ފްރާންސް މެޗުގެ ކުރިން ފުއެންޓޭ ބުނީ ފޭވަރިޓުންނެއް ނެތް ކަމަށް

ޔުއެފާ ނޭޝަންސް ލީގުގެ ސެމީ ފައިނަލްގައި ފްރާންސްއާ ދެކޮޅަށް ނިކުންނައިރު، ފޭވަރިޓުންނެއް ނެތް ކަމަށް އެންމެ ފަހުގެ ޗެމްޕިއަން ސްޕެއިންގެ ކޯޗު ލުއިސް ޑި ލާ ފުއެންޓޭ ބުނެފި އެވެ.

އޭނާ މިހެން ބުނީ ބުރާސްފަތި ދުވަހުގެ ރޭ ފްރާންސްއާ ދެކޮޅަށް ކުޅޭ ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

ސްޕެއިންގެ ޓީމާ ގުޅޭ ގޮތުން ވާހަކަ ދައްކަމުން ފުއެންޓޭ ބުނީ، ސްޕެއިންގެ ސްކޮޑުގައި މިހާރު ތިބި ކުޅުންތެރިންނާ މެދު އޭނާގެ އިތުބާރު ބޮޑު ކަމަށެވެ. އަދި އެ ކުޅުންތެރިންނަކީ ސްޕެއިން އަށް އެތައް ކާމިޔާބެއް ގެނެސްދީ، އުފާވެރިކަން ހޯދައިދޭނެ ފެންވަރުގެ ކުޅުންތެރިން ކަމަށް ވެސް އޭނާ ބުންޏެވެ.

ހަމައެކަނި ފްރާންސްއާ ދެކޮޅަށް ކުޅޭ ސެމީ ފައިނަލް މެޗު ނޫން ކަމަށާއި، އުންމީދަކީ އާދިއްތަ ދުވަހު ކުޅޭ ފައިނަލްގައި ސްޕެއިން ކުޅުމުގެ ފުރުސަތު ލިބުން ކަމަށް ވެސް އޭނާ ބުންޏެވެ. އޭނާ ބުނީ ސްޕެއިންގެ ކުޅުންތެރިންނަށް އެކަން ކުރެވޭނެ ކަމުގެ ޔަޤީންކަން އޮންނަ ކަމަށެވެ.

އިތުރަށް ވާހަކަ ދައްކަމުން ފުއެންޓޭ ބުނީ ޖެހި ޖެހިގެން ތިން މުބާރާތް ކާމިޔާބު ކުރުން ވާާނީ ޓީމަށް ލިބޭނެ އިތުރު ހިތްވަރަކަށް ކަމަށެވެ. މިހާރު ވެސް ޓީމުގައި އެ ހިތްވަރާއި، ޝައުޤުވެރިކަން އޮތް ކަމަށް ވެސް އޭނާ ބުންޏެވެ. ސްޕެއިން އިން ވަނީ 2023 ވަނަ އަހަރުގެ ނޭޝަންސް ލީގު ކާމިޔާބު ކޮށްފަ އެވެ. އަދި 2024 ވަނަ އަހަރު އޮތް ޔޫރޯ ވެސް ވަނީ ކާމިޔާބު ކޮށްފަ އެވެ. މިއަހަރު ނޭޝަންސް ލީގު ކާމިޔާބުކޮށް، ޖެހިޖެހިގެން ތިން މުބާރާތް ކާމިޔާބު ކުރުމުގެ ފުރުސަތު އެ ޓީމަށް އެބަ އޮތެވެ.

އޭނާ ބުނީ ސްޕެއިން އަކީ އަބަދު ވެސް ކުރިއެރުމަށް މަސައްކަތް ކުރާ ޓީމެއް ކަމަށެވެ. ޚާއްސަކޮށް މުބާރާތުގެ ގަދަ ހަތަރެއްގެ ތެރޭގައި ހިމެނި ސެމީ ފައިނަލްގައި ކުޅުމަކީ ކުރިއަށް ދާން އޮތް ހިތްވަރެއްގެ ގޮތުގައި އޭނާ ސިފަ ކުރި އެވެ. އޭނާ ބުނީ ސްޕެެއިން އިން އޮތީ ހުރިހާ ފުރުސަތެއްގެ ބޭނުން ހިފައިގެން ފައިނަލުން ޖާގަ ހޯދަން ކަަމަށެވެ.

ފްރާންސްއާ ގުޅޭ ގޮތުން ފުއެންޓޭ ބުނީ، އެ ޓީމަކީ ވެސް ވަރުގަދަ ޓީމެއް ކަމަށާއި، ފްރާންސްގައި ތިބީ ވެސް މޮޅެތި އަދި ހުނަރުވެރި ކުޅުންތެރިން ކަމަށެވެ. މުބާރާތުގެ ސެމީ ފައިނަލާ ހަމައަށް އައިއިރު، ފޭވަރިޓުންގެ ގޮތުގައި އެއްވެސް ޓީމެއް ފާހަގަވާން ނެތްކަން ފާހަގަކޮށް ފުއެންޓޭ ބުނީ، ފައިނަލަށް ދެވޭނީ އެންމެ މޮޅު ދެ ޓީމަށް ކަމަށެވެ.

މިދިޔަ އަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތުގެ ސެމީ ފައިނަލްގައި ވެސް ސްޕެއިން ވާދަކޮށްފައި ވަނީ ފްރާންސްއާ އެވެ. އެ ފަަހަރު ސްޕެއިން އިން ވަނީ 2-1 އިން ފްރާންސްގެ މައްޗަށް ކުރި ހޯދައިފަ އެވެ.