ޔުއެފާ ނޭޝަންސް ލީގުގެ ސެމީ ފައިނަލްގައި އެންމެ ފަހުގެ ޗެމްޕިއަން ސްޕެއިންއާ ދެކޮޅަށް ނިކުންނައިރު، ފްރާންސްގައި އަނިޔާގެ މައްސަލަތަކެއް އޮތް ނަމަވެސް ޓީމުގައި ތިބި ކުޅުންތެރިންނަށް އިތުބާރު ކުރާ ކަމަށް އެ ޓީމުގެ ކޯޗު ޑިޑިއޭ ޑެޝޯމްޕްސް ބުނެފި އެވެ.

ސްޕެއިންއާ ދެކޮޅަށް ކުޅޭ ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޑެޝޯމްޕްސް ބުނީ، ސްޕެއިންއާ ދެކޮޅަށް ނިކުންނައިރު، ޚާއްސަކޮށް އެ ޓީމުގެ އެޓޭކިން ވަރުގަދަ ވާނެ ކަަމަށް ޤަބޫލު ކުރާ ކަމަށެވެ. އެހެން ނަމަވެސް، ސްޕެއިންއާ ދެކޮޅަށް ކުޅެން ފްރާންސް ބަލިކަށި ނުވާނެ ކަމަށް އޭނާ ބުންޏެވެ.

ޑެޝޯމްޕްސް މިހެން ބުނެފައިވާއިރު، ސްޕެއިންއާ ދެކޮޅަށް ފްރާންސްގެ ބައެއް ކުޅުންތެރިންނަށް ނުކުޅެވޭނެ އެވެ. އަނިޔާގެ ސަބަބުން އެ ޓީމުގެ ވިލިއަމް ސަލީބާ، ޑަޔޮޓް އުޕަމަކާނޯ އަދި ޖޫލްސް ކޫންޑޭ އަށް ނުކުޅެވޭނެ އެވެ. މިއީ ފްރާންސްގެ ޑިފެންސްގައި ޑެޝޯމްޕްސް އިސްކަން ދޭ މުހިންމު ތިން ކުޅުންތެރިންނެވެ.

އެ މައްސަލަތަކުގެ ތެރެއިން ސެމީ ފައިނަލްގައި ސްޕެއިންއާ ދެކޮޅަށް ކުޅެން ޖެހޭއިރު، ޑެޝޯމްޕްސް ބުނީ ޓީމުގައި ތިބި ކުޅުންތެރިންނަށް އޭނާގެ އިތުބާރު އޮންނާނެ ކަމަށެވެ. އަދި މެޗާ ކުރިމަތިލާނީ އެ ކުޅުންތެރިންނަށް އޮންނަ ޔަގީންކަމާ އެކު ކަމަށާއި، މެޗު ކާމިޔާބު ކުރަން ހުރިހާ މަސައްކަތެއް ކުރާނެ ކަމަށް ވެސް އޭނާ ބުންޏެވެ.

މީގެ އިތުރުން ޑެޝޯމްޕްސް ބުނީ ފްރާންސް އިން ސެމީ ފައިނަލަށް ނިކުންނަނީ ފުރިހަމަ އަށް ތައްޔާރުވެގެން ކަމަށެވެ. އަދި އެ ޓީމުގެ ފަރިތަކުރުމާއި، ޓީމުގެ ތައްޔާރީތަކާ މެދު ވެސް ހިތްހަމަ ޖެހޭ ކަމުގައި ޑެޝޯމްޕްސް ވަނީ ބުނެފަ އެވެ. ސްޕެއިންއާ ދެކޮޅަށް ކުޅެން ފަސޭހަ ނުވާނެ ކަމަށް ވެސް އޭނާ ޤަބޫލު ކުރެ އެވެ.

އިތުރަށް އޭނާ ވަނީ ފްރާންސްގެ އޮސްމާން ޑެމްބެލޭ އަށް ވެސް ވަރަށް ބޮޑަށް ތައުރީފު ކޮށްފަ އެވެ. ޚާއްސަކޮށް ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އާއެކު ޑެމްބެލޭ ހޭދަކޮށްފައި ވަނީ ކާމިޔާބު ސީޒަނެއް ކަމަށާއި، އޭނާގެ ފަރާތުން ފެނުނީ މޮޅު ކުޅުމެއް ކަމަށް ޑެޝޯމްޕްސް ބުންޏެވެ. އެހެންކަމުން ޑެމްބެލޭ އަށް މިވަގުތު ޚާއްސަ ކަމެއް އޮންނާނެ ކަމަށް ވެސް އޭނާ ބުންޏެވެ.

ޑެޝޯމްޕްސްގެ އިރުޝާދުގެ ދަށުން ފްރާންސް އިން ވަނީ 2020-2021 ވަނަ އަހަރު ނޭޝަންސް ލީގު ކާމިޔާބު ވެސް ކޮށްފަ އެވެ. އެފަހަރުގެ ފައިނަލްގައި ފްރާންސް އިން މުބާރާތް ކާމިޔާބު ކުރީ ސްޕެއިންގެ މައްޗަށް ކުރި ހޯދައިގެންނެވެ.