ޔުއެފާ ނޭޝަންސް ލީގު އޭގެ ގުރޫޕު ތިނެއްގައި ހެންގޭރީއާ ދެކޮޅަށް ކުޅުނު މެޗުން ޖަރުމަނު އެއްވަރުވެއްޖެ އެވެ.

އަންގާރަ ދުވަހުގެ ރޭ ހަންގޭރީއާ ދެކޮޅަށް ޖަރުމަނު ކުޅުނު މެޗު ނިމުނީ 1-1 އިން އެއްވަރުވެގެންނެވެ. މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ ޖަރުމަނުންނެވެ. ނަމަވެސް ހަންގޭރީން ވަނީ މެޗުގެ އެންމެ ފަހު ވަގުތުގައި ލަނޑު ޖަހައިގެން ނަތީޖާ ހަމަހަަމަ ކޮށްފަ އެވެ.

އެ މެޗާ ކުރިމަތިލީއިރު ވެސް، ޖަރުމަނަށް ވަނީ މުބާރާތުގެ ކުއާޓާ ފައިނަލް އިން ފުރުސަތު ހޯދައިފަ އެވެ. މެޗުގެ ފުރަތަމަ ހާފުގައި ވެސް ޖަރުމަނުން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. އެގޮތުން އެ ޓީމުގެ ސާޖް ގްނަބްރީ އާއި ލެރޯއީ ސާނޭ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގެ ދެ ވަނަ ހާފުގައި ޖަރުމަނުން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 76 ވަނަ މިނެޓުގައި އެ ޓީމަށް ލީޑު ނަގައިދިނީ ފެލިކްސް އެންމެކާ އެވެ. އޭގެ ފަހުން ޖަރުމަނަށް އިތުރު ލަނޑު ޖަހާނެ ފުރުސަތުތަކެއް ވެސް ވަނީ ލިބިފަ އެވެ. މެޗުން ޖަރުމަނު މޮޅުވާން ދަނިކޮށް، ހަންގޭރީ އިން ވަނީ އެންމެ ފަހު ވަގުުތުގައި ލަނޑު ޖަހައިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ހަންގޭރީ އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ ޑޮމިިނިކް ސޮބޯސްލާއި އެވެ.

މި ނަތީޖާ އާއެކު ޖަރުމަނަށް ވަނީ މި ގުރޫޕުގެ އެއް ވަނަ ކަށަވަރުވެފަ އެވެ. ގުރޫޕުގައި ކުޅުނު ހަ މެޗުން ޖަރުމަނަށް ލިބެނީ 14 ޕޮއިންޓެވެ. ހަތަރު މެޗުން އެ ޓީމު މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. އެއްވެސް މެޗަކުން ޖަރުމަނު ބަލިވެފައެއް ނުވެ އެވެ.