ޔުއެފާ ނޭޝަންސް ލީގުގެ ސެމީ ފައިނަލްގައި ޖަރުމަނުގެ މައްޗަށް ކުރި ހޯދައި، ޕޯޗުގަލް އިން މުބާރާތުގެ ފައިނަލްގެ ޖާގަ ހޯދައިފި އެވެ.

މިއުނިކްގެ އަލިއާންޒް އެެރީނާގައި ބުދަ ދުވަހުގެ ރޭ ކުޅުނު ސެމީ ފައިނަލް މެޗު ޕޯޗުގަލް އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ޖަރުމަނުންނެވެ. ނަމަވެސް، ޕޯޗުގަލް އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ. ފުރަތަމަ ހާފުގައި ވެސް ދެ ޓީމަށް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. ނަމަވެސް އެއްވެސް ޓީމަކަށް ފުރުސަތުގެ ބޭނުން ކުރެވޭ ގޮތެއް ނުވި އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ޖަރުމަނަށް ލީޑު ނަގައިދިނީ ފްލޯރިއަން ވާޓްޒް އެވެ. އޭނާ އެ ލަނޑު ޖެހީ ޔޯޝުއާ ކިމިކް ތަނަވަސްކޮށްދިން ފުރުސަތެއްގަ އެވެ.

މެޗުގެ ނަތީޖާ ހަމަހަމަ ކުރުމަށް ޕޯޗުގަލް އިން ކުރި މަސައްކަތް ކާމިޔާބު ކުރެވުނީ މެޗުގެ 63 ވަނަ މިނެޓުގަ އެވެ. ރުބެން ޑިއާސް ތަނަވަސްކޮށްދިން ފުރުސަތެއްްގައި އެ ޓީމަށް ނަތީޖާ ހަމަހަމަ ކޮށްދިނީ ފްރެންސިސްކޯ ކޮންސެއިސާއޯ އެވެ. މެޗުގައި އޭނާ ކުޅެން ނިކުތީ ވެސް ބަަދަލު ކުޅުންތެރިޔެއްގެ ގޮތުގަ އެވެ.

އޭގެ ފަސް މިނެޓު ފަހުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވަނީ ލަނޑު ޖަހައި އެ ޓީމު ފައިނަލަށް ގެންގޮސްދީފަ އެވެ. އެ ލަނޑު ރޮނާލްޑޯ ޖެހީ ނޫނޯ މެންޑޭސް ތަނަވަސްކޮށްދިން ފުރުސަތެއްގަ އެވެ.

މިއީ ޕޯޗުގަލް އިން ޔުއެފާ ނޭޝަންސް ލީގުގެ ފައިނަލަށް ދިޔަ ދެ ވަނަ ފަހަރެވެ. މީގެ ކުރިން ޕޯޗުގަލް އިން ވަނީ 2018-2019 ވަނަ އަހަރު އޮތް މުބާރާތުގެ ފައިނަލްގައި ކުޅެ، އެ މުބާރާތް ކާމިޔާބު ކޮށްފަ އެވެ. ޕޯޗުގަލް އަކީ އެންމެ ފުރަތަމަ ނޭޝަންސް ލީގު ކާމިޔާބު ކުރި ޤައުމެވެ.

އަނެއްކޮޅުން މިއީ 2023 ވަނަ އަހަރު ޕޯޗުގަލްގެ ކޯޗުކަމާ ހަވާލުވި ރޮބާޓޯ މާޓިނޭޒްގެ އިރުޝާދުގެ ދަށުން އެ ޓީމު ކުޅޭ ފުރަތަމަ ފައިނަލް އެވެ. އޭނާގެ އިރުޝާދުގެ ދަށުން މިދިޔަ އަހަރު އޮތް ޔޫރޯ ފުޓުބޯޅަ މުބާރާތް ޕޯޗުގަލް އިން ކުޅުނުއިރު، އެ މުބާރާތް ނިންމާލަން ޖެހުނީ ކުއާޓާ ފައިނަލާ ހަމައިންނެވެ.

މިފަހަރުގެ ނޭޝަންސް ލީގުގެ ފައިނަލްގައި ޕޯޗުގަލް ނިކުންނަން ޖެހޭނީ ސެމީ ފައިނަލްގައި ފްރާންސް އަދި ސްޕެއިން ކުޅޭ މެޗުން މޮޅުވާ ޓީމަކާ ދެކޮޅަށެވެ.