ޔުއެފާ ނޭޝަންސް ލީގު އޭގެ ގުރޫޕު ތިނެއްގައި ބޮސްނިއާއާ ދެކޮޅަށް ކުޅުނު މެޗުން ނެދަލެންޑްސް އެއްވަރުވެއްޖެ އެވެ.

އަންގާރަ ދުވަހުގެ ރޭ ބޮސްނިއާ އާއި ނެދަލެންޑްސް ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި އެންމެ ފުރަތަމަ ލަނޑު ޖަހައި ލީޑު ހޯދީ ނެދަލެންޑްސް އިންނެވެ. ނަމަވެސް، ބޮސްނިއާ އިން ވަނީ ދެ ވަނަ ހާފުގައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ނެދަލެންޑްސް އަށް ލީޑު ނަގައިދިނީ ބްރިއަން ބްރޮބީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ނޯ ލަންގް އެވެ. އޭގެ ފަހުން ވެސް މެޗުގައި ނެދަލެންޑްސް އިން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. ދެ ވަނަ ލަނޑެއް ޖެހުމަށް ނެދަލެންޑްސް އިން މަސައްކަތް ކުރަމުން ދަނިކޮށް، ދެ ވަނަ ހާފުގައި ބޮސްނިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 67 ވަނަ މިނެޓުގައި އެ ލަނޑު އެ ޓީމަށް ޖަހައިދިނީ އެރްމެޑީން ޑެމިރޯވިޗް އެވެ. އެއީ އެޑެން ޖެކޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މި މެޗުގައި ނެދަލެންޑްސްގެ ކެޕްޓަން ވާޖިލް ވެން ޑައިކް ނުކުޅެ އެވެ. އޭގެ އިތުރުން ކުރީ މެޗުގައި ފުރަތަމަ 11 ގައި ހިމެނިގެން ފްރެންކީ ޑި ޔޯން ކުޅުނު ނަމަވެސް، މި މެޗުގައި އޭނާ ކުޅެފައެއް ނުވެ އެވެ.

ނެދަލެންޑްސް އިން މުބާރާތުގެ ކުއާޓާ ފައިނަލްގެ ފުރުސަތު ހޯދީ މި ގުރޫޕުގެ ދެ ވަނަ ޓީމުގެ ގޮތުގަ އެވެ. އެއީ އެ ޓީމު ކުޅުނު ހަ މެޗުން ނުވަ ޕޮއިންޓު ހޯދައިގެންނެވެ. ދެ މެޗުން ނެދަލެންޑްސް މޮޅުވެފައިވާއިރު، ތިން މެޗުން ވަނީ އެއްވަރުވެފަ އެވެ. އަދި އެއް މެޗުން އެ ޓީމު ވަނީ ބަލިވެފަ އެވެ.