޓީއާ ދެކޮޅު ހެދުމަކީ ވަރަށް މަދުން ހިނގާ ކަމެއް ކަމަށެވެ. 

އެމެރިކާގެ ރައީސް ކަމުގައި ދެ ވަނަ ދައުރެއް ފުރުއްވަމުން އަންނަ ޓްރަމްޕް އިތުރަށް ވިދާޅުވެފައި ވަނީ، އިސްރާއީލާއި އީރާނާ ދެމެދު ހަނގުރާމަ ހުއްޓުވުމަށް އެމެރިކާ އިން މަސައްކަތް ކުރުމުގެ ފުރުސަތު ކުޑަ ވެފައިވާ ކަމަށެވެ. އަދި އެމެރިކާ އިން ނިންމުމެއް ނިންމަން، ދެ ހަފުތާއެއްހާ މުއްދަތު ނެގުމަކީ ވެސް އެކަށީގެންވާ ކަމެއް ކަމަށް ޓްރަމްޕް ވިދާޅުވި އެވެ. 

ހަނގުރާމައާ ގުޅޭ ގޮތުން ޓްރަމްޕް ވިދާޅުވެފައި ވަނީ، ހަނގުރާމައިގެ ނަޒަރަކުން ބަލާ ނަމަ، އިސްރާއީލް އިން އަންނަނީ ކާމިޔާބީތަކެއް ހޯދަމުން ކަމަަށެވެ. އެއާ ޚިލާފަށް، އީރާނަށް ހޯދެމުން އަންނަނީ މަދު ނުވަަތަ ކުޑަ ކާމިޔާބެއް ކަމަށް ވެސް ޓްރަމްޕް ވިދާޅުވެފައިވެ އެވެ.